ބަޔާނުން ގޮތް ދޫކޮށް، ލެވަންޑޯސްކީ ބާސާއަށް ދިޔުމަށް އެއްބަސްވެއްޖެ

ޖަރުމަނުގެ ބަޔާން މިއުނިކް ދޫކޮށްލަން ބޭނުންވާކަން ހާމަކޮށްފައިވާ ޕޮލެންޑުގެ އިތުބާރު ފޯވާޑް ރޮބާޓް ލެވަންޑޯސްކީ ބާސެލޯނާއަށް ގުޅުމަށް ބަޔާނުން އެއްބަސްވެއްޖެއެވެ.

ނިމުނު ސީޒަނަށްފަހު ލެވަންޑޯސްކީ ވަނީ ބަޔާން ދޫކޮށްލަން ބޭނުންވާކަން ހާމަކޮށްފައެވެ. އަދި އޭނާގެ ޝައުގުވެރިކަން ބާސާއަށް އޮތްކަމަށް ބުނެފައެވެ. ނަމަވެސް ބަޔާނުން އޭނާ ދޫކޮށްލާކަށް ބޭނުމެއް ނުވިއެވެ. އެ ޓީމުން ބުނަމުން އައީ، ޓީމު ދޫކޮށްލުމުގެ ވާހަކަ ލެވަންޑޯސްކީއަށް ނުދެއްކޭނެ ކަމަށެވެ. ސަބަބަކީ އޭނާއަކީ ބަޔާންގެ ކޮންޓްރެކްޓުގައި ހުރި ކުޅުންތެރިއަކަށްވުމުން ކަމަށެވެ. އެކަމަށް ރައްދުދީ ލެވަންޑޯސްކީ ބުނަމުން އައީ، ކޮންޓްރެކްޓުގައި ބާކީ އެއް އަހަރު އޮތުމަކީ ޓީމުން އޭނާ ހިފަހައްޓަން ޖެހޭ ސަބަބެއް ނޫން ކަމަށެވެ. ބަޔާންއާއިއެކު އޭނާ ހަދާފައިވާ އެއްބަސްވުމުގެ މުއްދަތު ހަމަވާނީ އަންނަ އަހަރުގެ ޖޫން މަހުގެ ނިޔަލަށެވެ.

ބަޔާން ދޫކޮށްލަން ބޭނުންވާކަން ލެވަންޑޯސްކީ ހާމަކުރުމާއެކު، ބާސާއިން އައީ އޭނާ ހޯދުމުގެ މަސައްކަތް ކުރަމުންނެވެ. ބާސާއިން އެ މަސައްކަތް ކުރަމުން އަންނަތާ ދުވަސްތަކެއް ވެފައި ވަނިކޮށް، ޗެލްސީ އާއި ޕެރިސް ސެއިންޓް ޖާމަން (ޕީއެސްޖީ) އިން ވެސް އޭނާ ހޯދުމުގެ މަސައްކަތް ފެށިކަމަަށް މީޑިއާތަކުގައި ވަނީ ރިޕޯޓުކޮށްފައެވެ. ނަމަވެސް އެ ދެ ޓީމުގެތެރެއިން އެއްވެސް ޓީމަކަށް ދިޔުމުގެ ޝައުގުވެރިކަމެއް ލެވަންޑޯސްކީގެ ނެތެވެ. އޭނާ ބޭނުންވީ ވެސް ބާސާއަށް ބަދަލުވާށެވެ. މައްސަލަ ގަނޑު ބޮޑުވެފައި ވަނިކޮށް، ބަޔާނުން މި ހަފްތާގެ ތެރޭގައި ބޭއްވި ޕްރީ ސީޒަންގެ ފަރިތަކުރުން ތަކަށް ވެސް ލެވަންޑޯސްކީ ވަނީ ހާޒިރުވެފައެވެ.

ކުޅިވަރު ނޫސްވެރިޔާ ފެބްރިޒިއޯ ރޮމާނޯ ބުނި ގޮތުގައި ލެވަންޑޯސްކީ ހޯދުމަށް ބާސާއިން ކުރި ފައިނަލް ޕްރޮޕޯސަލް ބަޔާނުން ވަނީ ގަބޫލުކޮށްފައެވެ. އަދި އެ ކުލަބުން ބާސާއަށް އެކަން އަންގާފައިވާކަމަށެވެ. މީގެ އިތުރުން ރޮމާނޯ ބުނި ގޮތުގައި ކުރިއަށް އޮތް ހަފްތާ ބަންދުގެ ތެރޭގައި ލެވަންޑޯސްކީ ބާސާއަށް ބަދަލުވާނެއެވެ. އޭނާ ހޯދުމަށް ބާސާއިން ބަޔާނަށް 50 މިލިއަން ޔޫރޯ ދައްކާނެއެވެ. ލެވަންޑޯސްކީ ބާސާއަށް ގުޅޭނީ ތިން އަހަރު ދުވަހުގެ އެއްބަސްވުމެއްގެ ދަށުންނެވެ.

ބާސާއިން ލެވަންޑޯސްކީގެ ޑީލް ކާމިޔާބުކުރިއިރު، އަންނަ ސީޒަނަށް ޓީމު ވަރުގަދަ ކުރުމުގެ މަސައްކަތް އެ ޓީމުން އަންނަނީ ކުރަމުންނެވެ. އެގޮތުން ލީޑްސް ޔުނައިޓެޑަށް ކުޅެމުން އައި ބްރެޒިލްގެ ރަފީނިއާގެ ސޮއި އެ ޓީމުން ވަނީ ހޯދާފައެވެ. މީގެ އިތުރުން އެ ޓީމުން ވަނީ  ޗެލްސީއަށް ކުޅެމުން އައި ޑެންމާކުގެ ޑިފެންޑަރު އަންދްރެސް ކްރިސްޓެންސަން އާއި އޭސީ މިލާނަށް ކުޅެމުން އަައި އައިވަރީ ކޯސްޓުގެ މިޑްފީލްޑަރު ފްރޭންކް ކެސިއޭގެ ސޮއި ވެސް ހޯދާފައެވެ.