ވޯލްޑް ޓްރެވަލް މާކެޓް އެފްރިކާގައި އެމްއެމްޕީއާރުސީއިން ރާއްޖެ އިޝްތިހާރުކުރަނީ

އެފްރިކާ ބައްރުގައި ބާއްވާ ފަތުރުވެރިކަމުގެ އެންމެ ބޮޑު އެއް ހަރަކާތް، ވޯލްޑް ޓްރެވަލް މާކެޓް އެފްރިކާގައި މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން ރާއްޖެ އިޝްތިހާރުކުރަންފަށައިފިއެވެ.

ސައުތް އެފްރިކާގެ ކެޕިޓަލް ކަމަށްވާ ކޭޕްޓައުންގެ ކޭޕް ޓައުން އިންޓަނޭޝަނަލް ކޮންވެންޝަން ސެންޓަރ (ސީޓީއައިސީސީ) ގައި ބާއްވާ މި ހަރަކާތް ކުރިއަށް ދާނީ އޭޕްރިލް މަހުގެ 11-13 ވަނަ ދުވަހުގެ ނިޔަލަށެވެ.

ވޯލްޑް ޓްރެވަލް މާކެޓް އެފްރިކާއަކީ ޑަބްލިއުޓީއެމް ޕޯޓްފޯލިއޯގެ ތެރެއިން ބާއްވާ 6 ހަރަކާތުގެ ތެރެއިން އެއް ހަރަކާތެވެ. 2014 ވަނަ އަހަރުން ފެށިގެން އެފްރިކާ ޓްރެވަލް ވީކްގެ ދަށުން ބާއްވާ ޑަބްލިއުޓީއެމް އެފްރިކާއަކީ ސަރަހައްދީ ފަތުރުވެރިކަމުގެ ދާއިރާގެ ޕްރޮފެޝަނަލުންނާއި ދުނިޔޭގެ އެކި ކަންކޮޅުތަކުގައި ހަރަކާތްތެރިވާ 6000 އަށް ވުރެ ގިނަ ފަރާތްތަކުން ބައްދަލުކޮށް ގުޅުން ބަދަހިކުރުމަށް ފުރުސަތު ފަހިކޮށްދޭ ޕްލެޓްފޯމެކެވެ. ޑަބްލިއުޓީއެމްގެ އެހެން ޝޯތައްކަމަށްވާ ޑަބްލިއުޓީއެމް ލަންޑަން، އަދި ދަ އެރެބިއަން ޓްރެވަލް މާކެޓް ދުބާއީއެކޭ އެއްފަދައިން ޑަބްލިއުޓީއެމް އެފްރިކާއަކީވެސް ފަތުރުވެރިކަމުގެ ހިދުމަތްދޭ އަދި ލިބިގަންނަ ފަރާތްތަކާއި، މީޑިއާގެ ފަރާތްތައް، އެއްތަނަކުން ބައްދަލުކޮށް، ނެޓްވޯކްކޮށް، ވިޔަފާރީގެ ގުޅުންތައް ބަދަހިކުރުމުގެ ފުރުސަތު ފަހިކޮށްދޭ ޝޯއެކެވެ. މި ހަރަކާތުގައި ފަތުރުވެރިކަމުގެ ދާއިރާގެ އިންވެސްޓަރުންނާއި، ޕޮލިސީ ހަދާ ފަރާތްތަކާއި، ޓުއަރ އޮޕަރޭޓަރުންނާއި، ޓްރެވަލް އެޖެންޓުން އަދި ވީއައިޕީ ކްލައިންޓުން ބައިވެރިވާނެއެވެ.

