ކުޅުދުއްފުށީގައި އިމާރަތްކުރާ 400 ހައުސިންގ ޔުނިޓް އެޅުމުގެ މަޝްރޫއުގައި ސޮއިކޮށްފި

ހދ ކުޅުދުއްފުށީގައި އިމާރަތްކުރާ 400 ހައުސިންގ ޔުނިޓް އެޅުމުގެ މަޝްރޫއުގައި ސޮއިކޮށްފިއެވެ.

މިއީ ދިވެހި ސަރުކާރުން 2022 ވަނަ އަހަރުގެ ޕީއެސްއައިޕީ ބަޖެޓުގައި ހިމަނައިގެން ކުރިއަށްގެންދާ މަޝްރޫއެކެވެ. މި އެއްބަސްވުމުގައި ސޮއިކޮށްފައިވަނީ 7 ޖުލައި 2022 ގައި މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ ގައި އޮތް ރަސްމިއްޔާތެއްގައެވެ.

މި މަޝްރޫއު ޙަވާލު ކޮށްފައިވަނީ ދޮންބޭޒް ޕްރައިވެޓް ލިމިޓެޑްގެ ޖޮއިންޓް ވެންޗަރ ކުންފުންޏެއް ކަމަށްވާ ޓުވެންޓީ ތާރޑް މެޓާލާޖިކަލް ކޮންސްޓްރަކްޝަން ގްރޫޕް ކޯ ލިމިޓެޑާއެވެ. އެގޮތުން މި އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ ހައުސިންގ ޑިޕާޓްމަންޓުގެ ޑިރެކްޓަރ ޖެނެރަލް އަހުމަދު ވިޝާން ނަސީމެވެ. ކޮންޓްރެކްޓަރުގެ ފަރާތުން ސޮއިކުރެއްވީ ދޮޮންބޭޒްއާއި އޭގެ ޖޮއިންޓް ވެންޗަރ ކުންފުނީގެ ފަރާތުން ސޮއި ކުރެއްވީ ދޮންބޭޒް ޕްރައިވެޓް ލިމިޓެޑްގެ ހެޑް އޮފް އޮޕަރޭޝަންސް އަލީ ހަމްދޫނެވެ.

މި މަސައްކަތުގެ އަގަކީ 439،991،160 (ހަތަރު ސަތެކަ ތިރީސް ނުވަ މިލިއަން ނުވަލައްކަ ނުވަދިހަ އެއްހާސް އެއްސަތޭކަ ފަސްދޮޅަސް ރުފިޔާ) އެވެ. މި މަސައްކަތް ނިންމުމުގެ މުއްދަތަކީ 540 ދުވަހެވެ.

މިނިސްޓްރީން މައުލޫމާތު ދޭ ގޮތުގައި މި މަޝްރޫއުގައި ހިމެނެނީ 400 ހައުސިންގ ޔުނިޓެވެ. ކޮންމެ ހައުސިންގ ޔުނިޓެއްގައި 100 އަކަފޫޓު ހުންނާނެއެވެ. އަދި ޔުނިޓެއްގައި ހިމެނެނީ 3 ކޮޓަރި، 3 ފާޚާނާ، ސިޓިންގ ރޫމް، ބަދިގެ، ކާގެ، ލޯންޑަރީ އަދި ސްޓޯރ ރޫމެވެ.

އޭގެ އިތުރުން، އިމާރާތުގެ ވަށާ ފާރާއި، ހައުސިންގ ޔުނިޓުތަކުގައި ދިރިއުޅޭ ފަރާތްތައް ހިތްފަސޭހަ މާހައުލެއް ޤާއިމު ކުރުމަށްޓަކައި ޔުނިޓު ވަށައިގެން އަލި ކުރެވި، ޕާކެއް ޤާއިމު ކުރެވޭނެކަން މިނިސްޓްރީން ފާހަގަ ކުރެއެވެ.

ހައުސިންގ ޔުނިޓުތައް އިމާރަތް ކުރެވެނީ 11 ބުރިއަށެވެ. ގްރައުންޑް ފްލޯރ ބޭނުން ކުރާނީ ކޮމާރޝަލް އަދި މެއިންޓެނެންސް އޮފީސްގެ އިތުރުން ކޮންމެ އެޕާޓްމަންޓަކަށް ސައިކަލު ޕާކު ކުރާނެ ޖާގަ ދޭ ގޮތަށެވެ. މި އިމާރާތުގައި ދެ ލިފްޓް ހުންނާނެއެވެ.