މި މަހުގެ 25 ން އޯގަސްޓު މަހުގެ ފަސް ވަނަ ދުވަހަށް އިންޑިއާގައި ކުރިއަށްދާ 20 އަހަރުން ދަށުގެ ސާފް ޗެމްޕިއަންޝިޕަށް ޤައުމީ ޓީމު ފުރައިފިއެވެ.

އިންޑިއާގެ ބުބަނޭޝްވަރުގައި ކުރިއަށްދާ މި މުބާރާތަށް ޤައުމީ ޓީމު ފުރައިފައިވަނީ މިއަދުގެ މެންދުރުއެވެ. ސާފް ޗެމްޕިއަންޝިޕް ކުރިއަށް ދާނީ ކޮންމެ ޓީމެއް ކޮންމެ ޓީމަކާ ވާދަކޮށް، އެންމެ ގިނަ ޕޮއިިންޓު ލިބޭ ދެ ޓީމަށް ފައިނަލުން ޖާގަ ލިބޭ ގޮތަށެވެ. މުބާރާތުގައި ވަނީ ފަސް ޤައުމަކުން ބައިވެރިވެފައެވެ. އެއީ ރާއްޖެ، ސްރީ ލަންކާ، އިންޑިއާ، ނޭޕާލް އަދި ބަންގްލަދޭޝްއެވެ.

މުބާރާތުގައި ވާދަކުރާ ރާއްޖޭގެ ޓީމަށް ބަލާއިރު، ގިނަ ކުޅުންތެރިންނަކީ ދިވެހި ޕްރިމިއަރ ލީގުގައި ކުޅެމުން އަންނަ ކުޅުންތެރިންނެވެ. އޭގެ ތެރޭގައި އެއް ވަނަ ޑިވިޝަންގެ ކުލަބުތަކުގެ ފުރަތަމަ 11 ގައި ހިމެނިގެން ކުޅޭ ކުޅުންތެރިން ވެސް ހިމެނެއެވެ. މުބާރާތުގައި ރާއްޖޭގެ ޓީމަށް އިރުޝާދު ދޭނީ ތަޖުރިބާކާރު ކޯޗު އަހްމަދު ޝާކިރު (ޝާކިއްޓެ)އެވެ.

ވިހި އަހަރުން ދަށުގެ ސާޕް ޗެމްޕިއަންޝިޕްގެ ފުރަތަމަ މެޗުގައި މިމަހުގެ 25 ވަނަ ދުވަހު ރާއްޖެއިން ނިކުންނާނީ ނޭޕާލާ ދެކޮޅަށެވެ. ދެ ވަނަ މެޗުގައި ރާއްޖެއިން ވާދަކުރާނީ ބަންގްލަދޭޝްއާއެވެ. ތިން ވަނަ މެޗުގައި ލަންކާއާ ދެކޮޅަށް ކުޅުމަށްފަހު، ފަހު މެޗުގައި ނިކުންނާނީ އިންޑިއާއާ ދެކޮޅަށެވެ.