އެމްއެމްޕީއާރުސީއާއިއެކު ރާއްޖޭ ތަމްސީލުކުރުމަށް 11 އިންޑަސްޓްރީ ޕާޓްނަރުން މި ހަރަކާތުގައި ބައިވެރިވެއެވެ. މީގެތޭރޭގައި ޑަބްލިއު މޯލްޑިވްސް (ޝެރަޓަން ފުލް މޫން)، ރޮބިންސަން ކްލަބް މޯލްޑިވްސް، ވިލާ ހޮޓެލްސް އެންޑް ރިޒޯޓްސް، ކެޕިޓަލް ޓްރެވަލް އެންޑް ޓުއާޒް، ކޮކޫން މޯލްޑިވްސް، ޓްރެވަލް އެސްކޭޕް މޯލްޑިވްސް، ސަން ސިޔާމް ރިޒޯޓް، ސޮނެވާ، ރިޒޯޓް ލައިފް ޓްރެވަލް އަދި ލެޓްސްގޯ މޯލްޑިވްސްއިން ބައިވެރިވަމުންދެއެވެ.

މި ހަރަކާތުގައި ބައިވެރިވުމުގެ މަޤްޞަދަކީ ރާއްޖޭގެ ފަތުރުވެރިކަމުގެ ދާއިރާގެ އެކި ޕްރޮޑަކްޓްތައް ކަމަށްވާ ލަގްޒަރީ ރިޒޯޓް، ހޮޓެލް، ގެސްޓްހައުސް އަދި ލިވަބޯޑުތަކަށް މި މާކެޓުން ފަތުރުވެރިން އަންނަ އަދަދު އިތުރުކުރުމެވެ. އަދި ރާއްޖޭގައި ލަގްޒަރީ ސެގްމެންޓުގެ ފަތުރުވެރިންނަށް ލިބެން ހުރި ފާހަގަކުރެވޭ ތަޖުރިބާތައް އިޝްތިހާރުކުރުމެވެ. މީގެއިތުރުން ރާއްޖޭގެ ރަށްތައް ގުދުރަތީ ގޮތުން އުފެދިފައިވަނީ ވަކިވަކިން ކަމުން، މިއީ އެފްރިކާ މާކެޓްގެ މަތީފަންތީގެ ފަތުރުވެރިން ދަތުރުކުރުމަށް އެންމެ ރައްކާތެރި މަންޒިލްގެ ގޮތުގައި ޕްރޮމޯޓުކުރުމެވެ. މި ހަރަކާތުގައި އެމްއެމްޕީއާރުސީއިން ބައިވެރިވެފައިވަނީ އެފްރިކާ މާކެޓަށް ހާއްސަކޮށް ގެންގުޅޭ މާކެޓިން ސްޓްރެޓަޖީގެ ދަށުންނެވެ. މި ސްޓްރެޓަޖީ ބިނާވެފައިވަނީ އެފްރިކާގެ ޤައުމުތަކުން ރާއްޖެ އަންނަ ފަތުރުވެރިންގެ އަދަދު އިތުރުކޮށް، މަންޒިލްގެ މަޤުބޫލުކަން އިތުރުކުރުމަށެވެ. އަދި ރާއްޖޭގެ ފަތުރުވެރިކަމުގެ ދާއިރާގެ އެންމެ ފަހުގެ މައުލޫމަތު މި މާކެޓުގެ ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކާއި، ފަތުރުވެރިންނަށް ފޯރުކޮށްދިނުންވެސް ހިމެނެއެވެ.

