ރައްޔިތުންގެ މަޖިލީހުގެ ރައީސް މުހައްމަދު ނަޝީދު ރަސްމީ ދަތުރުފުޅެއްގައި ސީޝެލްސްއަށް ދަތުރެއް ކުރެއްވުމަށް ހަމަޖެހިފައިވާކަމަށް ރައްޔިތުންގެ މަޖިލީހުގެ އިދާރާއިން ބުނެފިއެވެ.
މިއީ ސީޝެލްސްގެ ގާނޫނު ހަދާ މަޖިލީހުގެ ރައީސް ރޮޖަރ މަންސިއެންގެ ދައުވަތަކަށް ޖުލައި 22 އިން 28 އަށް ކުރައްވާ ދަތުރުފުޅެކެވެ. ހުކުރު ދުވަހުގެ ވަގުތެއްގައި ރައީސް ނަޝީދު ފުރާވަޑައިގަތުމަށް ހަމަޖެހިފައިވާކަމަށް މަޖިލީހުގެ އިދާރާއިން ބުނެފައިވެއެވެ.
ރައީސް ނަޝީދުގެ މި ދަތުރުފުޅުގައި ސީޝެލްސްގެ ގާނޫނުހަދާ މަޖިލީހަށް ޒިޔާރަތްކުރައްވާނެއެވެ. އަދި އެގައުމުގެ ގާނޫނު ހަދާ މަޖިލީހުގެ ރައީސް އާއިއެކު ރަސްމީ ބައްދަލުވުމެއް ބާއްވަންވެސް ވަނީ ހަމަޖެހިފައެވެ. މި ބައްދަލުކުރެއްވުމުގައި ދެ ގައުމުގެ ކުރިއެރުމަށް އެކުއެކީގައި މަސައްކަތްކުރެވޭނެ ގޮތްތަކަކީ ކޮބައިތޯ ބައްލަވައި އެކަންކަމާމެދު މަޝްވަރާތައް ކުރިއަށް ގެންދިއުމަށް ހަމަޖެހިފައިވާކަމަށް މަޖިލީހުގެ އިދާރާއިން ބުނެއެވެ.
މަޖިލީހުގެ އިދާރާއިން ބުނީ ރާއްޖެއާ ސީޝެލްސްއަކީ ދާދި އެއްގިތަކަށް އިންޑިއާ ކަނޑުގައި އުފެދިފައިވާ ދެ ގައުމުކަމާއި، އަދި ދެގައުމަށް ދިމާވެފައިވާ ގޮންޖެހުންތަކާއި، ހާސިލުކުރަން ބޭނުންވާ ލަނޑުދަނޑިތަކަކީވެސް ދާދި އެއްގޮތް ކަންތައްތަކެއް ކަމަށް ސީޝެލްގެ ގާނޫނު ހަދާ މަޖިލީހުގެ ރައީސްގެ ދައުވަތު ސިޓީފުޅުގައި ފާހަގަކުރައްވާފައިވާކަމަށެވެ. އެހެންކަމުން ދެގައުމުގެ ދެމެދުގައި ގުޅުން ބަދަހިކޮށް އެކުއެކީގައި މަަސައްކަތްކުރުމުގެ މުހިންމު ފާހަގަކުރައްވާފައިވެއެވެ.
ދެގައުމުގެ ގާނޫނު ހަދާ މަޖިލީހުގެ ގުޅުން މުސްތަގުބަލުގައި އިތުރަށް ބަދަހިކުރުމާއި، އަދި ދެ ގައުމުގެ ކުރިއެރުމަށް އިތުރަށް މަސައްކަތްކުރުމުގެ ފުރުސަތުތައް ފަހިކުރުމުގެ މުހިންމުކަންވެސް އެމަނިކުފާނުގެ ސިޓީފުޅުގައި ފާހަގަކުރައްވާފައިވާކަމަށް މަޖިލީހުގެ އިދާރާއިން ބުނެފައިވެއެވެ.
