ގދ އަތޮޅު ކައުންސިލް އެތުލެޓިކްސް ޗެމްޕިއަންޝިޕް ތިނަދޫގައި ބާއްވަން ނިންމައިފިއެވެ.
މުބާރާތުގައި ފަސް އުމުރުފުރާއަކުން އަންހެން އަދި ފިރިހެން ޑިވިޝަންގެ އެތުލީޓުން ވާދަކުރާނެއެވެ. އެއީ 11 އަހަރުން ދަށް، 13 އަހަރުން ދަށް، 15 އަހަރުން ދަށް، 17 އަހަރުން ދަށް، އަދި 19 އަހަރުން ދަށުގެ އުމުރުފުރާއެވެ.
މި މުބާރާތް ރާވައި ހިންގުމަށް ކައުންސިލުން މިހާރު ވަނީ ރައުހަތު ސްޕޯޓްސް ކްލަބާ ހަވާލުކޮށްފައެވެ. ކްލަބުން މައުލޫމާތުދޭގޮތުގައި މި މުބާރާތަށް މޯލްޑިވްސް އެތުލެޓިކްސް އެސޯސިއޭޝަންގެ ފަރާތުން ވަރަށް ބޮޑު އެއްބާރުލުމަކާއި އެހީތެރިކަމެއް ލިބެއެވެ. އަދި މުބާރާތުގައި ރާއްޖޭގެ އެތުލެޓިކްސްގެ އެންމެ މަތީ ފަންތީގެ ގިނަ ޓީމްތަކެއް ފެނިގެންދާނެކަމަށްވެސް އެ ކްލަބުން މައުލޫމާތުދެއެވެ.
މުޅި ރާއްޖޭގެ ހުރިހާ ސްކޫލަކަށް ހުޅުވާލައިގެން ކުރިއަށް ގެންދިއުމަށް ހަމަޖެހިފައިވާ މި މުބާރާތް އޮންނާނީ ސެޕްޓެމްބަރު 11ން 15ގެ ނިޔަލަށެވެ.
