ސްޕެއިންގެ ބާސެލޯނާއަށް ބަދަލުވި ޕޮލޭންޑުގެ ފޯވާޑް ރޮބާޓް ލެވަންޑޯސްކީގެ ނަން ޖަރޒީތަކުގައި ޖެހުން އެ ޓީމުގެ ސްޓޯރުން ހުއްޓާލައިފިއެވެ.
މީޑިއާގައި އާންމުވެފައިވާ ގޮތުގައި ޖަރޒީތަކުގައި ލެވަންޑޯސްކީގެ ނަން ޖެހުން ހުއްޓާލީ، އޭނާގެ ނަމުގައި ހިމެނޭ "ޑަބްލިޔު" އަކުރު ހުސްވުމުންނެވެ. މިގޮތަށް މިކަން ދިމާވެފައި މިވަނީ، ގިނަ ބަޔަކު ލެވަންޑޯސްކީގެ ނަން ޖަހައިގެން ޓީޝާޓު ހެދުމަށް ބާސާގެ ސްޓޯރަށް ހާޒިރުވުމުންނެވެ. އެތައް ހާސް ސްޕޯޓަރުންނެއް ދަނީ އޭނާގެ ނަން ޖެހި ޖަރޒީ ހޯދުމަށް މަސައްކަތް ކުރަމުންނެވެ. ސަބަބަކީ ލެވަންޑޯސްކީ އަކީ ބާސާގެ ސަޕޯޓަރުން އެ ޓީމަށް ގުޅުމަށް ބޭނުންވި ކުޅުންތެރިޔެކެވެ.
ބާސާގެ ސްޓޯރުގައި މަސައްކަތް ކުރާ މުވައްޒަފަކު ވަނީ ލެވަންޑޯސްކީގެ ނަން ޖެހުން ހުއްޓާލާފައިވާކަމަށް ބުނެފައެވެ. އޭނާ ބުނީ ބާސާގެ ސްޓޯރަކީ އާންމު ގޮތެއްގައި ޚިދުމަތް މެދުނުކެނޑި ލިބެމުން އަންނަ ތަނެއް ކަމަށެވެ. ނަމަވެސް މިފަހަރު ޚިދުމަތް މެދު ކެނޑެން ޖެހުނީ، ލެވަންޑޯސްކީގެ ނަމުގައި "ޑަބްލިޔު" ދެ ފަހަރު ބޭނުން ކުރަން ޖެހުމުންނެވެ. އެއާއެކު އެ އަކުރު ހުސްވެފައިވާ ކަމަށެވެ.
ލެވަންޑޯސްކީގެ ސޮއި ހޯދައި، ބާސާއިން މިހާރު ވަނީ އެ ޓީމުގެ ކުޅުންތެރިޔެއްގެ ގޮތުގައި ލެވަންޑޯސްކީ ރަސްމީކޮށް ދައްކާލާފައެވެ. ލެވަންޑޯސްކީ އަންނަނީ ބާސާގެ ޓީމާއެކު ފަރިތަކުރުންތަކުގައި ބައިވެރިވަމުންނެވެ.
