ބަޔާންގެ ރިޗާޑްސް ނޮޓިންހަމްއަށް

ބަޔާން މިއުނިކްގެ ޑިފެންޑަރު އޮމާރް ރިޗާޑްސް ނޮޓިންހަމް ފޮރެސްޓަށް ބަދަލުވެއްޖެއެވެ.

އިންގްލެނޑްގެ 21 އަހަރުން ދަށުގެ ގައުމީ ޓީމަށް ކުރިން ކުޅުނު ޑިފެންޑަރު ނޮޓިންހަމްއަށް ބަދަލުވީ 10 މިލިއަން ޔޫރޯއަށް ކަމަށް ރިޕޯޓުތައް ބުނެއެވެ. ނޮޓިންހަމްއާއެކު ރިޗާޑްސް ހެދީ ހަތަރު އަހަރުގެ އެއްބަސްވުމެކެވެ.

އުމުރުން 24 އަހަރުގެ ރިޗާޑްސް ވަނީ 2021 ވަނަ އަހަރު ބަޔާންއަށް ބަދަލުވުމަށްފަހު 17 މެޗު އެޓީމަށް ކުޅެދީފައެވެ. ބަޔާންގެ 32 ވަނަ ބުންޑެސްލީގާ އެޓީމުން ކާމިޔާބު ކުރުމުގައިވެސް ރިޗާޑްސް ވަނީ ރަނގަޅު ދައުރެއް އަދާކޮށްފައެވެ.

ނޮޓިންހަމްއަށް ބަދަލުވުމަށްފަހު ރިޗާޑްސް ބުނީ އެނބުރި އިނގިރޭސިވިލާތަށް ގޮސް މޮޅު ފުޓްބޯޅައެއް ކުޅުމަށް ކެތްމަދުވެފައިވާ ކަމަށެވެ. އަދި ޓީމާއެކު ޕްރިމިއަރ ލީގުގެ ރަނގަޅު ހިސާބަކަށް ދަތުރުކުރުމަކީ އޭނާގެ އުންމީދުކަން ރިޗާޑްސް ފާހަގަކުރިއެވެ.

ނޮޓިންހަމް އެނބުރި ޕްރިމިއަރ ލީގަށް ކޮލިފައިވީ 22 އަހަރުގެ މެދުކެނޑުމަކަށްފަހުއެވެ. އެންމެ ފަހުން އެޓީމު ޕްރިމިއަރ ލީގުގައި ކުޅެފައިވަނީ 1999 ވަނަ އަހަރުއެވެ.