އެފްރިކާ އަކީ ރާއްޖޭގެ ފަތުރުވެރިކަމުގެ ދާއިރާއަށް މުހިންމު މާކެޓްއެކެވެ. މިގޮތުން ވޭތުވެދިޔަ އަހަރުތަކުގައި އެފްރިކާ މާކެޓުގައި ހިމެނޭ ސައުތް އެފްރިކާ ފަދަ ޤައުމުތަކުން ރާއްޖެ އަންނަ ފަތުރުވެރިންގެ އަދަދު ދަނީ އިތުރުވަމުންނެވެ. 2019 ވަނަ އަހަރުން 2020 ވަނަ އަހަރަށް ބަލާނަމަ އެފްރިކާ މާކެޓުން ރާއްޖެ އައިސްފައިވާ ފަތުރުވެރިންގެ އަދަދު ވަނީ 70 އިންސައްތަ އިތުރުވެފައެވެ. 2021 ވަނަ އަހަރު ސައުތް އެފްރިކާއަކީ ރާއްޖެއަށް 17 ވަނަ އަށް އެންމެ ގިނައިން ފަތުރުވެރިން އައި މާކެޓެވެ. މި މާކެޓުން ރާއްޖެ އައުމަށް ބުކިން ހަދާ މިންވަރާއި އެރައިވަލްސް އިތުރުކުރުމުގެ ގޮތުން މިދިޔަ އަހަރުވެސް މި މާކެޓުގައި އެމްއެމްޕީއާރުސީއިން ވަނީ ހަރަކާތްތައް ހިންގާފައެވެ. މިގޮތުން ވާޗުއަލްކޮށް ބޭއްވި ޑަބްލިއުޓީއެމް ހަރަކާތުގައި ބައިވެރިވުމުގެ އިތުރުން ދެ ފެމިލިއަރައިޒޭޝަން ދަތުރު ވަނީ އިންތިޒާމްކޮށްފައެވެ. މި މާކެޓަށް އަމާޒުކޮށް މިހާރުވެސް އެއަރ ސީޝެލްސްއާއެކު ކެމްޕެއިނެއް ހިންގަމުން އެބަދެއެވެ. ކުރިއަށް މިދާ 2022 ވަނަ އަހަރު މި މާކެޓަށް އަމާޒުކޮށް ހިންގުމަށް ރޭވިފައިވާ ހަރަކާތްތަކުގެ ތެރޭގައި ކޭޕްޓައުން، ޖޮހަނަސްބާގް އަދި ޑާބަންގައި ބޭއްވުމަށް ރޭވިފައިވާ ރޯޑްޝޯގެ އިތުރުން ދެ މީޑިއާ ފޭމްޓްރިޕްއާއި، ޓްރެވަލް އެޖެންޓުންނަށް އަމާޒުކޮށްގެން ހިންގަން ރާވާފައިވާ އޮންލައިން ޓްރެއިނިންގ އަކާއި، ޓުއަރި އޮޕަރޭޓަރުންނާއެކު ހިންގަން ރާވާފައިވާ ކެމްޕެއިންތަކުގެ އިތުރުން އެއަރލައިންތަކާއެކު ހިންގަން ރޭވިފައިވާ ޕްރޮމޯޝަންތައް ހިމެނެއެވެ.

ދުނިޔޭގެ ޤައުމުތަކުގެ އެކި ސެކްޓަރ ތަކަށް ކޮވިޑުން ކޮށްފައިވާ ނޭދެވޭ އަސަރުތަކުން އަރައިގަނެ، އިޤްތިސާދުތައް އާރާސްތުކުރުމުގެ ގޮތުން މިހާރު މިސްރާބުޖަހަމުން މިދަނީ އައު އާންމު ހާލަތު ޤާއިމްކޮށް، ޤައުމުތަކުގެ ބޯޑަރުތައް ހުޅުވާލާ ކޮވިޑްގެ ސަބަބުން އަޅާފައިވާ ފިޔަވަޅުތައް ލުއިކުރުމަށެވެ. ގިނަ ޤައުމުތަކުން މިހާރު ދަނީ މިމޭރުމުން ކޮވިޑްގެ ފިޔަވަޅުތައް ލުއިކުރަމުންނެވެ. މިގޮތުން 4 މާރޗް 2022 ވަނަ ދުވަހުން ފެށިގެން ކޮވިޑް-19ގެ ވެކްސިންގެ 2 ޑޯޒް ފުރިހަމަކޮށްފައިވާ ފަރާތްތަކުން ރާއްޖެ އަންނައިރު ޕީސީއާރު ޓެސްޓް ހަދަން ނުޖެހޭ ގޮތަށް މިހާރު ވަނީ އުސޫލު ބަދަލުކޮށްފައެވެ. މީގެ އިތުރުން، ކޮވިޑް-19 އާއި ގުޅިގެން ދިވެހިރާއްޖޭގައި އިއުލާނުކޮއްފައިވާ އާންމު ސިއްޙަތުގެ ކުއްލިނުރައްކަލުގެ ހާލަތު ވަނީ 14 މާރޗް 2022 ވަނަ ދުވަހުން ފެށިގެން އުވާލާފައެވެ. ދިވެހިރާއްޖޭގައި ކޮވިޑް-19އިން ރައްކާތެރިވުމަށް އަޅާފައިވާ މިފިޔަވަޅުތަކަށް ލުއި ދިނުންވެފައިވަނީ ރާއްޖެއަށް ޒިޔާރަތްކުރާ ފަތުރުވެރިންނަށް އިތުރު ފަސޭހައަކަށެވެ.

