ރާއްޖެޓީވީން ރޯދަ މަހު ގެނެސްދިން "ހަވީރު ގަޑި" ޕްރޮގްރާމުގެ ނަސީބުވެރި ފަރާތަށް އިނާމު ހަވާލުކޮށްފިއެވެ.
ބުދަ ދުވަހު ވެލިގާ ހާޑްވެއަރގައި އޮތް ރަސްމިއްޔާތެއްގައި ގުރުއަތުން ހޮވުނު އަބްދުލް ވާހިދު އިދުރީސަށް މި އިނާމު ހަވާލުކޮށްދެއްވީ ރާއްޖެޓީވީގެ ޑެޕިއުޓީ ސީއޯއޯ ނާޒްމީ ސައީދުއެވެ.
އިނާމެއްގެގޮތުގައި ދީފައިވަނީ ވެލިގާ ހާޑްވެއަރއިން ހުށަހެޅި 50،000 ރުފިޔާގެ ޒަމާނީ ފާޚާނާއެއްގެ ފުރިހަމަ ސެޓެކެވެ.
މި އިނާމަށް އެސްއެމްއެސް ކުރުމަށް ރަމަޟާން މަހަށް އެއްކޮށް ހުޅުވާލާފައިވާއިރު، ރާއްޖެއެމްވީއަށް މައުލޫމާތުދެއްވަމުން އަބްދުލް ވާހިދު އިދުރީސް ބުނީ، ޖުމްލަ 143 އެސްއެމްއެސް ކުރިކަމަށާއި އެސްއެމްއެސް ކުރަނީ ކޮންމެ ދުވަހަކު ވަކިވަރަކަށް ކަމަށެވެ.
އަބްދުލް ވާހިދު އިދުރީސް ބުނީ އިނާމަށް އެސްއެމްއެސް ކުރަމުން ދިޔައީ ލިބޭނެކަމަށް އުންމީދުކޮށްގެން ކަމަށެވެ. އަދި ކޮންމެ އަހަރަކުވެސް ބޮޑު އިނާމަށް އެސްއެމްއެސްކުރާ ކަމަށާއި އެސްއެމްއެސް ކޮށްގެން އިނާމު ލިބުނު މިއީ ފުރަތަމަ ފަހަރު ކަމަށެވެ.
އަބްދުލް ވާހިދު އިދުރީސް އިތުރަށް ބުނީ، މިފަދަ ބޮޑު އިނާމެއް ލިބުމުން އުފާކުރާކަމަށާއި ވަރަށް ޝުކުރުވެރިވާ ކަމަށެވެ. ފާޚާނާ ސެޓް ލިބުމުން އޭނާގެ ރަށުގެ ގޭގެ ފާޚާނާގައި ބެހެއްޓުމަށް ނިންމާފައިވާ ކަމަށްވެސް ވަނީ ބުނެފައެވެ.
ރޯދަ މަހު ރާއްޖެޓީވީން ގެނެސްދިން "ހަވީރު ގަޑި" ޕްރޮގްރާމަށް ވަރަށް ގިނަ ބައެއްގެ ތަރުހީބު ވަނީ ލިބިފައެވެ. މި ބޮޑު އިނާމުގެ އިތުރުން ކޮންމެ ދުވަހަކުވެސް އާންމުންނަށް އިނާމު ލިބޭ ގޮތަށް މި ޕްރޮގްރާމު ވަނީ ކުރިއަށްގެންގޮސްފައެވެ.
