ޓޮޓެންހަމަށް ކުޅެމުން އަންނަ އިންގްލޭންޑުގެ ހެރީ ކޭން ދޫކޮށްލަން އެ ކުލަބުން ބޭނުންނުވާކަމަށް މީޑިއާ ރިޕޯޓުތައް ބުނެފިއެވެ.

މީޑިއާ ރިޕޯޓުތައް ބުނާގޮތުގައި ކޭން ހޯދުމުގެ މަސައްކަތް ޖަރުމަނުގެ ބަޔާން މިއުނިކުން ކުރިނަމަވެސް، އޭނާ ދޫކޮށްލާކަށް އެ ކްލަބުން ބޭނުމެއްނުވެއެވެ. މީގެ އިތުރުން ކޭން ދޫކޮށްލުމާ ގުޅޭގޮތުން އެއްވެސް މަޝްވަރާއެއްވެސް އަދި އެެއްވެސް ވާހަކައެއް އެ ކުލަބުން ކުރިއަށް ނުގެންދާކަމަށް ރިޕޯޓުތައް ބުނެއެވެ.

ކުޅިވަރު ނޫސްވެރިޔާ ފެބްރީޒިއޯ ރޮމާނޯ ބުނިގޮތުގައި ޓޮޓެންހަމްގެ ޗެއަރމަން ޑެނިއެލް ލެވީއާއި ކުލަބުގެ މެނޭޖިން ޑިރެކްޓަރ ފަބިއޯ ޕަރަޓިސީގެ އިތުރުން ކޯޗު އެންޓޯނިއޯ ކޮންޓޭވެސް ބޭނުންވަނީ ކޭން އެކްލަބުގައި ބަހައްޓާށެވެ. މީގެ އިތުރުން ކުރިއަށް އޮތް ސީޒަނުގައި ވެސް ކޭން ހުންނާނީ އެ ކްލަބުގައިކަމަށާއި، އޭނާ ވިއްކާލަން އެއްވެސް ވަރަކަށް ބޭނުންނުވާކަމަށް ބުނެފައިވެއެވެ.

ޓޮޓެންހަމްގައި މުހިންމު ރޯލެއް އަދާކުރަމުން އަންނަ ކޭން އޭނާގެ ސީނިއަރ ކެރިއަރު ފަށާފައިވަނީވެސް އެ ކްލަބުންނެވެ. 2009 ވަނަ އަހަރު ޓޮޓެންހަމުން ސީނިއަރ ކެރިއަރު ފަށައި، މިހާހިސާބަށް އޭނާ ވަނީ އެ ޓީމަށް 386 މެޗު ކުޅެދީ 248 ލަނޑު ޖަހާފައެވެ. މީގެ އިތުރުން އޭނާ ވަނީ އެ ޓީމާއެކު ކަރަބޯ ކަޕްގެ ރަނަރަޕްކަމާއި ޔުއެފާ ޗެމްޕިއަންސް ލީގުގެ ރަނަރަޕްކަން ހޯދާފައެވެ. ލޯނު އެއްބަސްވުމެއްގެ ދަށުން ކޭން ވަނީ ހަތަރު ކްލަބަކަށް ކުޅެފައެެވެ. އޭގެ ތެރޭގައި ލޭޓަން އޮރިއެންޓް، މިލްވޯލް، ނޯވިޗް ސިޓީ އަދި ލެއިސްޓަރ ސިޓީ ހިމެނެއެވެ.

އިންގްލެންޑުގެ ގައުމީ ޓީމަށް ވެސް ކުޅެމުން އަންނަ ކޭންއަކީ ގައުމީ ޓީމުގެ ކެޕްޓަނެވެ. އޭނާ ވަނީ ގައުމީ ޓީމަށް ކުޅެދިން 73 މެޗުގައި 50 ލަނޑު ޖަހާފައެވެ. އޭނާ ވަނީ ގައުމީ ޓީމާއެކު ޔޫރޯގެ ދެވަނައާއި ނޭޝަންސް ލީގުގެ ތިންވަނަ ހޯދާފައެވެ. މީގެ އިތުރުން އޭނާ ވަނީ 2018 ވަނަ އަހަރުގެ ވޯލްޑް ކަޕްގެ ރަން ބޫޓުވެސް ހޯދާފައެވެ.