އޮލިމްޕަސް ޒަމާނީ ފެންވަރަށް ތަރައްގީކުރުމަށް ކުރަމުންދާ މަސައްކަތް ނިންމައި، މިއަހަރުގެ ސެޕްޓެމްބަރު މަހުގެ ފަހުކޮޅު އެތަން ހުޅުވުމަށް މަސައްކަތްކުރަމުންދާކަމަށް ނެޝަނަލް ސެންޓަރ ފޮރ ދި އާޓްސް (އެންސީއޭ) އިން ބުނެފިއެވެ.

އޮލިމްޕަސް އިމާރާތުގެ އާބާތުރަ ފިލުވައި، ވަސީލަތްތައް ތަރައްގީކުރުމުގެ މަސައްކަތުގެ ދެވަނަ ފިޔަވަހީގެ މަސައްކަތް ފަށާފައިވަނީ މިއަހަރުގެ މާރޗް 8 ވަނަ ދުވަހުއެވެ. އެންސީއޭއިން ވަނީ މި މަސައްކަތުގެ އެންމެ ފަހުގެ މައުލޫމާތު ހިއްސާކޮށްފައެވެ.

އެންސީއޭއިން ބުނީ އޮލިމްޕަސް އިމާރާތުގެ ބޭރުފަރުތަކާއި، ހުޅަނގު ފަރާތު ކޮރިޑޯގެ ފާރުތައް މަރާމާތުކޮށް ކުލަލުމުގެ މަސައްކަތް ނިމިފައިވާކަމަށެވެ. އަދި އޮލިމްޕަހުގެ ހުޅަނގު ފަރާތުގައި ކުރިން ބޭނުންކުރި އޭޓީއެމް ހުރިބައި އޮލިމްޕަހުގެ ކެންޓީނެއްގެ ގޮތުގައި ބޭނުންކުރުމަށް އެތެރޭގެ ފާރުތަކަށް ގެންނަންޖެހޭ ބަދަލުތައް ގެނެސް ތަރައްގީކުރަމުންދާކަމަށް އެންސީއޭއިން ބުނެފައިވެއެވެ.

އެންސީއޭއިން ބުނީ އޮލިމްޕަސް ހޯލްގެ ސަވައިލަންސް ކޮންޓްރޯލްއާއި، މެނޭޖްމެންޓް ރޫމްގެ މަސައްކަތް މިހާރު ނިމިފައިވާކަމަށެވެ. ޕްރޮޖެކްޓަރާއި، ހޯލްގެ ސަރައުންޑް ސައުންޑް އިންސްޓޯލް ކުރުމަށް ސިންގަލްސޯސް ބިޑެއްގެ ގޮތުގައި ކުރިއަށްގެންދިއުމަށް ބަޔަކު ހޯދައި އޭޕްރިލް 18 ވަނަ ދުވަހު އެފަރާތުން ހުށަހެޅި ޕްރޮޕޯސަލާއި ގުޅިގެން ގާނޫނާއި ގަވާއިދުގެ ތެރެއިން ބިޑް ކޮމިޓީން ކުރަންޖެހޭ މަސައްކަތްތައް ދަނީ ކުރަމުން ކަމަށް އެންސީއޭއިން ބުނެފައިވެއެވެ.

މީގެއިތުރުން ރިހާސަލް ރޫމްތަކާއި، ކަރަންޓު ވައިރިންގެ މަސައްކަތް ކުރެވެމުންދާކަމަށް އެންސީއޭއިން ބުނެފައިވެއެވެ. ރީހާސަލް ރޫމްތަކާއި ހޯލުގެ އެކޯސްޓިކް މެޓީރިއަލް ހޯދުމަށް ބަޔަކާ ހަވާލުކޮށް އެފަރާތައް މަސައްކަތް ކުރިއަށްނުގެންދެވުމުން އެފަރާތާއެކު ވެފައިވާ އެއްބަސްވުން ބާތިލުކޮށްފައިވާކަމަށް އެންސީއޭއިން ވަނީ ބުނެފައެވެ. އަދި މިހާރު މި މަސައްކަތް އެސްޓީއޯއާ ހަވާލުކޮށްގެން ކުރިއަށްގެންދާކަމަށް ބުނެފައިވެއެވެ.

