މުޒާހަރާގެ ހައްޔަރީން ދޫކޮށްލުމަށް ގޮވާލާ ހަރަކާތްތައް ހިންގުމަށް އެމްޑީޕީގެ ޓީމުތައް ކުޅުދުއްފުއްޓާއި ދާންދޫގައި
އެމްޑީޕީގެ މުޒާހަރާއިން ހައްޔަރުކުރެވުނު 6 މީހުންގެ ތެރޭގައި ކުރީގެ މެންބަރުން ޔާސިރު އަބްދުއްލަތީފް އަދި ޔައުގޫބް އަބްދުﷲ ހިމެނޭ
އެމްޑީޕީގެ ޗެއަރޕާސަން ފައްޔާޒް އިސްމާއިލްގެ ޓީމު ކުޅުދުއްފުށީގައި ހަރަކާތްތެރިވަނީ
އޮކްޓޯބަރު 3 ވަނަ ދުވަހުގެރޭ އެމްޑީޕީގެ ފަރާތުން މާލޭގައި ބޭއްވި ލޫޓުވައިފި ބޮޑު އެއްވުމުގެ ތެރެއިން ހައްޔަރުކުރި ފަރާތްތައް ދޫކޮށްލުމަށް ގޮވާލާ އެމްޑީޕީން ފެށި ހާއްސަ ހަރަކާތުގެ ދަަށުން އެ ޕާޓީގެ ޓީމުތައް ހދ. ކުޅުދުއްފުއްޓާއި ގއ. ދާންދޫގައި ހަރަކަތްތެރިވާން ފަށައިފިއެވެ.
އެމްޑީޕީ އިން އިސްނަގައިގެން ހުކުރު ދުވަުގެރޭ ބޭއްވި ބޮޑުމުޒާހަރާގައި ހައްޔަރުކޮށް ދޫނިދޫ ޖަލުގައި މިހާރު ބަންދުކޮށްފައިވާ މީހުންގެ ތެރޭގައި ރައްޔިތުންގެ މަޖިލީހުގެ ކުޅުދުއްފުށި އުތުރު ދާއިރާގެ ކުރީގެ މެމްބަރު ޔާސިރު އަބްދުއް ލަތީފް އަދި ރައްޔިތުންގެ މަޖިލީހުގެ ދާންދޫ ދާއިރާގެ ކުރީގެ މެމްބަރު ޔައުގޫބް އަބްދުﷲ ހިމެނެއެވެ. ކުޅުދުއްފުއްޓަށް ދިޔަ އެމްޑީޕީގެ ޓީމުގައި ޕާޓީގެ ޗެއަރޕާޗަން ފައްޔާޒް އިސްމާއިލް ހިމެނޭއިރު ދާންދުއަށް ދިޔަ ޓީމުގައި ރައްޔިތުންގެ މަޖިލީހުގެ އުނގޫފާރު ދާއިރާގެ ކުރީގެ މެމްބަރު މުހައްމަދު ވަހީދު ހިމެނެއެވެ.
ދާންދޫ ދާއިރާގެ ކުރީގެ މެންބަރު ޔައުގޫބް އަބްދުﷲ ޖަލު ތޭރިތަކުތެރޭ ހައްގަކާނުލާ ބާއްވާއިރު ދާންދޫ ރައްްޔިތުން ބަލަން ނުތިބޭނެ ކަމަށާއި، މިހާރުން މިހާރަށް ޔައުގޫބް މިނިވަންކުރުމަށް ދާންދޫ ދާއިރާގެ ރައްޔިތުން ރައީސް މުއިއްޒުގެ އަރިހުން އެދެމުންދާކަމަށް އެމްޑީޕީގެ ޓިމުން މައުލޫމާތު ދެއްވާފައިވެއެވެ.
އަދި ޗިޓު ފޮނުވާ ބިރުދައްކައިގެނެ އެމްޑީޕީ އިން ކުރާ އިސްލާހީ މަސައްކަތް ހުއްޓާނުލެވޭނެ ކަމަށާއި އެކަން މިއަދު ކުޅުދުއްފުށި ސިޓީއިން ފެނިގެންދާ ކަމަށް ކުޅުދުއްފުށީގައި ހަރަކާތްތެރިވާ އެމްޑީޕީގެ ޓީމުން ބުނެފައިވެއެވެ. އަދި ކުޅުދުއްފުށި ސިޓީ ރައްޔިތުން ގޮވަމުންދަނީ ޔާސިރު އަބްދުއްލަތީފް މިނިވަން ކުރުމަށް ކަމަށް ވެސް އެމްޑީޕީގެ ޓީމުން މައުލޫމާތު ދެއްވާފައިވެއެވެ.
