ރަޝިއާގެ ރައީސް ވްލޭޑްމިއާ ޕުޓިންގެ އަމުރުފުޅަށް، އެ ގައުމުގެ އަސްކަރިއްޔާއިން ޔޫކްރެއިންއަށް އަރާ، ކުރަން ފެށި ހަނގުރާމަ އަދިވެސް ދަނީ އިތުރަށް ގަދަވަމުންނެވެ. ކުރިމަތިލުންތައް އެންމެ ގަދަވެފައި ވަނީ ޑޮނެޓްސްކް ސަރަހައްދުގައިކަމަށްވާއިރު، ދަނޑުބިންތައްވެސް މިއަދު ބަދަލުވެފައި ވަނީ ހަނގުރާމައިގެ މައިދާނަކަށޭ ދެންނެވިދާނެއެވެ.

އުމުރުން 52 އަހަރުގެ އޮލެކްސާންދަރްގެ ދަނޑުބިންތައް ފެތުރިފައި ވަނީ، ހަނގުރާމައިގެ ފައުޖުތައް ރުކުރާވާލާފައިވާ ގޮތަށް ބަލާއިރު އެންމެ ކުރީ ސަފާ ދާދި ކައިރީގައެވެ. ނަމަވެސް އެއީ އޮލެކްސާންދަރްގެ މަސައްކަތަށް އޮތް ހުރަހެއް ކަމުގައި އޭނާ ނުދެކެއެވެ. ކަށީގެ މަދުން ހިތް ވަރު ނެރެ، މިއަދު އޭނާ ހަރަކާތްތެރި ވަމުން ދަނީ، މިދިޔަ ޚަރީފު މޫސުމުގައި އޭނާ އިންދި ގަސްތަކުން ގޮވާން ކެނޑުމުގައެވެ.

އޭރު ރަޝިއާގެ މިސައިލް ހަމަލާއެއް އަމާޒުވެ، ކަރަންޓް އުފައްދާ ޕްލާންޓަކުން ބޯ ދުން އަރަމުން ދިޔައެވެ. ފިސާރި އަޑުގަދަ ޓްރެކްޓަރެއްގައި އިންނަން ޖެހުމަކީ އޮލެކްސާންދަރްގެ ނަސީބު ކަމުގައި އޭނާ ގަބޫލު ކުރެއެވެ.

ލުހާންސްކް ސަރަހައްދުގެ ފުރިހަމަ ކޮންޓްރޯލް ނެގުމަށް ފަހު، ޑޮންބާސް ސަރަހައްދުގެ ކޮންޓްރޯލް ނެގުމަށް ރަޝިއާއިން މިހާރު ހަމަލާތައް ވަރުގަދަ ކޮށްފައި ވަނީ ޑޮނެޓްސްކް ޕްރޮވިންސްގައެވެ. ޑޮންބާށް ސަރަހައްދަކީ ރަޝިއާގެ އެހީތެރިކަމާއެކު، ޔޫކްރެއިންގެ މައި ސަރުކާރުން ވަކިވެގަތުމަށް މަސައްކަތް ކުރާ ބަޔަކު ދިރިއުޅޭ ސަރަހައްދެކެވެ. ނަމަވެސް އެކަން ވިޔަ ނުދިނުމަށް ޔޫކްރެއިނުންވެސް މަސައްކަތްތަކެއް ކުރެއެވެ.

ރަޝިއާއާއި ޔޫކްރެއިން އަކީ ބައިނަލްއަގުވާމީ ބާޒާރަށް އެންމެ ފުޅާ ދާއިރާއެއްގައި ގޮދަން ސަޕްލައި ކުރަމުންދާ 2 ގައުމެވެ. ގަހު ކާނާ އެކްސްޕޯޓް ކުރުމުގެ އެންމެ ކުރީގައި ރަޝިއާ އުޅޭ އިރު، ޒުވާރިއާއި ސަންފުލާވާ ތެލުގެ އުފެއްދުންތަކުގައި ޔޫކްރެއިން އަކީ މުހިންމު ބައިވެރިއެކެވެ. ޔޫކްރެއިން ހަނގުރާމައިގެ ސަބަބުން ދުނިޔޭގެ ކާބޯތަކެތީގެ ސަޕްލައިއަށް އިންތިހާ ނުރައްކާ ކުރިމަތިވެ، އެތައް ބަޔަކު ހާލުގައި ޖެހެމުންދާއިރު، އެކަމަށް ހައްލު ހޯދުމަށް އދއިން ދާދި ފަހުންވެސް ވަނީ މަޝްވަރާތަކެއް ކުރިއަށް ގެންގޮސްފައެވެ. އެ މަޝްވަރާތަކުގައި ކުރިއެރުންތަކެއް ލިބިފައިވާކަން، އދގެ ސެކްރެޓަރީ ޖެނެރަލް އެންޓޯނިއޯ ގުޓެރޭޒްގެ އިތުރުން، ޔޫކްރެއިންގެ ރައީސް ވްލޮޑޮމީރް ޒެލެންސްކީވެސް ވަނީ ފާހަގަކުރައްވާފައެވެ.

ރަޝިއާގެ ހުރަސް އެޅުންތަކުގެ ސަބަބުން، ޔޫކްރެއިންގައި މިހާރުވެސް 20 މިލިއަން ޓަނުގެ ގޮވާމުގެ ސަޕްލައި ތާށިވެފައި އެބަހުއްޓެވެ.