މައިސޫން: އަންހެން ޑްރައިވަރުންގެ މެދުގައި މަގުބޫލު މެކޭނިކް

އަދުގެ ދުނިޔޭގެ ކޮންމެ ހިސާބަކަށް ނަޒަރު ހިންގާލިކަމުގައިވީ ނަމަވެސް ފެނިގެންދާ އެއް ކަމަކީ، ވަކި ކަހަލަ މަސައްކަތެއް ކުރުމުގައި ވަކި ޖިންސަކަށް ނިސްބަތްވީ ފަސް ނުޖެހި ކުރިއަރާދާ ބަޔަކު ދިރިއުޅެމުންދާކަމެވެ. މެދުއިރުމަތީގެ ގައުމުތަކަކީ އަންހެނުންގެ ހައްގުތަކަށް މާބޮޑު ފަރުވާލެއް ނުބަހައްޓާ ބަޔަކު ދިރިއުޅޭ ގައުމުތަކެއް އޮތް ސަރަހައްދެއް ކަމަށް ހުޅަނގުގެ މީޑިއާއިން ސިފަ ކޮށްދެމުން ދިޔަ ނަމަވެސް، އިރާގުގެ ވެރިރަށް ބަޣުދާދުން ދެނީ ތަފާތު މެސެޖެކެވެ.

ކާރު މަރާމާތު ކުރާ ތަފާތު އެކި ވޯކްޝޮޕްތަކުގައި މަސައްކަތް ކުރުމަށް ފަހު، އުމުރުން 38 އަހަރުގެ މައިސޫން ޙަސަން އަކީ، މިއަދު އޭނާގެ އަމިއްލަ ވޯކްޝޮޕެއް ހިނގާ ހީވާގި މެކޭނިކެކެވެ. އަންހެން މެކޭނިކެކެވެ.

އާއިލާއަށް ބޭނުންވާ ޚަރަދުތައް ހަމަޖެއްސުމަށްޓަކާ ކާރު ގަރާޖެއް ހިންގުމުގެ މަސައްކަތް މައިސޫން ފެށި އިރު، މާ ގިނަ މީހުންނަކަށް އޭނާގެ ވާހަކައެއް އަޑެއް ނީވެއެވެ. ނަމަވެސް މިއަދު އޭނާއަކީ ވަކިން ހާއްސަކޮށް، އަންހެން ޑްރައިވަރުންގެ މެދުގައި މަގުބޫލު މެކޭނިކެކެވެ. 

މައިސޫންގެ ކަސްޓަމަރުންވެސް ބުނީ ހަމަ އެހެންނެވެ.

މައިސޫން ބުނާ ގޮތުގައި އޭނާގެ ކަސްޓަމަރުންގެ ތެރެއިން 2 ބައިކުޅަ 1 ބަޔަށް ވުރެ ގިނަ ކަސްޓަމަރުންނަކީ އަންހެނުންނެވެ. މިހާ ހިސާބުން ނިންމާލެވޭކަށް ނެތެވެ. މައިސޫން އަމާޒު ހިފައިގެން ހުރީ އަދިވެސް ކުރިއަށް ދިއުމަށެވެ.

ކާރު މަރާމާތު ކުރުމުގެ މަސައްކަތް، މައިސޫން ދަސްކުރަން ފެށީ ފުރާވަރުގެ ކުއްޖެއްގެ ގޮތުގައެވެ. އޭނާގެ ބައްޕަގެ ގާތުންނެވެ. ބައްޕަ ނިޔާވި ފަހުން، އާއިލާގެ ޚަރަދުތައް ބަލަހައްޓަނީ ޚުދު، މައިސޫންގެ އަމިއްލަ މަސައްކަތުންނެވެ.