ރޮނާލްޑޯގެ ޕެނަލްޓީ ނާކާމިޔާބުވެ، އަލް ނަޞްރު ކަޓައިފި

ކިންގް ކަޕް އޮފް ޗެމްޕިއަންސްގެ ގަދަ 16 ވަނަ ބުރުގައި އަލް ތައާވޫންއާ ދެކޮޅަށް ކުޅުނު މެޗުން ބަލިވެ، އަލް ނަޞްރު މުބާރާތުން ކަޓައިފި އެވެ.

މުބާރާތުގެ ގަދަ 16 ވަނަ ބުރުގައި އަލް ނަޞްރުން، އަލް ތައާވޫންއާ ދެކޮޅަށް ކުޅުނީ އަންގާރަ ދުވަހުގެ ރޭ އެވެ. އެ މެޗު އަލް ތައާވޫން އިން ކާމިޔާބު ކުރީ 1-0 އިންނެވެ. މެޗުގައި އަލް ތައާވޫން އިން އެ ޓީމުގެ ލަނޑު ޖެހީ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގައި އަލް ނަޞްރުން ވަނީ ލަނޑު ޖެހުމަށް މަސައްކަތް ކޮށްފަ އެވެ. ނަަމަވެސް އަލް ނަޞްރަށް އެ ޓީމަށް ލިބުނު ފުރުސަތުތައް ނިންމާނުލެވިގެން އުޅެނިކޮށް، އަލް ތައާވޫން އިން ވަނީ ލަނޑު ޖަހައި ލީޑު ނަގައިފަ އެވެ. މެޗުގެ 71 ވަނަ މިނެޓުގައި އެ ޓީމަށް ލީޑު ނަގައިދިނީ ވަލީދު އަލް އަޙުމަދު އެވެ. މެޗުގެ ނަތީޖާ ހަމަހަމަ ކުރުމަށް އަލް ނަޞްރަށް ފުރުސަތު ލިބުނެވެ. މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި އެ ޓީމަށް ލިބުނު ޕެނަލްޓީ ކެޕްޓަން ކްރިސްޓިއާނޯ ރޮނާލްޑޯ ފޮނުވާލި ނަމަވެސް، އެ ޕެނަލްޓީ ކާމިޔާބެއް ނުވި އެވެ. މިއީ އަލް ނަޞްރަށް ބަދަލުވީ ފަހުން ރޮނާލްޑޯ އަތުން ނާކާމިޔާބުވި ފުރަތަމަ ޕެނަލްޓީ އެވެ.

މެޗުން ބަލިވެ އަލް ނަޞްރު މުބާރާތުން ކަޓާފައިވާއިރު، ސައުދީ ޕްރޯ ލީގުގައި މިވަގުތު އެ ޓީމު އޮތީ ތިން ވަނައިގަ އެވެ.