ރޮޑްރީގެ ކޮންޓްރެކްޓް އައުކޮށްފި
12 ޖުލައި 2022 | އަންގާރަ 17:16ރޮޑްރީ ވަނީ މިހާތަނަށް ސިޓީއަށް 151 މެޗު ކުޅެދީފައި
މެންޗެސްޓަރ ސިޓީގެ މިޑްފީލްޑަރު ރޮޑްރީ
މެންޗެސްޓަރ ސިޓީގެ މިޑްފީލްޑަރު ރޮޑްރީގެ ކޮންޓްރެކްޓް އައުކޮށްފިއެވެ.
ރޮޑްރީގެ ކޮންޓްރެކްޓް އައުކޮށްފައިވަނީ ތިން އަހަރުގެ މުއްދަތަށެވެ. އެހެންކަމުން ސިޓީއާއެކު އޭނާ ހަދާފައިވާ އެއްބަސްވުމުގެ މުއްދަތު ހަމަވާނީ 2026-27 ސީޒަންގެ ނިޔަލަށެވެ.
އެތުލެޓިކޯ މެޑްރިޑަށް ކުޅުމަށްފަހު ރޮޑްރީ ސިޓީއާ ގުޅުނީ 2019 ވަނަ އަހަރުއެވެ. ރޮޑްރީ ވަނީ މިހާތަނަށް ސިޓީއަށް 151 މެޗު ކުޅެދީފައެވެ.
އެއްބަސްވުން އައުކުރުމަށްފަހު ރޮޑްރީ ބުނީ، 2019 ވަނަ އަހަރު އޭނާ ސިޓީއާ ގުޅުން އެއީ ކެރިއަރުގައި ނިންމި އެންމެ ރަނގަޅު ނިންމުން ކަމަށެވެ. އަދި ކާމިޔާބީތައް ހޯދުމުގައި ސިޓީގެ ފަރާތުން އޭނާއަށް ލިބޭ އެހީތެރިކަން ރޮޑްރީ ފާހަގަކުރިއެވެ. ރޮޑްރީ ބުނީ ދިގު މުއްދަތަކަށް އޭނާ ޓީމުގައި މަޑުކުރަން ބޭނުންވާ ސަބަބަކީ އެއީކަމަށެވެ.
ސިޓީއިން ވަނީ މިއަންނަ ސީޒަނަށް ތައްޔާރުވުމުގެގޮތުން ބޮޑެތި ކުޅުންތެރިން ޓީމަށް ހޯދާފައެވެ. އޭގެ ތެރޭގައި ސްޓްރައިކަރު އާލިން ހާލަންޑް އަދި މިޑްފީލްޑަރު ކަލްވިން ފިލިޕްސް ހިމެނެއެވެ.
