ބަޔާނަށް ބަދަލުވާން މަތައިސް ޑި ލިޓް އެއްބަސްވެއްޖެ

ޔުވެންޓަސްއަށް ކުޅެމުން އަންނަ ނެދަލޭންޑްސްގެ ޑިފެންޑަރު މަތައިސް ޑި ލިޓް ޖަރުމަނު ލީގުގެ ބަޔާން މިއުނިކަށް ބަދަލުވާން އެއްބަސްވެއްޖެއެވެ.

ޑި ލިޓް ހޯދުމުގެ މަސައްކަތް ބަޔާނުން ކުރާތާވަނީ ދުވަސްތަކެއްވެފައެވެ. އެގޮތުން ބަޔާނުން ވަނީ ޑި ލިޓްގެ އެޖެންޓާ މަޝްވަރާކުރުމަށް އިޓަލީއަށް ވެސް ގޮސްފައެވެ. ނަމަވެސް އެ މަޝްވަރާގެ މާ ބޮޑު މައުލޫމާތެއް ބަޔާނުން އޭރު ހާމަކޮށްފައެއް ނުވެއެވެ.

ޓްރާންްސްފާ ޚަބަރުތައް ގެނެސްދޭ އިތުބާރު ކުޅިވަރު ނޫސްވެރިޔާ ފެބްރީޒިއޯ ރޮމާނޯ ބުނި ގޮތުގައި ޑި ލައިޓް ބަޔާނަށް ދޫކޮށްލަން ޔުވެންޓަސް އިން ވަނީ އެއްބަސްވެފައެވެ. އަދި ބަޔާނަށް ބަދަލުވާން ޑި ލައިޓް ވެސް ވަނީ އެއްބަސްވެފައި ކަމަށެވެ. މީގެ އިތުރުން ރޮމާނޯ ބުނި ގޮތުގައި 22 އަހަރުގެ ޑިފެންޑަރު ބަޔާނަށް ބަދަލުވާނީ ފަސް އަހަރު ދުވަހުގެ އެއްބަސްވުމެއްގެ ދަށުންނެވެ. އެހެންކަމުން 2027 ވަނަ އަހަރުގެ ޖޫން މަހުގެ ނިޔަލަށް އޭނާ ބަޔާންގައި މަޑުކުރާނެއެވެ. ބަޔާނުން މިހާރު ވަނީ ރަސްމީ އެއްބަސްވުން ޑި ލައިޓްގެ އެޖެންޓަށް ފޮނުވާފައިކަމަށް ވެސް ރޮމާނޯ ބުނެފައިވެއެވެ.

މީގެ އިތުރުން ޑި ލައިޓް ބަޔާނަށް ގެންދިޔުމަށް އެ ޓީމުން 80 މިލިއަން ޔޫރޯ ޚަރަދުކުރާނެއެވެ. ބަޔާންއަށް ބަދަލުވުމުގެ ގޮތުން ހަދަން ޖެހޭ މެޑިކަލް ޓެސްޓުތައް ހެދުމާއި، އެއްބަސްވުމުގައި ސޮއިކުރުމަށް ޑި ލައިޓް ވަރަށް އަވަހަށް ބަޔާނަށް ދަތުރުކުރާނެ ކަމަށް ރޮމާނޯ ވަނީ ބުނެފައެވެ. މީގެ އިތުރުން އެއްބަސްވުމުގެ ހުރިހާ ކަމެއް އަންނަ ހަފްތާގެ ތެރޭގައި ނިންމާލެވޭނެ ކަމަށް ރޮމާނޯ ބުންޏެވެ.

ޒުވާން ޑިފެންޑަރު އޭނާގެ ސީނިއަރ ކެރިއަރު ފެށީ 2016 ވަނަ އަހަރުއެވެ. ޑި ލައިޓް ވަނީ އޭނާ އަޔެކްސް އަށް ކުޅެދިން 117 މެޗުގައި 13 ލަނޑު ޖަހާފައެވެ. މީގެ އިތުރުން އަޔެކްސް ދޫކޮށް ޔުވެންޓަސް އަށް އޭނާ ބަދަލުވީ 2019 ވަނަ އަހަރުއެވެ. ޔުވެންޓަސްގައި ހޭދަކުރި މުއްދަތުގައި އޭނާ ވަނީ އެ ޓީމަށް 117 މެޗު ކުޅެދީ އަށް ލަނޑު ޖަހާފައެވެ. ޑި ލައިޓް ވަނީ ޔުވެންޓަސްއާއެކު އިޓާލިއަން ލީގު، އިޓާލިއަން ކަޕް އަދި އިޓާލިއަން ސުޕަ ކަޕް ކާމިޔާބުކޮށްފައެވެ.