11 ގައުމެއްގެ ތެރޭގައި ހިމެނިފައިފާ ނީލަ ކޯރުގެ މުހިންމުކަން އެކި މުޖްތަމައުތަކަށް ތަޖްރިބާކުރެވެނީ އެކި ގޮތަށެވެ. އެއްބަޔަކަށް އެއީ ދިރި ތިބުމަށް ބޭނުންވާ ފެން ލިއްބައިދޭ ވަސީލަތަކަށް ވާއިރު، އަނެއްބަޔަކަށް ކޯރުގެ އައްސޭރި ފަށުން ލިބޭ ހިމޭންކަމާއި ހިތްހަމަ ޖެހުން އެހާ މުހިންމެވެ.
ނީލަ ކޯރު އެބައެއްގެ ހަޔާތާ ގުޅޭގޮތް ދައްކައިދިނުމަށް އެފްރިކާގެ ނޫސްވެރިންނަށް ހުޅުވާލެވުނު ފުރުސަތެއްގެ ތެރެއިން އެއްކުރެވުނު ތަކެތި ދައްކާލުމަށް މިހާރު ގާހިރާގައިވަނީ ޚާއްސަ މައުރަޒެއް ހުޅުވާފައެވެ. މި މައުރަޒަށް ދީފައިވާ ނަމަކީ "އެވްރިޑޭ ނައިލް"އެވެ. ނުވަތަ ނީލަ ކޯރު ހިމެނޭ ގޮތުން ކޮންމެ ދުވަހަކު ކުރެވޭ ތަޖުރިބާތައް، މިފަދަ ގޮތަކަށްވެސް ނަމުގެ މާނަ ތަރުޖަމާ ކުރެވިދާނެއެވެ.
"އެވްރިޑޭ ނައިލް" މައުރަޒުގައި ދައްކަން ބަހައްޓާފައިވަނީ އެފްރިކާގެ 10 ވަރަކަށް ރިޕޯޓަރުންނާއި ފޮޓޯ ޖަރނަލިސްޓުން ތިން އަހަރުދުވަހު ކުރި މަސައްކަތުން އެއްކޮށްފައިވާ ތަކެއްޗެވެ. މި ގޮތުން އެމީހުން ދައްކައިދީފައިވަނީ ނީލަ ކޯރުގެ އައްސޭރީގައި ދިރިއުޅެމުން އަންނަ، އެކި ގައުމަށް ނިސްބަތްވާ އެކި މުޖްތައުތަކުގެ ދިރިއުޅުން ދައްކައިދޭ ފޮޓޯއާއި އެހެންވެސް ތަކެއްޗެވެ. މިތަކެތި ނީލަ ކޯރުގެ އެކި "މޫޑް"ތަކުގެ ގޮތުގައި ދައްކައިދީފައިވެއެވެ. ނީލަކޯރު އެމީހުންނަށް ދިރިތިބުމަށް ބޯފެން ފޯރުކޮށްދޭއިރު، ދަނޑު ގޮވާންކުރުމަށާއި މަސްބޭނުމަށްވެސް ނީލަކޯރަށް ދާތަން ފެނެއެވެ. އަދިބައެއްފަހަރު ކޯރު ފުރިގެން ބަންޑުންގޮސް ގެއްލުންތައް ލިބި ބައެއްގެ ފުރާނަވެސް ގެއްލުވާފަގަ ގެއްލުންދޭ ތަނަކަށްވެސްވެއެވެ.
ގާހިރާގަ އަޅުގަނޑުމެން މިއުޅޭ ހިސާބަށް ނީލަ ކޯރު ފެންނަނީ ވަރަށް ދުރުން. ނަމަވެސް މިސްރުގެ އުތުރުގެ ހިސާބެއްގަ ދިރިއުޅޭ އަޅުގަނޑުގެ އާއިލާ މެމްބަރުންނަށް ނީލަކޯރުގެ ތަޖުރިބާ، ގާތުން ކޮށްލުމުގެ ފުރުސަތު ލިބިފަވޭ. އެމީހުން ދަތުރުކުރާނީވެސް ނީލަކޯރުގަ. އަދި ހިތްހަމަޖެހުން ހޯދާނީވެސް ނީލަ ކޯރުން.ފޮޓޯ ޖަރނަލިސްޓް އަސްމާ ޖަމާލް
މި މައުރަޒުގައި މިސްރު ސޫދާން ކެންޔާ އަދި އިތިއޯޕިޔާގެ ނީލަކޯރާ ގުޅޭ ތަޖުރިބާ ނުވަތަ ފޮޓޯއިން ވާހަކަ ދައްކާލުމަށް ބަހައްޓާފައިވެއެވެ. މީގެ އިތުރުން ނީލަ ކޯރާބެހޭ މުހިންމު މައުލޫމާތާއި ތަފާސް ހިސާބުވެސް ހިމަނާފައިވެއެވެ.
މައުރަޒު އިންތިޒާމްކުރި ފަރާތްތަކުން ބުނެފައިވާގޮތުގައި، މައުރަޒުގެ ސަބަބުން ނީލަކޯރުގެ ދޫ ނުވަތަ އަޑުގެ ގޮތުގައި މަސައްކަތް ކުރުމުގެ ފުރުސަތު އެފަރާތަށް ލިބުނެވެ. މިގޮތުން ކޯރުގެ މުސްތަގްބަލާބެހޭގޮތުން މުހިންމު ނިންމުންތައް ނިންމުމުގައި އެފަރާތްތަކުގެ މަސައްކަތަށް އެހީތެރިވެދީފައިވެއެވެ. މީގެ އިތުރުން އެކި ގައުމަށް ނިސްބަތްވީނަމަވެސް އެންމެންނަކީވެސް ނީލަކޯރާ ގުޅިފައިވާ އެއް ބައެއްކަން މައުރަޒުން ދައްކައިދޭ ކަމަށް ކެންޔާގެ ފޮޓޯ ޖަރނަލިސްޓް ޓޯނީ ވައިލްޑް ބުނެފައިވެއެވެ.
ނީލަކޯރާބެހޭ މައުރަޒު ބާއްވާފައި މިވަނީ ކޯރުގެ ފެން ބެހެންޖެހޭގޮތުގެ މައުލޫގައި، މިސްރު، ސޫދާން، އަދި އިތިއޯޕިޔާގެ މެދުގައި ދެބަސްވުންތަކެއް އުފެދިފައިވާ ވަގުތެއްގައެވެ.
