ކ. މާފުށީގައި މިހާރު ކުރިއަށްދާ އޭޝިއަން ބޮޑީބިލްޑިން އެންޑް ފިޒިކް ޗެމްޕިއަންޝިޕްގައި ރާއްޖޭގެ އަޒުނީން ރަޝާދު ރަން މެޑަލްއެއް ހޯދައިފިއެވެ.

އަޒުނީން ރަން މެޑަލް ހޯދީ ސްޕޯޓް ފިޒިކް 170 ސީއެމް ކެޓަގަރީންނެވެ. މީގެ އިތުރުން ރާއްޖޭގެ މުހައްމަދު އިމްރާން ވަނީ މުބާރާތުގައި ބްރޯންޒް މެޑަލް ހޯދާފައެވެ. އިމްރާން ލޯ މެޑަލް ހޯދީ އޯވަރ 180 ސީއެމް ކެޓަގަރީންނެވެ. އަދި ރާއްޖޭގެ އަލީ ސަލީމް ވެސް ވަނީ އަޕްޓު 175 ސީއެމުން މެޑަލް ހޯދައިފައެވެ.

މިއީ އޭޝިއަން ބޮޑީބިލްޑިންގ މުބާރާތުގައި ރާއްޖެއިން ހޯދި ދެވަނަ ރަން މެޑަލްއެވެ. މީގެ ކުރިން 2017 ވަނަ އަހަރުގެ މުބާރާތުގައި ރާއްޖެއިން ވަނީ ރަން މެޑަލްއެއް ހޯދާފައެވެ. މިފަހަރުގެ މުބާރާތަށް ރާއްޖެއިން ނިކުތީ 10 މެޑަލް ހޯދުމަށް އަމާޒުހިފައިގެންނެވެ.

މި މުބާރާތް މިއަދު ފަށާފައިވާއިރު، މި މަހުގެ 21ގެ ނިޔަލަށް ކުރިއަށް ދާނެއެވެ.