ބްރިޖުގެ މައި ތަނބުތައް ފެނުން މައްޗަށް އަރައިފި

މާލެއާ ހުޅުލެއާ ދެމެދު އަޅަމުންދާ ޗައިނާ-މޯލްޑިވްސް ފްރެންޑްޝިޕް ބްރިޖުގެ މައި ތަނބުތައް ފެނުން މައްޗަށް އަރަން ފަށައިފިއެވެ.

ބުްރިޖްގެ ތަނބުތައް ލޮނުގަނޑުން މައްޗަށް އަރަމުންދާކަން ހާމަކޮށްދެއްވުމުގެ ގޮތުން ހައުސިން މިނިސްޓަރު ޑރ. މުހައްމަދު މުއިއްޒު ވަނީ ތަނބުތައް ދައްކުވައިދޭ ފޮޓޯތަކެއް ޓްވީޓް ކުރައްވާފައެވެ.

ބްރިޖްގެ ތަނބުތައް ދައްކުވައިދޭ ފޮޓޯތައް ޓްވީޓް ކުރައްވަމުން މިނިސްޓަރު ހަމައެކަނި ވިދާޅުވި ބަސްފުޅަކީ ޗައިނާ މޯލްޑިވްސް ފްރެންޑިޝިޕް ބްރިޖްގެ މައި ތަނބުތައް ލޮނުގަނޑުން މައްޗަށް އަރަން ފަށާފައިވާ ކަމަށެވެ.

ބްރިޖުގެ މަސައްކަތްދާގޮތާ ގުޅޭ ގޮތުން މިދިޔަ ހަފްތާ ތެރޭގައި މިނިސްޓަރު މުއިއްޒު ކުރެއްވި ޓްވީޓްތަކެއްގައި ވިދާޅުވީ ބްރިޖްގެ މަސައްކަތް ކަނޑައެޅިފައިވާ ތާވަލާ އެއްގޮތަށް ކުރިއަށްދާ ކަމަށެވެ. އަދި އެކަން ހާމަ ކުރެއްވުމުގެ ގޮތުން ބްރިޖުގެ ބައެއް ތަނބުތައް ފެނުން މައްޗަށް އަރާފައިވާ މަންޒަރު ދައްކުވައިދޭ ފޮޓޯތަކެއް މިނިސްޓަރު ވަނީ ޓްވީޓް ކުރައްވާފައެވެ.

މިނިސްޓަރު ވިދާޅުވެފައި ވަނީ މިހާރު ފެނުން މަށްޗަށް ފެންނަ ތަނބުތަކުގެ އިތުރުން ވެސް އިތުރު ތަނބުތަކަށް ކޮންގްރިޓް އެޅުމުގެ މަސައްކަތް ތާވަލާ އެއްގޮތަށް ކުރިއަށްދާ ކަމަށެވެ. އަދި ކަނޑައެޅިފައިވާ ގޮތަށް އެ މަސައްކަތް ދާ ކަމަށް މިނިސްޓަރު ވިދާޅުވިއެވެ.

މިނިސްޓަރު ވިދާޅުވެފައިވާ ގޮތުގައި މިހާރު މަސައްކަތް ދާ ސްޕީޑުގައި ކުރިޔަށްދާ ނަމަ، ކުރިޔަށް އޮތް ތިން ހަފްތާއެއްހާ ދުވަސް ތެރޭގައި މައި ބްރިޖުގެ ކޮންކްރީޓް ތަނބު ފެންނާނެއެވެ. އަދި މިއަހަރު ނިމުމުގެ ކުރިން ހުރިހާ ތަނބެއް ވެސް ފެންނާނެ ކަމަށް މިނިސްޓަރު ވިދާޅުވެފައި ވެއެވެ.

