ބުރްކީނާފާސޯގެ ވެރިކަން ވައްޓާލާ އެގައުމުގެ އަސްކަރިއްޔާއިން ގެނައި އިންގިލާބާއި ގުޅިގެން އެތައް ސަތޭކަ ބަޔަކު އެގައުމުގެ ވެރިރަށް އޮގާޑޯގޯގެ މަގުތަކަށް އެއްވެ އުފާފާޅުކޮށްފިއެވެ.

ހުޅަނގު އެފްރިކާގެ ގައުމުތަކުގެ ތެރެއިން އެންމެ ފަހުން ބަޣާވާތް ގެނެސްފައި މިވާ ބުރްކީނާފާސޯގެ މި އިންގިލާބު އދ އާއި ފްރާންސުން ވަނީ ކުށްވެރިކޮށްފައެވެ. އަސްކަރިއްޔާއިން ވަނީ އެގައުމުގައި އިންތިޚާބުކޮށްފައިވާ ރައީސް ރޮޝް މާކް ކްރިސްޓިއަން ކަބޯރޭ މަގާމުން ދުރުކޮށް އޭނާ ހައްޔަރުކޮށްފައެވެ.

މިހާރު ބުރްކީނާފާސޯ ހިނގަމުންދަނީ މިއިންގިލާބު ގެނައުމުގައި އިސްކޮށް ހުރި ލެފްޓިނެންޓް ކާނަލް ޕޯލް ހެންރީ ސަންޑޯގޯ ނަމަކަށް ކިޔާ އޮފިސަރެއްގެ ބެލުމުގެ ދަށުންނެވެ. އޭނާއަކީ ޕެޓްރޮއިޓިކް މޫވްމެންޓް ފޮރ ޕްރިޒަރވޭޝަން އެންޑް ރެސްޓޮރޭޝަން (އެމްޕީއެސްއާރު) ނަމަކަށް ކިޔާ ގްރޫޕެއްގެ ވެރިމީހާއެވެ.

އުފާފާޅުކުރުމަށް މަގުތަކަށް ނިކުތް މީހުންގެ ތެރެއިން މީހަކު އޭއެފްޕީއާ ވާހަކަދައްކަމުން ބުނީ ރައީސް ކަބޯރޭ މަގާމުން ވަކިވުމަށް އެތައް ފަހަރަކު ގޮވާލަމުންދިޔައިރު ރައީސް އަށް އެއަޑު އިވިވަޑައިނުގެންނެވިކަމަށެވެ. ނަމަވެސް އަސްކަރިއްޔާއިން އެމީހުންގެ އަޑުއަހައިފިކަމަށް އޭނާ ބުންޏެވެ.

އަދި އުފާފާޅުކުރުމުގައި ބައެއް މީހުން ގަބޫލުކުރާ ގޮތުގައި މިއީ ބަޣާވާތެއް ނޫނެވެ. މިއީ ރައްޔިތުންނަށްޓަކައި ވެރިކަންކުރުމަށް ނުކުޅެދުމުން އެމީހުންގެ ފަރާތުން ގައުމު މިނިވަންވުމެވެ.

މަގުތަކަށް ނިކުތް ބައެއް މީހުންވަނީ މާލީ އާއި ރަޝިޔާގެ ދިދަ ގެންގުޅެފައެވެ. އެއީ 2020 ވަނަ އަހަރު މާލީގައި އޮތް ވެރިކަން ވައްޓާލާ އަސްކަރިއްޔާއިން ވެރިކަމަށް އައުމަށްފަހު މިފަހުން އެގައުމުގެ ސަލާމަތީ ކަންކަމުގައި ރަޝިޔާގެ އެހީތެރިކަމަށް އެދިފައިވާތީ އެކަމާއި ގުޅުވައެވެ.

އަލްޖަޒީރާއިން ރިޕޯޓްކުރާ ގޮތުގައި އޮގާޑޯގޯގެ މަގުތަކަށް ބަލާލުމުން އަސްކަރީ އިންގިލާބަށް ގިނަ ބަޔަކު ތާއީދުކުރާކަން އެނގިގެންދެއެވެ. ނަމަވެސް ބުރްކީނާފާސޯގެ ސަލާމަތީ ކަންކަމާމެދު މިހާރު އޮތީ ސުވާލު އުފެދިފައެވެ.

