ކުރީގެ ގޭންގްސްޓާރެއް، ވަގެއް، ދެކުނު އެފްރިކާގެ ކުޅިވަރާ ބެހޭ ވަޒީރު ކަމަށް
މެކެންޒީ އަކީ ދެކުނު އެފްރިކާގެ ރައީސް ރާމަފޯސާގެ ސަރުކާރުގައި ހިމެނޭ ކޯލިޝަން ޕާޓީއެއް ކަމަށްވާ ޕެޓްރިއޮޓިކް އެލަޔަންސް ޕާޓީގެ ރައީސް އެވެ.
ދެކުނު އެފްރިކާގެ މިނިސްޓަރ އޮފް ސްޕޯޓްސް އާޓްސް އެންޑް ކަލްޗަރގެ ގޭޓަން މެކެންޒީ
ކުރީގެ ގޭންގްސްޓާރެއްގެ އިތުރުން ވައްކަމާ ނައިޓް ކްލަބް ހިންގުމުގައި ދެކުނު އެފްރިކާގެ މަޝްހޫރު މީހެއް ކަމަށްވާ ގޭޓަން މެކެންޒީ ދެކުނު އެފްރިކާގެ މިނިސްޓަރ އޮފް ސްޕޯޓްސް އާޓްސް އެންޑް ކަލްޗަރގެ މަގާމަށް އިސްކޮށްފިއެވެ.
މެކެންޒީ އަކީ ދެކުނު އެފްރިކާގެ އިދިކޮޅު ޕާޓީއެއްގެ ގޮތުގައި މިހާރު އޮތް ޕެޓްރިއޮޓިކް އެލަޔަންސް ގެ ރައީސް އެވެ.
ދެކުނު އެފްރިކާގެ ރައީސް ސިރިލް ރާމާފޯސާ އާދިއްތަ ދުވަހު އޭނާގެ ކޯލިޝަން ސަރުކާރުގެ ވަޒީރުން އިއުލާން ކުރެއްވި އިރު، ރާމާފޯސާގެ ސަރުކާރުގެ ކޯލިޝަންގައި ހިމެނޭ ޕެޓްރިއޮޓިކް އެލަޔަންސް ޕާޓީގެ ރައީސްގެ ހައިސިއްޔަތުން މެކެންޒީ ކުޅިވަރާ ބެހޭ ވަޒީރު ކަމަށް އައްޔަން ކުރައްވާ އެކަން ވަނީ އިއުލާން ކޮށްފއެވެ.
މެއި 29 ގައި ބޭއްވި އާންމު އިންތިޚާބުން ގާނޫނު ހަދާ މަޖިލީހުގެ އަޣްލަބިއްޔަތު ވެރިކަން ކުރަމުން އައި އެފްރިކަން ނޭޝަނަލް ކޮންގްރެސް އަށް ނުލިބުމުން ރައީސް ސިރިލް ރާމަފޯސާ އަށް ސަރުކާރެއް އުފެއްދެވޭ ގޮތްވީ އެހެން ޕާޓީތައް ހިމެނޭ ކޯލިޝަނެއް އުފައްދަވައިގެންނެވެ.
އުމުރުން މިހާރު 50 އަހަރުގެ މެކެންޒީ ބުނެފައިވާ ގޮތުގައި އުމުރުން 16 އަހަރުގައި އޭނާ ވަނީ ބޭންކެއް ފަޅާލާފައެވެ. އޭގެ ފަހުން ގޭންގްސްޓާރަކަށްވެ، އެންމެ ފަހުން އުޅުން ރަނގަޅުކޮށް މީހާ ބަދަލުވުމުގެ ވިސްނުން އައީ ޖަލުގައި 7 އަހަރު ހޭދަކުރުމުން ދިޔައިރު ކަމަށް އޭނާ ބުނެފައިވެއެވެ.
ޖޮހަނަސްބާގް ގައި ނައިޓް ކްލަބެއް ހިންގަމުން ގޮސް އެތަނުގެ ކަރަންޓް ބިލާ ކުލި ނުދައްކާތީ އެތަން ބަންދު ކުރަން ޖެހުމުން އެ ވިޔަފާރިއާ ދުރަށް ދިޔަ ކަމަށްބުނެ، 2013 ވަނަ އަހަރު، މެކެންޒީ ސިޔާސީ ޕާޓީއެއް އުފެއްދިއެވެ.
ކޯލިޝަން ހެދުމަށް ދެކުނު އެފްރިކާގެ ރައީސް މެކެންޒީ އާއެކު މަޝްވަރާ ކުރައްވަމުން ދިޔައިރު، މެކެންޒީ ބުނެފައިވަނީ އޭނާ ބޭނުންވަނީ ފުލުހުންނާ ބެހޭ މިނިސްޓްރީ ކަމަށެވެ. ސަބަބަކަށް އޭނާ ބުނެފައިވަނީ ދެކުނު އެފްރިކާގައި ގޭންގު ކުށްތައް ގިނަވެފައި ވުމާއެކު، އޭނާ އަކީ ކުރިން ގޭންގްސްޓާރަކަށް ވެފައި، އެކަން ހިނގާ ގޮތުގެ ތަޖުރިބާ ހުރި މީހަކަށް ނޫނީ މައްސަލަ ހައްލު ނުކުރެވޭނެތީ އެ މަގާމަށް އޭނާ އަކީ އެންމެ އެކަށީގެންވާ މީހަކަށް ދެކޭތީ ކަމަށެވެ.
އެ މަގާމު ހަމަ ޖެހޭ ގޮތް ނުވުމުން އޭނާ ބޭނުންވީ ކުޅިވަރާ ބެހޭ ވަޒީރު ކަމެވެ. އެއާއެކު އޭނާ ބުނެފައިވަނީ، ކުދިންގެ ހަޔާތް ބަދަލު ކުރަން ކުޅިވަރު ބޭނުން ކުރެވިދާނެ ކަމަށެވެ. "ކުޅިވަރުގެ ތެރޭގައި އުޅޭ ކުއްޖަކީ ކޯޓުން ބޭރުގައި އުޅޭނެ ކުއްޖެއް" މެކެންޒީ ބުނެފައިވެއެވެ.
