ޕޯޗުގަލް އާއި އަލް ނަޞްރުގެ ކެޕްޓަން ކްރިސްޓިއާނޯ ރޮނާލްޑޯ އިސްލާމް ދީން ގަބޫލުކޮށްފި ކަމަށް ބުނެ މީޑިއާތަކުގައި ދެކެވޭ ވާހަތައް އަލް ނަޞްރުން ދޮގުކޮށްފިއެވެ.

ރޮނާލްޑޯ އިސްލާމް ދީން ގަބޫލުކޮށް އުމްރާއަކަށް ދިއަ ކަމަށް ބުނެ ބައެއް މީޑިއާތަކުން ވަނީ ޚަބަރުފަތުރާފައެވެ. އެގޮތުން ރޮނާލްޑޯ އާއި އޭނާގެ ލޯބިވެރިއާ ޖޯޖީނިއާ އުމްރާ ހެދުމުގައި، ދުއާކުރަން ތިއްބާ ނަގާފައިވާ ފޮޓޯތަކެއް ކަމަށް ބުނާ ފޮޓޯތަކެއް ވެސް ސޯސަލް މީޑިއާގައި ވަނީ ދައުރުވެފައެވެ.

ސޯޝަލް މީޑިއާގައި ދައުރުވާ މި ފޮޓޯތަކާއި ގުޅިގެން ރޮނާލްޑޯގެ ކުލަބު އަލް ނަޞްރުން ނެރުނު ބަޔާނެއްގައި ބުނީ މިއީ އެއްވެސް ހަގީގަތެއް ނެތް ދޮގު ވާހަތަކަކެއް ކަމަށާއި ރޮނާލްޑޯ އާއި އޭނާގެ ލޯބިވެރިއާ އުމްރާ ހެދުމުގައި ނަގާފައިވާ ކަމަށް ބުނާ އެ ފޮޓޯތަކަކީ ބަޔަކު އެޑިޓްކޮށްގެން ސޯޝަލް މީޑިއާގައި ދައުރުކުރާ ފޮޓޯތަކެއް ކަމަށެވެ. އަދި އެ ފޮޓޯތަކާއި ރޮނާލްޑޯ އާއި އޭނާގެ ލޯބިވެރިޔާއާއި އެއްވެސް ގުޅުމެއް ނެތްކަމަށް ވެސް ބަޔާނުގައި ބުނެފައިވެއެވެ.

އަދި މިފަދަ އެއްވެސއް ހަގީގަތެއް ނެތް ދޮގު ވާހަތައް މީޑިއާގައި ނުފެތުރުމަށް އަލް ނަޞްރުގެ ބަޔާނުގައި އިލްތިމާސްކޮށްފައި ވެއެވެ.

"ރޮނާލްޑޯ އާއި އޭނާގެ ލޯބިވެރިއާ އަދި އިސްލާމްދީން ގަބޫލުކުރިކަމަށް ބުނެ ދެކެވޭ ވާހަކަ އަކީ ދޮގެއް. އެ ދެމީހުން އުމްރާއަށް ވެސް ނުދޭ. މީޑިއާގައި ދައުރުވަނީ ބަޔަކު އެޑިޓްކޮށްފައިވާ ފޮޓޯތަކެއް. އެފަދަ ދޮގު ނުފެތުރުމަށް އިލްތިމާސްކުރަން،" އަލް ނަޞްރުގެ ބަޔާނުގައި ވެއެވެ.

ދުނިޔޭގެ މޮޅު ކުޅުންތެރިއާގެ މަޤާމު ފަސް ފަހަރު ހޯދާފައިވާ ޕޯޗުގަލް ތަރި ކްރިސްޓިއާނޯ ރޮނާލްޑޯ ސައުދީގެ އަލް ނަޞްރަށް ބަދަލުވީ 2022 ވަނަ އަހަރުއެވެ. ރޮނާލްޑޯ ސައުދީއަށް ބަދަލުވި ފަހުން އޭނާ އާއި އިސްލާމް ދީނާއި ގުޅުވައި ގިނަ ވާހަކަތަކެއް މީޑިއާގައި ވަނީ ފެތުރިފައެވެ. ނަމަވެސް އޭގައި އެއްވެސް ހަގީގަތެއް އެކުލެވިގެން ނުވާކަމަށް އޭނާގެ ކުލަބުން ބުނެއެވެ.