ދެވަނަ ރޮނާލްޑޯއެއް ޔުނައިޓެޑަށް ބޭނުންވޭ: އަމޯރިމް

ދެވަނަ ކްރިސްޓިއާނޯ ރޮނާލްޑޯއެއް ޔުނައިޓެޑަށް ބޭނުންވާ ކަމަށާއި އެ ނޫން ގޮތަކަށް ޔުނައިޓެޑުގެ އަސްލު ކާމިޔާބީއާއި ހަމައަށް ދެވޭނެ ކަމަށް ގަބޫލުނުކުރެވޭ ކަމަށް މެންޗެސްޓާ ޔުނައިޓެޑުގެ ކޯޗު ރުބެން އަމޯރިމް ބުނެފިއެވެ.

ކުރިން ޔުނައިޓެޑުގެ ކޯޗުގެ މަގާމުގައި ހުރި އެރިކް ޓެން ހާގް، މަގާމުން ދުރުކޮށް އެ މަގާމަށް އަމޯރިމް ގެނައީ މިދިއަ ނޮވެމްބަރު މަހުގެ 11 ވަނަ ދުވަހުގައެވެ.

އަމޯރިމް ޔުނައިޓެޑުގެ ކޯޗުކަމާއި ހަވާލުވިފަހުން، އޭނާގެ އިރުޝާދުގެ ދަށުން ޔުނައިޓެޑު މިހާތަނަށް ނުވަ މެޗެއް ވަނީ ކުޅެފައެވެ. އޭގެތެރެއިން މޮޅުވެފައި ވަނީ ހަތަރު މެޗުންނެވެ. ހަތަރު މެޗުން ބަލިވިއިރު، އެއް މެޗުން ވަނީ އެއްވަރުވެފައެވެ. އެންމެ ފަހުން ޕްރިމިއާ ލީގުގައި ބޯންމައުތާއި ދެކޮޅަށް ކުޅުނު މެޗުން ވެސް ޔުނައިޓެޑް ވަނީ ބަލިވެފައެވެ. މިއާއި އެކު ޔުނައިޓެޑުގެ މިހާރު ހުރި ކޯޗު އަމޯރިމް އަށް ގިނަ ބައެއްގެ ފާޑުކިޔުންތައް ވެސް ވަނީ އަމާޒުވެފައެވެ.

ޔުނައިޓެޑަށް ދިމާވެފައިވާ މައްސަލަތައް ހައްލުކޮށް، ކުލަބުން ނެރޭ ނަތީޖާތައް ރަނގަޅުކުރުމަށް ކުލަބުގެ މެނޭޖްމަންޓުން ގިނަ މަސައްކަތް ތަކެއް އަންނަނީ ކުރަމުންނެވެ. އެގޮތުން ވޭތުވި ދިޔަ މަދު އަހަރު ދުވަހުގެ ތެރޭގައި ގިނަ ތަފާތު ކޯޗުން ޔުނައިޓެޑަށް ވަނީ ގެނެސްފައެވެ. ނަމަވެސް ޔުނައިޓެޑަށް ރަނގަޅު ކާމިޔާބީއެއް ހޯދައި ދެވޭ ފެންވަރުގެ ކޯޗަކާއި އަދި ވަނީ ދިމާވާގޮތް ނުވެފައެވެ. ޔުނައިޓެޑުހެ ތާރީޚުގައި ވެސް ދުއް އެންމެ މޮޅު ކޯޗުގެ ގޮތުގައި ފާހަގަވި އެލެކްސް ފާގަސަން 2013 ވަނަ އަހަރު ޔުނައިޓެޑުގެ ކޯޗުގެ މަގާމު ދޫކޮށްލިފަހުން އެކުލަބަށް މިހާތަނަށް އަށް ކޯޗަކު ވަނީ ގެނެސްފައެވެ. މިހާރު ޔުނައިޓެޑުގެ ކޯޗުކަމުގައި ހުރި ރުބެން އަމޯރިމް އަކީ ފާގަސަންއަށް ފަހު ޔުނައިޓެޑުގެ ކޯޗުކަމާއި ހަވާލުވި ނުވަނަ ކޯޗެވެ.

އަމޯރިމްއާއި އެކުވެސް އުންމީދު ކުރިވަރުގެ ނަތީޖާތަކެއް ޔުނައިޓެޑަށް ނެރެވެމުން ނުދާއިރު، ޔުނައިޓެޑުގެ މެނޭޖްމަންޓުގެ ކަންބޮޑުވުން އިންތިހާއަށް އެބައޮތެވެ. ޔުނައިޓެޑު މިހާރުގެ ހާލަތުން އަރައިހަތުމަށް މިހާރުގެ ކޯޗު އަމޯރިމް ބުނީ އެކަމުގެ ހައްލެއް ގެ ގޮތުން ޔުނައިޓެޑަށް ދެވަނަ ރޮނާލްޑޯއެއް ހޯދަން ޖެހޭކަމަށެވެ. އޭނާ ބުނީ ޔުނައިޓެޑުގެ އެންމެ ކާމިޔާބު ޖީލަކީ ރޮނާލްޑޯގެ ޖީލު ކަމަށާއި، ރޮނާލްޑޯ ޔުނައިޓެޑު ދޫކޮށް ދިޔަފަހުން އެ ކުލަބު ފުން އަނދަވަޅަކަށް ވެއްޓިފައިވާ ކަމަށެވެ. އަދި މިއަދުވެސް އެ އަނދަވަޅުން ޔުނައިޓެޑް ސަލާމަތް ނުވެވުގެން އުޅޭކަމަށް އަމޯރިމް ބުންޏެވެ.

އަމޯރިމް ބުނީ ދެވަނަ ކްރިސްޓިއާނޯ ރޮނާލްޑޯއެއް ހޯދައިގެން ނޫނީ ޔުނައިޓެޑަށް އިތުރަށް ކުރިއަށް ދެވެން ނެތް ކަމަށެވެ. އެހެންކަމުން އަންނަ ޖެނުއަރީ މަހުގެ ޓްރާންސްގައި ޔުނައިޓެޑަށް ހުނަރުވެރި ރަނގަޅު ޒުވާން ކުޅުންތެރިން ހޯދަން ޖެހޭއިރު، ޔުނައިޓެޑަށް ހޯދަން ބޭނުންވާ ހުނަރުވެރި ކުޅުންތެރިން ވާން ވާނީ ކްރިސްޓިއާނޯ ރޮނާލްޑޯ ފަދަ ކުޅުންތެރިންނަށް ކަމަށް އޭނާ ބުންޏެވެ.

އަމޯރިމް އުންމީދު ކުރާ ގޮތުގައި އަންނަ ޖެނުއަރީ މަހުގެ ޓްރާންސްފާއަށް ފަހު ޔުނައިޓެޑުން ފެނިގެން ދާނީ ރޮނާލްޑޯ ފެންވަރުގެ ކުޅުންތެރިންތަކެކެވެ.