ޖީސޫސް އާސެނަލަށް ބަދަލުވީ އޭނާ ހޯދުމުގެ މަސައްކަތް ޗެލްސީން "ވަރުގަދަޔަށް" ކުރަނިކޮށް

މެންޗެސްޓަރ ސިޓީ ދޫކޮށް ގަބްރިއެލް ޖީސޫސް އާސެނަލަށް ބަދަލުވީ އޭނާ ހޯދުމުގެ މަސައްކަތް ޗެލްސީން ކުރަމުން ދަނިކޮށްކަން ހާމަވެއްޖެއެވެ.

ސިޓީގެ އިތުބާރު ފޯވާޑުގެ ސޮއި އާސެނަލުން ހޯދީ 45 މިލިއަން ޕައުންޑަށެވެ. އާސެނަލުން ވަނީ އެ ޓީމުގެ ކުޅުންތެރިއެއްގެ ގޮތުގައި ޖީސޫސް ރަސްމީކޮށް ދައްކާލާފައެވެ.

ޖީސޫސްގެ އެޖެންޓު މާސެލޯ ޕެޓިނާޓީއާ ހަވާލާދީ މީޑިއާތަކުގައި ރިޕޯޓުކޮށްފައިވާ ގޮތުން، އޭނާ ހޯދުމުގެ މަސައްކަތް ޗެލްސީން ވަނީ ވަރަށް ވަރުގަދަޔަށް ކޮށްފައެވެ. އޭނާ ބުނެފައިވާ ގޮތުގައި ޖީސޫސްގެ ޑީލް ހައިޖެކް ކުރުމަށް ޗެލްސީން ވަނީ ވަރަށް މަސައްކަތްކޮށްފައެވެ. ވަކިން ޚާއްސަކޮށް، ޖީސޫސް އާސެނަލަށް ބަދަލުވުމުގެ ފަހު ދުވަސްތަކުގެ ތެރޭގައި ޗެލްސީން އެ މަސައްކަތް އިތުރަށް ކުރި ކަމަށް އޭނާ ބުނެފައިވެއެވެ. އޭނާ ބުނީ ޗެލްސީގެ ޑީލަށް ޝައުގުވެރިކަމެއް ނެތީ، ޖީސޫސް އޭރު އާސެނަލަށް ބަދަލުވާން ހުރިހާ ކަމެއް ނިމި، ފައިނަލްވެފައި އޮތުމުން ކަމަށެވެ.

ސިޓީން ވަނީ ޖީސޫސް ދޫކޮށްލުމަށްފަހު އިތުރު ދެ ކުޅުންތެރިއްގެ ސޮއި ހޯދާފައެވެ. އޭގެ ތެރޭގައި ބްރޫޝިއާ ޑޯޓްމަންޑަށް ކުޅެމުން އައި އާލިން ހާލަންޑާއި، ރިވަރ ޕްލޭޓަށް ކުޅެމުން އައި ޖޫލިއަން އަލްވަރޭޒް ހިމެނެއެވެ. ޗެލްސީން ވަނީ ސިޓީއަށް ކުޅެމުން އައި އިންގްލޭންޑުގެ ފޯވާޑް ރަހީމް ސްޓާލިންގެ ސޮއި ހޯދައި، އޭނާ އެ ކުލަބަށް ގެނެސްފައެވެ.

ކުރިއަށް އޮތް ސީޒަނަށް ޓީމު ވަރުގަދަ ކުރުމުގެ މަސައްކަތުގެ ތެރެއިން ޗެލްސީ އާއި އާސެނަލުން ވަނީ ރަފީނިއާ ހޯދުމުގެ މަސައްކަތް ވެސް ކޮށްފައެވެ. ނަމަވެސް ފަހު ވަގުތު ރަފީނިއާގެ ޑީލް ކާމިޔާބުކުރީ ސްޕެއިންގެ ބާސެލޯނާއިންނެވެ.