ޑިލައިޓް ހޯދުމަށް ބަޔާންއިން 90 މިލިއަން ޔޫރޯގެ ބިޑެއް
ޑިލައިޓް ހޯދުމަށްޓަކައި މެންޗެސްޓަރ ސިޓީ، ޗެލްސީ އަދި ބަޔާންއިންވެސް އަންނަނީ މަސައްކަތް ކުރަމުން
ނެދަލެންޑްސްގެ ޑިފެންޑަރު މެތިއުސް ޑިލައިޓް
އިޓަލީވިލާތުގެ ޔުވެންޓަސްއަށް ކުޅެމުން އަންނަ މެތިއުސް ޑިލައިޓް ހޯދުމަށް ބަޔާން މިއުނިކުން 90 މިލިއަން ޔޫރޯގެ ބިޑެއް ހުށަހަޅައިފިކަމަށް ރިޕޯޓުތައް ބުނެފިއެވެ.
ޔުވެންޓަސްއާއެކު ޑިލައިޓް ހަދާފައިވާ އެއްބަސްވުމުގެ މުއްދަތު ހަމަވާނީ 2024 ވަނަ އަހަރުގެ ޖޫން މަހުގެ ނިޔަލަށެވެ. ޔޫރަޕުގެ ގިނަ ކްލަބުތަކަކުން ތަޖުރިބާކާރު ޑިފެންޑަރު ހޯދުމަށް މަސައްކަތް ކުރަމުން އަންނައިރު، ޔުވެންޓަސްއިން އޭނާ ދޫކޮށްލަށް ނިންމާފައިވަނީ އެންމެ ކުޑަ ވެގެންވެސް 70 މިލިއަން ޔޫރޯގެ އަގަކަށެވެ.
ޑިލައިޓް ހޯދުމަށްޓަކައި މެންޗެސްޓަރ ސިޓީ، ޗެލްސީ އަދި ބަޔާންއިންވެސް އަންނަނީ މަސައްކަތް ކުރަމުންނެވެ. ބަޔާންއިން މިހާރު ހުށަހަޅާފައިވާ އަގަށް ޑިލައިޓް ހޯދައިފިނަމަ އޭނާ ވެގެންދާނީ އެންމެ ބޮޑު އަގެއްގައި ބަޔާންއަށް ބަދަލުވި ކުޅުންތެރިޔާއަށެވެ. ރިޕޯޓުތައް ބުނާ ގޮތުން ބަޔާންއިން ހުށަހަޅާފައިވަނީ 75 މިލިއަން ޔޫރޯގެ ފިކްސްޑް އެމައުންޓަކާއިއެކު 15 މިލިއަން ޔޫރޯގެ ވޭރިއެބަލް ހިމެނޭ ބިޑެކެވެ. ޑިލައިޓަށް ކަޅިއަޅަމުން އަންނަ ކްލަބުތަކުގެ ތެރެއިން އޭނާ ހޯދުން އެންމެ ގާތީ ބަޔާންއެވެ.
މި ޓްރާންސްފަރ މާކެޓުގައި ޑިލައިޓް ބަޔާންއަށް ގެންގޮސްފިނަމަ އޭނާ ވެގެންދާނީ މި ސީޒަން ބްރޭކުގައި ބަޔާންއަށް ބަދަލުވި ހަތަރުވަނަ ކުޅުންތެރިޔާއަށެވެ.
