މުސާރަ ކުޑަކޮށް، އިބްރަހިމޮވިޗްގެ ކޮންޓްރެކްޓް އައުކޮށްފި

މީގެ ކުރިން ލިބެމުންއައި މުސާރައިގެ ބޮޑުބައެއް އުނިކޮށް, އޭސީ މިލާނަށް ކުޅެމުން އަންނަ ޒްލަޓަން އިބްރަހިމޮވިޗްގެ ކޮންޓްރެކްޓް އައުކޮށްފިއެވެ.

އިބްރަހިމޮވިޗްގެ ކޮންޓްރެކްޓް އައުކުރީ އިތުރު އެއް އަހަރުގެ މުއްދަތަކަށެވެ. އެއްބަސްވުމުގެ މުއްދަތު ހަމަވާނީ 2023 ވަނަ އަހަރުގެ ޖޫން މަހުގެ ނިޔަލަށެވެ. އެއްބަސްވުން އައުކުރިކަން އަންގައި އޭސީ މިލާނުން ކުރި ޕޯސްޓެއްގައި ވަނީ، މިއަންނަ ސީޒަންގައި އިބްރަހިމޮވިޗް ކުޅޭނީ 11 ނަންބަރު ޖަރޒީގައިކަމަށެވެ.

މީގެ ކުރިން މިލާނާއެކު އިބްރަހިމޮވިޗް ހަދާފައިވާ އެއްބަސްވުމުގެ ދަށުން އޭނާއަށް އަހަރެއްގެ މައްޗަށް 7 މިލިއަން ޔޫރޯ ލިބޭނެއެވެ. މުސާރައިގެ އިތުރުން، އޭނާ ލަނޑުޖަހާ މިންވަރާއި އެސިސްޓުކުރާ މިންވަރަށް އިތުރު ބޯނަސް ދިނުމަށްވެސް އޭރުގެ އެއްބަސްވުމުގައި ހިމަނާފައިވެއެވެ. ނަމަވެސް އަލަށް ހެދި އެއްބަސްވުމުގައި އޭނާގެ މުސާރައަކީ 1 މިލިއަން ޔޫރޯއެވެ. އެކަމަކު ލަނޑު ޖަހާ މިންވަރާއި އެސިސްޓުކުރާ އަދަދަށް އިތުރު ބޯނަސް ލިބޭނެއެވެ.

މިދިޔަ ސީޒަންގައި އިބްރަހިމޮވިޗްވަނީ މިލާނަށް 23 މެޗު ކުޅެދީ 8 ލަނޑު ޖަހާފައެވެ. މީގެ އިތުރުން ތިން ލަނޑު ޖެހުމަށް އެހީތެރިވެދިނެވެ.

މިއަހަރުގެ މެއި 25 ވަނަ ދުވަހު އިބްރަހިމޮވިޗްގެ ކަކުލަށް ލިބުނު އަނިޔާއެއްގެ ސަބަބުން އޭނާ ވަނީ އޮޕަރޭޝަނެއް ކުރަންޖެހިފައެވެ. ނަމަވެސް އޭނާ ނިންމީ އެސީޒަން ނިމުމަށްފަހު އޮޕަރޭޝަންކުރާށެވެ. ރިޕޯޓުތައް ބުނާގޮތުން އޮޕަރޭޝަނަށްފަހު އޭނާއަށް އެނބުރި ކުޅުމުގެ ތެރެއަށް އާދެވޭނީ މިއަންނަ އަހަރުގެ ފެށޭކޮޅުގައެވެ.