މުއިއްޒު ވިދާޅުވެފައިވާ ގޮތުގައި ކުރިއަށް އޮތް މަހެއްހާ ދުވަސް ތެރޭގައި، މާލެއިން ބްރިޖަށް އަރާ ދިމާލުގެ ބައެއް ނިމޭނެ ކަމަށާއި، "ހަގީގީ ބްރިޖުގެ ޑެކު މަތީގައި ހިނގާލުމުގެ ފުރުސަތު"، ބްރިޖު މަސައްކަތުގައި އުޅޭ އިންޖިނިއަރުންނާއި މަސައްކަތްތެރީންނަށް ލިބިގެންދާނެއެވެ.

ބްރިޖުގެ ތަނބުތަކަށް ކޮންކްރިޓް އެޅުމުގެ މަސައްކަތް ކުރިއަށްދާއިރު ބްރިޖު މެދުވެރިކޮށް މާލެ އާއި ހުޅުމާލޭގެ ފެނުގެ ނިޒާމް ގުޅުވާލަން ނިންމައި، ހޮޅިލައިން އެޅުމަށްޓަކައި މަސައްކަތުގެ ޑިޒައިން ހެދުމަށް ޗައިނާ ކުންފުންޏަކާ ވަނީ ހަވާލުކޮށްފައެވެ.

އެ މަސައްކަތް ހަވާލުކުރީ ސީސީސީ ސެކަންޑް ހާބަރ އިންޖިނޭރިންއާ އެވެ. އެކުންފުންޏަކީ ބްރިޖުގެ މަސައްކަތް މިހާރުވެސް ކުރަމުން އަންނަ ކުންފުންޏެވެ. އެމަސައްކަތުގެ އަގަކީ ދެލައްކަ ޑޮލަރު (ތިން މިލިއަން ރުފިޔާ) އެވެ. އަދި މަސައްކަތް ހަވާލުކުރީ 70 ދުވަސް ތެރޭ ނިންމާ ގޮތަށެވެ.

މީގެ އިތުރުން މާލެ، ހުޅުލެ، އަދި ހުޅުމާލެއަށް އެއް ވިއުގައަކުން ކަރަންޓް ފޯރުކޮށްދިނުމަށްޓަކައި އަޅާ ޕަވަރ އިންޓަކަނެކްޝަން ނެޓްވޯކް ޤާއިމުކުރާނެ ބަޔަކު ހޯދުމަށް ފިނޭންސް މިނިސްޓްރީން ވަނީ އިއުލާން ކޮށްފައެވެ.

ފިނޭންސް މިނިސްޓްރީން ކުރި އިއުލާނެއްގައި ވަނީ އެމަސައްކަތް ކުރަން ޝައުގުވެރިވާ ފަރާތްތަކަށް ބިޑު ކުރުމުގެ ފުރުސަތު ހުޅުވާލައިފައެވެ. އެ މިނިސްޓްރީން ބުނި ގޮތުގައި އެ މަޝްރޫއުގެ ދަށުން އިންފްރާސްޓްރަކްޗަރ ޤާއިމުކުރުމަށް ހަމަޖެހިފައި ވަނީ ކޮންޓްރެކްޓަރ ފައިނޭންސްގެ އުސޫލުންނެވެ.

އެ މަސައްކަތް ކުރަން ޝައުގުވެރިވާ ފަރާތްތަކަކީ އެފަދަ މަސައްކަތް ކުރެވޭ ފެންވަރުގެ މާލީ ގާބިލުކަން ލިބިފައިވާ ކުންފުންޏަކަށް ވެފައި، އެ ނެޓްވޯކަކީ މާލެ، ހުޅުމާލެ، ހުޅުލޭގައި ޤާއިމުކުރެވިފައިވާ ކަރަންޓު ވިއުގަ ބޭނުންކޮށްގެން، ކަރަންޓުގެ ޚިދުމަތް ފޯރުކޮށްދިނުމުގެ ޤާބިލުކަން ލިބިގެންވާ ނެޓްވޯކަކަށް ވާން ޖެހޭ ކަމަށް ވެސް އެ އިއުލާނުގައި ވެއެވެ.