ބުރްކީނާފާސޯގައި ހުރި އަލްޖަޒީރާގެ ނޫސްވެރިޔާއާއި ހަވާލާދީ އަލްޖަޒީރާއިން ރިޕޯޓްކޮށްފައިވާ ގޮތުގައި އަސްކަރިއްޔާގައި ހަރަކާތްތެރިވާ ޒުވާނުން ދެކޭގޮތުގައި ކުރީގެ ސަރުކާރަށްވުރެ މިހާރު ގައުމުގެ ސަލާމަތީ ކަންކަން ބެލެހެއްޓެމަށް އެމީހުންނަށް މާރަނގަޅަށް މަސައްކަތްކުރެވޭނެއެވެ. ނަމަވެސް ގިނަ ބަޔަކު ދެކޭގޮތުގައި އަސްކަރީ ޕްލޭނެއް އަދި ނެތެވެ.

ހޯމަ ދުވަހުގެ ރޭ އަސްކަރިއްޔާއިން އިންގިލާބެއް ގެނައިކަން ހާމަކޮށް ސަންޑޯގޯ ސޮއިކޮށް ނެރެފައިވާ ބަޔާނުގައި ބުނެފައިވަނީ އެގައުމުގެ ގާނޫނު އަސާސީއަށް އަމަލުކުރުން ހުއްޓާލާ ސަރުކާރާއި ގާނޫނު ހަދާ މަޖިލީސް އުވާލާ ބޯޑަރުތައް ބަންދުކޮށްފައިވާކަމަށެވެ. އަދި އެމްޕީއެސްއާރުން ގާނޫނު އަސާސީއަށް އަމަލުކުރުމަށް ފަހުން ފަށާނެކަމަށް ވަނީ ބުނެފައެވެ. މީގެއިތުރުން މުޅި ގައުމުގައި ކޮންމެ ރެޔެއްގެ 9ން ފަތިހު 5ށް ކާފިއު ހިންގާނެކަންވެސް ހާމަކޮށްފައެވެ.

އަސްކަރީ އިންގިލާބާއެކުވެސް ބުރްކީނާފާސޯ ފެނިގެން ދިޔައީ އަންގާރަ ދުވަހު އާންމު ދިރިއުޅުމުގައި ހިނގާ ހުރިހާ ކަމެއް އެގޮތުގައި ހިނގަމުން ދިޔަތަނެވެ އެގޮތުން ފިހާރަތަކާއި މާރުކޭޓްތަކާއި ޕެޓްރޯލް ސްޓޭޝަންތައް ހުޅުވާފައިވާއިރު އަސްކަރިއްޔާއިން ވަކިން ބޮޑަށް މަގުތައް ބަލަހައްޓަމުންނުދާ ކަމަށް އޭއެފްޕީން ބުނެއެވެ.

މީގެއިތުރުން އަންގާރަ ދުވަހު މިހާރު ވެރިކަންކުރަމުން އަންނަ އަސްކަރިއްޔާއިން ވަނީ ވަޔާއި އެއްގަމު މަގު އިންސާނީ އެހީ ހިފައިގެން އަންނަ ވެހިކަލްތަކަށް ހުޅުވާލާފައިވާކަމަށް ބުނެފައެވެ.

ހުޅަނގު އެފްރިކާގެ ތިން ގައުމަކުން ފާއިތުވި 18 މަސް ދުވަހުގެ ތެރޭގައި އަސްކަރީ އިންގިލާބުތައް ވަނީ ފެނިފައެވެ.

1960 ވަނަ އަހަރުން ފެށިގެން ފްރާންސް އަތުން މިނިވަންކަން ހޯދިފަހުން ބުރްކީނާފާސޯ ފެންނަނީ ހަމަނުޖެހުންތަކާއެކު އުޅޭ ގައުމެއްގެ ގޮތުގައެވެ. ފްރާންސްގެ ރައީސް އެމަނުއަލް މެކްރޮން ވަނީ އަސްކަރިއްޔާގެ އިންގިލާބު ކުށްވެރިކުރައްވާފައެވެ.