ހާސިލްކުރެވުނީ އެތައް ދުވަހެއްގެ އުންމީދު، ކާމިޔާބުކުރެވުނީ ބުރަ މަސައްކަތުން

އޭޝިއަން ބޮޑީބިލްޑިން އެންޑް ފިޒިކް ޗެމްޕިއަންޝިޕްގައި ރަން މެޑަލެއް ހޯދުމަކީ އެތައް ދުވަހެއްގެ އުންމީދެއް ކަމަށާއި، އެކަން ކާމިޔާބުކުރެވުނީ ބުރަ މަސައްކަތުން ކަމަށް އަޒްނީން ރަޝާދު ބުނެފިއެވެ.

ކ. މާފުށީގައި ބޭއްވި މުބާރާތުން އަޒްނީން ވަނީ ސްޕޯޓް ފިޒިކް 170 ސީއެމް ކެޓަގަރީން ރަން މެޑަލް ހޯދާފައެވެ. މިއީ މި މުބާރާތުގައި ރާއްޖެއިން މިއަހަރު ހޯދި ފުރަތަމަ ރަން މެޑަލެވެ. މި މުބާރާތުގައި ހޯދި ދެ ވަނަ ރަން މެޑަލެވެ.

އަޒްނީން ބުނީ އަމިއްލަ ފަސްގަނޑުގައި އޮތް ބައިނަލްއަގުވާމީ ބޮޑު މުބާރާތަކުން ރަން މެޑަލެއް ލިބުމަކީ ވަރަށް ބޮޑު ކާމިޔާބެއް ކަމަށެވެ. އެކަމަށްޓަކައި ޝުކުރުކުރާކަން ފާހަގަކުރަމުން އޭނާ ބުނީ، އެ ކާމިޔާބަކީ ވަރަށް ގިނަ ދުވަހުގެ އުންމީދު ކަމަށެވެ. އަޒްނީން ބުނީ، 2019 ވަނަ އަހަރު އޮތް މުބާރާތުގައި އޭނާއަށް ލިބުނީ ހަތަރުވަނަ ކަމަށެވެ. އެފަހަރުގެ މުބާރާތަށްފަހު، ދެން އޭނާ އައީ މިއަހަރުގެ މުބާރާތުން ރަން މެޑަލް ހޯދުމަށް އަޒުމު ކަނޑައަޅައިގެން މަސައްކަތް ކުރަމުންނެވެ. އަޒްނީން ފާހަގަކުރިގޮތުގައި އޭނާއަށް ލިބުނު ކާމިޔާބަކީ ފާއިތުވި ހަތަރު ވަރަކަށް އަހަރުގެ ތެރޭގައި އޭނާ ކުރި މަސައްކަތުގެ ފޮނި ނަތީޖާއެވެ. އެކަމާ އޭނާ އުފާވާކަމަށް އަޒްނީން ބުންޏެވެ.

އޭނާ ބުނީ މިއަހަރުގެ މުބާރާތަށް ތައްޔާރުވަމުން އައީ ވަރަށް ބުރަކޮށް ކަމަށެވެ. އެގޮތުން ޔޫތު މިނިސްޓްރީއާއި ބޮޑީ ބިލްޑިންގ އެސޯސިއޭޝަންގެ އެހީތެރިކަމާއެކު ދުނިޔޭގެ ފެންވަރުގެ ކޯޗެއްގެ އިރުޝާދު ލިބުނުކަން ފާހަގަކުރިއެވެ. މުބާރާތަށް ވަރުގަދަ ޓީމެއް ނެރެން ބޭނުންވާނަމަ، ވަރުގަދަ ކޯޗެއްގެ އިރުޝާދު މުހިންމުކަން ފާހަގަކުރަމުން އޭނާ ބުނީ، ހަމަޖެހުނު ކޯޗާއެކު ޓްރެއިނިންގއާއި ޑައިޓްތައް އުނދަގޫވާނެކަން އެނގުނުކަމަށެވެ. އަދި މުބާރާތަށް ތައްޔާރުވުމުގެ ޓްރެއިނިންގއާއި ޑައިޓްތައް އެހެން އަހަރުތަކަށްވުރެ މިފަހަރު އުނދަގޫވިކަމަށެވެ.

މުބާރާތުގައި ވާދަކުރާ ވަރުގަދަ ޓީމުތަކުގެ އެތުލީޓުންނާ ބެހޭގޮތުން އަޒްނީން ބުނީ، އެހެން ގައުމުތަކުގެ އެތުލީޓުންނަށްވުރެ ދިވެހި އެތުލީޓުން މިހާރު ދަށްނުވާނެކަމަށެވެ. ބޮޑީ ބިލްޑިންގ އަދި ފިޒިކްސްއަށް ބެލިނަމަވެސް، އިންޑިއާއާއި ޕާކިސްތާނު ފަދަ ގައުމުތަކާމެދު މިހާރު ބިރު ގަންނަން ނުޖެހޭކަމަށް އޭނާ ބުންޏެވެ.

އަޒްނީން ބުނީ ކުރިއަށް އޮތީ ވޯރލްޑް ޗެމްޕިއަންޝިޕްކަމަށާއި، އެ މުބާރާތުގައި މީގެ ދެގުނަ މަސައްކަތް ކުރަންޖެހޭނެ ކަމަށެވެ. އަދި އެ މުބާރާތަށް އޭނާއާއި މުޅި ދިވެހި ޓީމު ތައްޔާރުވާނީ މިހާރަށްވުރެ ވަރުގަދަކޮށް، ޑިސިޕްލިން ރަނގަޅުކޮށްކަމަށެވެ. މީގެ އިތުރުން ވޯރލްޑް ޗެމްޕިއަންޝިޕަށް ނިކުންނާނީ މި ނަތީޖާއަށްވުރެ ރަނގަޅު ނަތީޖާއެއް ނެރުމުގެ އުންމީދުގައި ކަމަށާއި، އިރާދަކުރެއްވިއްޔާ އެކަން ކާމިޔާބުކުރެވޭނެ ކަމަށެވެ.