ފިލްމި ސްކްރީން ކުރުމަށް ބޭނުންވާ ސްކްރީން ހޯދުމަށް 3 ފަހަރަށް އިއުލާނު ކުރުމުންވެސް އެކަށީގެންވާ ވަރަށްވުރެ ބޮޑު އަގެއްގައި ހުށަހަޅާތީ، ސިންގަލް ސޯސްކޮށް ސްކްރީން ހޯދުމަށް ބަޔަކަށް ހުށަހަޅައި، އެ ފަރާތުގެ ޕްރޮޕޯސަލް އިވެލުއޭޓް ކުރުމުގެ މަސައްކަތް ކުރަމުންދާކަމަށް އެންސީއޭއިން ބުނެފައިވެއެވެ.

އަދި އޮލިމްޕަހުގައި ހިންގާ އެކި ހަރަކާތްތައް އިޝްތިހާރުކުރުމަށް އޮލިމްޕަހުގެ މައި ގޭޓް މަތީގައި ލެޑް ޕެނަލްއެއް ބެހެއްޓުމަށް އިއުލާނުކޮށް، އެ މަސައްކަތް ބަޔަކާ ހަވާލުކޮށްފައިވާކަމަށް އެންސީއޭއިން ބުނެއެވެ. ލެޑް ޕެނަލް ރާއްޖެ ގެނެސްފައިވާކަމަށާއި، މިހާރު ކުރިއަށްދަނީ ކަސްޓަމްސްއިން ކްލިއަރ ކުރުމުގެ މަސައްކަތް ކަމަށް އެންސީއޭއިން ބުނެފައިވެއެވެ.

އަދި އެސްޓީއޯއާ ގުޅިގެން އޮލިމްޕަސް ސްޓޭޖަށް ބޭނުންވާ ސައުންޑާއި، ލައިޓް ގެނައުމުގެ މަސައްކަތް ދަނީ ކުރަމުންނެވެ. ސްޓޭޖް ސައުންޑާއި ލައިޓްސްގެ ކޮންޓްރޯލް ގާއިމްކުރުމަށް ތައްޔާރުކުރާ ޕްލެޓްފޯމްގެ މަސައްކަތް މިމަސް ތެރޭގައި ފެށޭނެ ކަމަށް އެންސީއޭއިން ބުނެފައިވެއެވެ.

އެންސީއޭއިން ބުނީ އޮލިމްޕަހުގެ މަސައްކަތްތައް އެކި ފަރާތްތަކާ ހަވާލުކޮށްގެން ބައެއް ފަރާތްތަކުގެ މަސައްކަތް ލަސްވެފައިވަނީ ކޮވިޑް-19އާއި، ރަޝިއާ-ޔޫކްރެއިން ހަނގުރާމައިގެ ސަބަބުން ބޭރުން ގެންނަންޖެހޭ ތަކެތި ނުގެނެވި ލަސްވަމުންދާތީ ކަމަށެވެ. އެހެންނަމަވެސް އުންމީދަކީ އޮލިމްޕަސް މަރާމާތުކޮށް ތަރައްގީކުރުމުގެ މަސައްކަތް ނިމި، މިއަހަރުގެ ސެޕްޓެމްބަރު މަހުގެ ފަހުކޮޅު ޒަމާނީ ވަސީލަތްތަކާއެކު އޮލިމްޕަހުގެ ޚިދުމަތް ދޭން ފެށުން ކަމުގައި އެންސީއޭއިން ބުނެފައިވެއެވެ.

އޮލިމްޕަސް ހޯލް އަޕްގްރޭޑިން ޕްރޮޖެކްޓަކީ އިންޑިއާގެ ހިލޭ އެހީގެ ދަށުން ހިންގަމުންދާ މަޝްރޫއެކެވެ.