އޭކޭއައިއެލްއެފް ޔޫތު ޗެމްޕިއަންޝިޕްގެ ފައިނަލްގައި ތިމަރަފުށި ބަލިކޮށް އެންމެ ފަހުގެ ޗެމްޕިއަން ހިރިލަންދޫން ތަށި ދިފާއުކޮށްފިއެވެ.

މި މުބާރާތުގައި މީގެ ކުރިން މި ދެ ޓީމު ވާދަކުރިއިރު، އެ މެޗު ވެސް ކާމިޔާބުކުރީ ހިރިލަންދޫއެވެ. ފައިނަލްގައި ތިމަަފުށީގެެ މައްޗަށް ހިރިލަންދޫން ކުރި ހޯދީ 4-3 ންނެވެ.

ފައިނަލް މެޗުގައި ފުރަތަމަ ލީޑު ލިބުނީ ތިމަރަފުއްޓަށެވެ. އެއީ މެޗުގެ 10 ވަނަ މިނެޓުގައި ހިރިލަންދޫގެ މުޙައްމަދު ޝިޔާންގެ އަތުން ބައިކޮޅަށް ވަން ލަނޑަކުންނެވެ. ނަމަވެސް އޭގެ މިނެޓެއް ފަހުން ހިރިލަންދޫއިން ވަނީ ލަނޑެއް ޖަހައި މެޗުގެ ނަތީޖާ ހަމަހަމަކޮށްފައެވެ. އެ ލަނޑު އެ ޓީމަށް ޖަހައިދިނީ އިސްމާއިލް އަޒުހާންއެވެ. ހިރިލަންދޫގެ ލީޑު އެ ޓީމަށް ފުޅާކޮށްދިނީ މެޗުގެ 23 ވަނަ މިނެޓުގައި މުޙައްމަދު ނިޝާހުއެވެ. އޭގެ މިނެޓެއް ފަހުން އަލީ ތާހިރު ވަނީ ލަނޑެއް ޖަހައި ތިމަރަފުއްޓަށް ނަތީޖާ ހަމަހަމަކޮށްދީފައެވެ.

ފުރަތަމަ ހާފު ނިމުމުގެ ކުރިން ހިރިލަންދޫ އިން ވަނީ އަނެއްކާ ވެސް ލީޑު ނަގާފައެވެ. އެއީ 32 ވަނަ މިނެޓުގައި އަޒުހާން ޖަހައިދިން ލަނޑެކެވެ. ދެ ވަނަ ހާފު ފަށައިގެން ލީޑު ގައި އޮވެ ކުޅެމުން ގޮސް، ހިރިލަންދޫގެ ހަތަރު ވަނަ ލަނޑު މެޗުގެ 70 ވަނަ މިނެޓުގައި ޖަހައިދިނީ ޒައިދާން އީސާއެވެ. މެޗު ނިމެން އެއް މިނެޓަށް ވެފައި ވަނިކޮށް، ތިމަރަފުށީގެ ތިން ވަނަ ލަނޑު ޖެހީ އަލީ އިލްމާންއެވެ. މެޗުގެ މޮޅު ކުޅުންތެރިޔަކަށް ހޮވުނީ ޗެމްޕިއަން ހިރިލަންދޫގެ ޒައިދާންއެވެ.

މުބާރާތުގެ އެންމެ މޮޅު ކޯޗަކަށް ހޮވުނީ ޗެމްޕިއަން ހިރިލަންދޫގެ މުޙައްމަދު އަޒްމީންއެެވެ. އެންމެ މޮޅު ގޯލް ކީޕަރަކަށް ހޮވުނީ އެ ޓީމުގެ މުޙައްމަދު އަޒްލީމްއެވެ. މުބާރާތުގެ އެންމެ ގިނަ ލަނޑު ޖެހި ކުޅުންތެރިޔަކީ ހިރިލަންދޫގެ މުޙައްމަދު ނިޝާހުއެވެ. އަދި މުޅި މުބާރާތުގެ އެންމެ މޮޅު ކުޅުންތެރިޔަކީ އެ ޓީމުގެ ޢަބްދުﷲ އިޝާންއެވެ.

މި މުބާރާތަކީ ރައިސިން ސްޓަރސް ފޯރ ވިލުފުށި ރެކްރިއޭޝަން (އާރުއެސްވީއާރު)ގެ ފަރާތުން އިންތިޒާމުކޮށްގެން، ތ. އަތޮޅަށް ހުޅުވާލައިގެން ކުރިއަށްގެންދާ މުބާރާތެކެވެ. އާރުއެސްވީއާރުގެ ފަރާތުން 2021 ވަނަ އަހަރު ބާއްވަންފެށި މި މުބާރާތަކީ 23 އަހަރުން ދަށުގެ އުމުރުފުރާއަށް ބާއްވާ މުބާރާތެކެވެ. އެއަހަރު މުބާރާތް ކާމިޔާބުކުރީ ވެސް ހިިރިލަންދޫއިންނެވެ.