ކ. މާލެ
|
19 ޖުލައި 2022 | އަންގާރަ 09:07
ޒިންޗެންކޯ
ޒިންޗެންކޯ
ޓްވިޓަރ
ޒިންޗެންކޯގެ ކުރިމަގު
ޒިންޗެންކޯ އާސެނަލަށް ދޫކޮށްލަން ސިޓީން އެއްބަސްވެއްޖެ
 
އާސެނަލަށް ބަދަލުވާނީ ހަތަރު އަހަރު ދުވަހުގެ އެއްބަސްވުމެއްގެ ދަށުން

މެންޗެސްޓަރ ސިޓީގެ ޑިފެންޑަރު ޒިންޗެންކޯ އާސެނަލަށް ދޫކޮށްލަން އެ ޓީމުން އެއްބަސްވެއްޖެއެވެ.

މިއީ އާސެނަލުން ހޯދި ސިޓީގެ ދެ ވަނަ ކުޅުންތެރިޔާއެވެ. ދާދި ފަހުން އާސެނަލުން ވަނީ ސިޓީއަށް ކުޅެމުން އައި ފޯވާާޑް ގެބްރިއަލް ޖެސުސްގެ ސޮއި ހޯދާފައެވެ. އާސެނަލުން ޒިންޗެންކޯ ހޯދީ ކުރިއަށް އޮތް ސީޒަނަށް އެ ޓީމު ވަރުގަދަ ކުރުމުގެ ގޮތުން ކުރާ މަސައްކަތުގެ ތެރެއިންނެވެ. މީގެ ކުރިން ސިޓީން ވަނީ ޒިންޗެންކޯ ވިއްކާލަން ނިންމާފައިކަމަށް އޭރު މީޑިއާ ރިޕޯޓުތައް ބުންޏެވެ.

ޓްރާންސްފާގެ ޚަބަރުތައް ގެނެސްދޭ އިތުބާރު ކުޅިވަރު ނޫސްވެރިޔާ ފެބްރީޒިއޯ ރޮމާނޯ ބުނި ގޮތުގައި ޒިންޗެންކޯ ޑީލްގައި ސިޓީ އާއި އާސެނަލަށް މިހާރު ވަނީ އެއްބަސްވުމަކަށް އާދެވިފައެވެ. ޒިންޗެންކޯ ހޯދުމަށް އާސެނަލުން 30 މިލިއަން ޕައުންޑު ސިޓީއަށް ދައްކާނެއެވެ. އާސެނަލްގެ ކޯޗު މިކޭލް އާޓެޓާ ޒިންޗެންކޯ އެ ޓީމަށް ގެންދަން ބޭނުންވާއިރު، އާސެނަލަށް ދިޔުމަކީ ޒިންޗެންކޯ ވެސް ބޭނުންވާ ގޮތެވެ.

ހަތަރު އަހަރު ދުވަހުގެ އެއްބަސްވުމެއްގެ ދަށުން ޒިންޗެންކޯ އާސެނަލަށް ބަދަލުވާއިރު، 2026 ވަނަ އަހަރުގެ ޖޫން މަހުގެ ނިޔަލަށް އޭނާ އެ ޓީމުގައި މަޑުކުރާނެއެވެ. އާސެނަލަށް ބަދަލުވވުމުގެ ގޮތުން ހަދަން ޖެހޭ މެޑިކަލް ޓެސްޓުތައް މި ހަފްތާގެ ތެރޭގައި ހަދާނެ ކަމަށް ބެލެވޭކަމަށް ރޮމާނޯ ވަނީ ބުނެފައެވެ.

ޒިންޗެންކޯ އޭނާގެ ސީނިއަރ ކެރިއަރު ފަށާފައިވަނީ 2015 ވަނަ އަހަރު އެފްސީ އުފާ އިންނެވެ. އެ ޓީމަށް އެއް އަހަރު ދުވަހު ކުޅެދިނުމަށްފަހު، އޭނާ ސިޓީއަށް ބަދަލުވީ 2016 ވަނަ އަހަރުއެވެ. އޭގެ ފަހުން ޒިންޗެންކޯ ވަނީ ސިޓީއަށް 128 މެޗު ކުޅެދީ، ދެ ލަނޑު ޖަހާފައެވެ. މީގެ އިތުރުން އޭނާ ވަނީ ސިޓީއާއިއެކު އިނގިރޭސި ޕްރިމިއަރ ލީގު، އެފްއޭ ކަަޕް، ކަރަބޯ ކަޕް އަދި އެފްއޭ ކޮމިއުނިޓީ ޝީލްޑް ކާމިޔާބުކޮށްފައެވެ. ސިޓީއަށް ބަދަލުވި ފަހުން އޭނާ ވަނީ ލޯނު އެއްބަސްވުމެއްގެ ދަށުން ދެ ޓީމަކަށް ކުޅެފައެވެ.

އުމުރުން 25 އަހަރުގެ ޒިންޗެންކޯ އަންނަނީ 2015 ވަނަ އަހަރުން ފެށިގެން ޔުކްރެއިންގެ ޤައުމީ ޓީމަށް ވެސް ކުޅެމުންނެވެ. އޭނާ ވަނީ މިހާތަނަށް ޤައުމީ ޓީމަށް ކުޅެދިން 52 މެޗުގައި 8 ލަނޑު ޖަހާފައެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: މަރްޔަމް ދާނިޝް ނަޝީދު
0%
0%
0%
0%
0%
100%
ކޮމެންޓް