ދުނިޔޭގެ ފެންވަރުގައި ރާއްޖެ އިޝްތިހާރުކުރުމުގެ ޒިންމާ އުފުލާ ކުންފުނީގެ ހައިސިއްޔަތުން އެމްއެމްޕީއާރްސީ އިން ވޭތުވެދިޔަ އަހަރު ކޮށްފައިވާ މަސައްކަތްތަކަށް ބަލާއިރު، އިންޑަސްޓްރީގެ ޕާޓްނަރުންނާއެކު 22 މާކެޓެއްގައި 260 ހަރަކާތް ވަނީ ހިންގާފައެވެ. މީގެތެރޭގައި ފެއަރތަކާއި އެގްޒިބިޝަންތަކުގައި ބައިވެރިވުމުގެ އިތުރުން، އެކި ޤައުމުތަކުގައި ރޯޑްޝޯތައް ވެސް ވަނީ ބާއްވާފައެވެ. އަދި ވެބިނާތަކާއި، ފެމިލަރައިޒޭޝަން ދަތުރުތަކުގެ އިތުރުން މާކެޓިން ކެމްޕެއިންތައް ވަނީ ހިންގާފައެވެ. ދުނިޔޭގެ ހުރިހާ ކަންކޮޅެއްގައިވެސް ރާއްޖެއަކީ ފަތުރުވެރިންގެ އިތުބާރު ލިބިފައިވާ މަންޒިލެއްކަމަށް ހެކިވާ އެންމެ އަލިގަދަ ނިޝާނަކަށް ވެގެންދިޔައީ، 'ވޯލްޑް ޓްރެވަލް އެވޯރޑްސް' (ޑަބްލިއުޓީއޭ) 2021ގައި 'ވޯލްޑްސް ލީޑިންގް ޑެސްޓިނޭޝަން' ގެ ލަގަބު ޖެހިޖެހިގެން ދެވަނަ އަހަރަށް ރާއްޖެއަށް ކާމިޔާބު ކުރެވުނުކަމެވެ. މީގެ އިތުރުންވެސް ދިވެހިރާއްޖެއިން ވަނީ ޑަބްލިއުޓީއޭ 2021ގައި އެތައް ޙާއްސަ އެވޯޑްތަކެއް ޙާސިލްކޮށްފައެވެ.

ކުރިޔަށް މިދާ އަހަރަކީ ދިވެހިރާއްޖޭގެ ފަތުރުވެރިކަމުގެ ތާރީޙުގައި ވަރަށް ޙާއްސަ އަހަރެކެވެ. ރާއްޖޭގެ ފަތުރުވެރިކަމަށް 50 އަހަރު ފުރުން ފާހަގަކުރުމުގެ ޙާއްސަ ހަރަކާތްތައް މިދިޔަ އަހަރު ފަށައިގަތީ ކުލަގަދަ ހަރަކާތްތަަކަކާ އެކުގައެވެ. އެމްއެމްޕީއާރްސީގެ ފަރާތުން ރާއްޖޭގެ ޓޫރިޒަމްގެ ރަން ޔޫބީލް ފާހަގަކުރުމަށް އެތައް ހަރަކާތްތަކެއް ތާވަލް ކޮށްފައިވެއެވެ. މީގެ ތެރޭގައި، 2022ވަނަ އަހަރުގެ ފުރަތަމަ ކުއާރޓާގައި އެކަނިވެސް 60 އިން-ޕާރސަން ހަރަކާތް ބޭއްވުމަށް ހަމަޖެހިފައިވެއެވެ. މީގެ ތެރޭގައި 11 ފެއަރ އާއި ރޯޑްޝޯތަކާއި އެހެނިހެން ހަރަކާތްތައް ފާހަގަކޮށްލެވެއެވެ.