އެމްޑިޕީގެ ޓީމުތައް މި ދެރަށުގައި ހަރަކާތްތެރިވާން ފަށާފައިވާއިރު، އެމްޑީޕީގެ ފަރާތުން މާލޭގައި ބޭއްވި ލޫޓުވައިފި ބޮޑު އެއްވުމުގެ ތެރެއިން ހައްޔަރުކުރި ފަރާތްތައް ދޫކޮށްލުމަށް ގޮވާލާ ބުދަދުވަހުގެރޭ ފެށި ހާއްސާ ހަރަކާތާ ގުޅޭގޮތުން މައުލޫމާތު ދެއްވަމުން އެމްޑީޕީގެ ކުރީގެ ޑެޕިއުޓީ ޗެއަރޕާސަން އަލީ ނިޔާޒް ވިދާޅުވީ މުޒާހަރާގެ ތެރެއިން ހައްޔަރުކުރި ފަރާތްތަކުގެ ތެރެއިން 6 މީހަކު ޖަލައްލާފައި އެތިބީ ސިޔާސީ ބޭނުމަކަށްކަމުގައެވެ. ބުދަދުވަހުގެރޭ ފެށި ހަރަކާތަކީ މި 6 މީހުން ދޫކޮށްލުމަށް ގޮވާލާ ހިންގޭ ހާއްސަ ހަރަކާތެއް ކަމަށާއި އެމްޑީޕީއިން އަބަދުވެސް މަސައްކަތް ކުރަނީ ހައްގުތައް ހިމާޔަތް ކުރުމަށް ނިޔާޒް ވިދާޅުވިއެވެ. އަދި ޕޯސްޓަރު ހަރުކުރުމާ، ބަންދުކޮށްފައި ތިބި ފަރާތްތަށް ދޫކޮށްލުމަށް ގޮވާލާ މާލޭގެ އިތުރުން އެފަރާތްތައް ނިސަބަތްވާ ރަށްރަށުގައިވެސް މިހަރަކާތްތައް ކުރިޔަށް ގެންދިޔުމަށް ނިންމާފަވާކަން ނިޔާޒް ވަނީ ފާހަގަ ކުރައްވާފައެވެ.
އެމްޑީޕީއިން ފެށި މިހަރަކާތުގެ ތެރެއިން ދަނޑިކޮށި ހަރުގޭ ބޭރުގައި، މިހާރު ދޫނިދޫ ޖަލުގައި ބަންދުކޮށްފައިވާ މުޒާހަރާގެ 6 ބައިވެރިންގެ ފޮޓޯ ހިމެނޭގޮތައް، އެފަރާތްތައް ދޫކޮށްލުމަށް ގޮވާލާ ބޮޑު ޕޯސްޓަރެއް ވަނީ ހަރުކޮށްފައެވެ. އަދި ދޫނިދޫގައި ބަންދުކޮށްފައިވާ ސިޔާސީ ހައްޔަރީން ދޫކޮށްލުމަށް ގޮވާލާ އެމްޑިޕީ ހަރުގެ ކުރިމަތީގައި އެމްޑީޕީގެ މެމްބަރުން ވަނީ ޝުއޫރު ފާޅު ކޮށް އިހުތިޖާޖުވެސް ކޮށްފައެވެ.
އެމްޑީޕީި އިން ކުރި މުޒާހަރާއިން ހައްޔަރުކުރެވުނު މީހުންގެ ތެރެއިން 6 މީހެއްގެ ބަންދު މުއްދަތު ކްރިމިނަލް ކޯޓުން ވަނީ 15 ދުވަހަށް އިތުރުކޮށްފައެވެ. މީގެ ތެރޭގައި ޔައުގޫބް އަބްދުﷲ އާއި ޔާސިރު އަބްދުއްލަތީފްގެ އިތުރުން، ކ. މާފުށި ކައުންސިލްގެ ރައީސް ހަސަން ސަލާހު، އަލީ ޖުމާން، އަޒީމް އަލީ އަދި ހަސަން ޝާކިރު ހިމެނެއެވެ. މުއްދަތު ޖެހުމަށްފަހު ބަންދު ކުރި އެންމެން ވަނީ ދޫނިދޫ ޖަލަށް ބަދަލުކޮށްފައެވެ.
ބަންދު ކުރި ފަރާތްތަކުގެ ތެރެއިން މާފުށި ކައުންސިލުގެ ރައީސް ހަސަން ސަލާހުގެ އިނގިލި ބިންދާލާފައިވާއިރު، ސޯޝަލް މީޑިއާގައި އާންމުވެފައިވާ ވީޑިއޯ އެއްގައި ކުރީގެ މެމްބަރު ޔާސިރު ބިޑި އަޅުވައިގެން ގެންގުޅޭ މަންޒަރު ވަނީ ފެނިފައެވެ.
