ޗެލްސީގެ ކޯޗު ތޯމަސް ޓުޗެލްގެ ޕްލޭންގައި ރޮނަލްޑޯ ނުހިމެނޭކަން އިއުލާންކޮށްފިއެވެ.
ޗެމްޕިއަންސް ލީގުން ޖާގަ ނުލިބުމުން މެންޗެސްޓަރ ޔުނައިޓެޑް ދޫކޮށްލަން ބޭނުންވާކަން ކްލަބަށް އަންގާ އެމަސައްކަތް ކުރަމުން އަންނަ ރޮނަލްޑޯ ޗެލްސީއަށް ދިއުން ގާތްކަމަށް ރިޕޯޓްކޮށްފައި ވަނިކޮށް, ރޮނަލްޑޯ ޗެލްސީގެ ޕްލޭނުން ބޭރުވީ މެންޗެސްޓަރ ސިޓީގެ އިނގިރޭސި ފޯވާޑް ރަހީމް ސްޓާލިންގެ ސޮއި ލިބުމުންނެވެ. ސްޓާލިންގެ ސޮއި ލިބުމާއެކު ޗެލްސީގެ ކޯޗު ޓުޗެލް ބުނީ މިހާރު ފޯކަސް ހުރީ ޑިފެންސަށްކަމަށެވެ. ރޮނަލްޑޯއާ ގުޅޭގޮތުން ޓުޗެލްއާ ބީބީސީން ކުރި ސުވާލަށް ޖަވާބުދެމުން ބުނެފައިވަނީ ރޮނަލްޑޯގެ ކެރިއަރާ ގުޅޭގޮތުން ވާހަކަދައްކާނީ ރޮނަލްޑޯ ކަމަށެވެ. ރޮނަލްޑޯއާ ގުޅޭގޮތުން އޭނާ ވާހަކަ ނުދައްކާނެ ކަމަށާއި, ޓޮޕް ކްލަބްތަކުގެ ޓޮޕް ކުޅުންތެރިންނާ ގުޅޭގޮތުންވެސް ވާހަކަ ނުދައްކާނެކަމަށެވެ.
އެކަމަކު މެންޗެސްޓަރ ޔުނައިޓެޑާ ހަވާލުވެހުރި ކޯޗު އެރިކް ޓެން ހާގް ބުނީ އޭނާގެ ޕްލޭނުގައި ރޮނަލްޑޯ ހިމެނޭކަމަށެވެ. އަދި ރޮނަލްޑޯ އަކީ ވިއްކާ ކުޅުންތެރިއެއް ނޫންކަމަށް ބުނާ ވާހަކަ ތަކުރާރުކުރިއެވެ. އެކަމަކު މެންޗެސްޓަރ ޔުނައިޓެޑްގެ ޕްރީސީޒަން ތަމްރީނުތަކުގައި ރޮނަލްޑޯ އަދި ބައިވެރިއެއް ނުވެއެވެ. އޭނާ ކްލަބަށް އަންގާފައިވަނީ އާއިލީ ސަބަބެއް އޮތުމުން އަދި ބައިވެރި ނުވަނީ ކަމަށެވެ. ޓީމާ ނުގުޅުނު ނަމަވެސް ފިޓްނަސް ހިފަހައްޓަން ރޮނަލްޑޯ އަންނަނީ އަމިއްލައަށް ތަމްރީނުތައް ހަދަމުންނެވެ.
