ލޯކަލް ކައުންސިލުތަކަށް ލިބިދީފައި އޮތް ބާރު ހަނިކުރުމާއެކު ކުޅުދުއްފުށީ ރައްޔިތުންގެ މާލިއްޔާއަށް އަހަރަކު ހަތަރު މިލިއަނެއްހާ ރުފިޔާގެ ގެއްލުން ލިބޭނެކަމަށް މޭޔަރު މުހައްމަދު އާތިފް ވިދާޅުވެއްޖެ އެވެ.

ވިޔަފާރި ކުރުމަށާއި ތަންތަން ކުއްޔަށް ދޫކުރުމަށާއި ތަރައްގީގެ ޕްރޮޖެކްޓުތައް ހިންގަން އަދި މުވައްޒަފުން ނަގަން ލޯކަލް ކައުންސިލުތަކަށް ލިބިދީފައި އޮތް ބާރު ހަނިކުރަން ސަރުކާރުން ރައްޔިތުންގެ މަޖިލީހަށް ހުށަހެޅި ބިލު ފާސްކުރީ ބުދަ ދުވަހު އޮތް ރައްޔިތުންގެ މަޖިލިސް ޖަލްސާގަ އެވެ.

ސަރުކާރުން ރައީސް މުއިއްޒުގެ އިރުޝާދުގެ ދަށުން ކައުންސިލްތަކަށް ލިބިދީފައި އޮތް ބާރުތައް ހަނިކުރުމަށް މި ސަރުކާރުން ހުށަހެޅި އެ ބިލް މަޖިލީހުން ފާސްކުރީ، އެ ބިލް އަނބުރާ ގެންދިޔުމަށް 56 ކައުންސިލްތަކުން އެ ބިލާއި ދެކޮޅަށް ބަޔާންނެރެ އެ ބިލް އަނބުރާ ގެންދިއުމަށް ގޮވާލާފައި ވަނިކޮށެވެ.

ސިޓީ ކައުންސިލުން ބުދަ ދުވަހު މެންދުރުފަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މޭޔަރު އާތިފް ވިދާޅުވީ، ރަށުގެ ތަރައްގީ އާއި ރަށުގައި ހިންގާ ގިނަ ހަރަކާތްތައް ކުރިއަށްގެންދެވެނީ ލާމަރުކަޒީ ނިޒާމުގެ ތެރެއިން ލިބުނު މާލީ ބާރުވެރިކަމާއެކު ކަމަށެވެ.

އެހެންނަމަވެސް ލާމަރުކަޒީ ނިޒާމުން ކައުންސިލްތަކަށް ލިބުނު ބާރުތައް ހަނިކުރަން ސަރުކާރުން ހުށަހެޅި ބިލުގައި ބޮޑެތި ކަންބޮޑުވުންތަކެއް ހުރި ކަމަށެވެ. އެގޮތުން ފަހު އަހަރު ކައުންސިލްތަކަށް މަސައްކަތް ނުކުރެވޭ ގޮތަށް އޮތުމާއި އާމްދަނީ އިތުރުކުރަން ހުރި މަސައްކަތް ހުއްޓުވާލާނެ ކަމަށެވެ. އަދި ކުންފުނިތަކުން ކައުންސިލަށް ލިބޭ އާމުދަނީ ހުއްޓިގެންދާނެ އެވެ.

އާތިފް ވިދާޅުވީ، އެ ބިލް ރައީސް މުއިއްޒު ތަސްދީގު ކުރައްވާ ހިސާބުން ކުޅުދުއްފުށީ ސިޓީ ކައުންސިލަށް އަހަރަކު ހަތަރު މިލިއަން ރުފިޔާގެ ގެއްލުން ލިބޭނެކަމަށް ހޯދި ހޯދުންތަކުން އަންދާޒާކުރެވިފައިވާ ކަމަށެވެ.

އެހެންވުމުން އާތިފް އެދިވަޑައިގެންނެވީ ރަށުގެ ހައްގުގައި ހުރިހާ ފަރާތްތަކުންވެސް މަސައްކަތްކޮށްދިނުމަށެވެ. އަދި ވަކި ހާއްސަކޮށް ސިޔާސީ ޕާޓީތަކުންނާއި ސިޔާސީ ފަރާތްތަކުން އެ ބިލް ފާސްނުކުރަން ބާރު އަޅަން މަސައްކަތްކޮށްދިނުމަށްވެސް އޭނާ އެދިވަޑައިގެންނެވި އެވެ.

އާތިފް ވިދާޅުވީ މި ބިލު ރައީސް ތަސްދީގު ކުރައްވައިފި ނަމަ، މި އިސްލާހާއި އެކު ކައުންސިލްގެ މަސައްކަތްތައް ހިންގުމަށް ޓެކްނިކަލް މުވައްޒަފުން ނެގުން ހުއްޓި، ތަރައްގީގެ ޕްލޭން ހިންގުމަށް ވެސް ބޮޑެތި ދަތިތަކެއް ކުރިމަތިވެގެން ދާނޭ ކަމަށެވެ.

ދިވެހިރާއްޖޭގެ އިދާރީ ދާއިރާ ތައް ލާމަރުކަޒީ އުސޫލުން ހިންގުމުގެ ގާނޫނަށް ސަރުކާރުން ހުށަހެޅި، ކައުންސިލުތަކުގެ ބާރުތައް ކަނޑުވާލާ ބިލު ރައްޔިތުންގެ މަޖިލީހުން ފާސްކޮށްފައި ވަނީ މި މަހުގެ 6 ވަނަ ދުވަހުގަ އެވެ.

އަންގާރަ ދުވަހުގެ ރޭ ބޭއްވި ކޮމެޓީ ބައްދަލުވުމުގައި މާބޮޑު ބަދަލުތަކެއް ނުގެނެސް މަޖިލީހުން މި ބިލު ފާސްކުރީ 51 މެންބަރުންގެ ވޯޓާއެކު އެވެ.

ބިލުގައިވާ ގޮތުން ކައުންސިލުގެ ބޭންކު އެކައުންޓުތައް ވެސް ހިންގަންޖެހޭނީ ފައިނޭންސް މިނިސްޓްރީ އިން ކަނޑައަޅާ އުސޫލެއްގެ ދަށުންނެވެ. އަދި އެ މިނިސްޓްރީ އިން ބޭނުންވެއްޖެ ހާލަތެއްގައި ބޭންކު އެކައުންޓުގެ ސްޓޭޓްމަންޓެއް ދޭންޖެހެ އެވެ.

އޭގެ އިތުރުން ދައުރުގެ ބާކީ މިއޮތް މުއްދަތުގެ ތެރޭގައި ކައުންސިލްތަކަށް އަމިއްލަ ބާރުގައި މުވައްޒަފުން ނެގުމާއި، ބިމާއި ފަޅުން ބައެއް ކުއްޔަށް ދިނުމާއި، ތަރައްގީގެ އައު މަޝްރޫއުތައް ހިންގުން ހުއްޓުމަކަށް އަންނާނެއެވެ.

މި ބިލު މަޖިލީހުން ފާސްކުރި ނަމަވެސް، ރައީސް މުއިއްޒު މި ބިލު ތަސްދީގު ނުކުރައްވަވާ އަނބުރާ ފޮނުއްވުމަށް ގިނަ އަދަދެއްގެ ކައުންސިލްތަކުން ވަނީ ގޮވާލާފަ އެވެ.