ނިއުރޭޑިއަންޓާއި ވިކްޓްރީ އެނބުރި އައުމުން އެހެން ޓީމްތައް ޖެހިލުންވާނެ- މުޙައްމަދު އާދަމް
ނިއުއާއި ވިކްޓްރީ އެނބުރި އައީ ތިން އަހަރެއްހާ ދުވަހުގެ ސަސްޕެންޝަނަށްފަހު
ވިކްޓްރީގެ ޓެކްނިކަލް ޑައިރެކްޓަރ މުޙައްމަދު އާދަމް
ނިއުރޭޑިއަންޓާއި ވިކްޓްރީ އެނބުރި އައުމުން އެހެން ޓީމްތައް ޖެހިލުންވާނެކަމަށް ވިކްޓްރީގެ ޓެކްނިކަލް ޑައިރެކްޓަރ އަދި މެނޭޖަރ މުޙައްމަދު އާދަމް ބުނެފިއެވެ.
ރާއްޖެ ޓީވީގެ "ކުޅިވަރު ފައިލް" ޕްރޮގްރާމްގައި ވާހަކަދައްކަމުން މުހައްމަދު ބުނީ އެނބުރި އައީ ރާއްޖޭގެ ފުޓްބޯޅައިގެ ދެ ރަސްގެފާނު ކަމަށާއި, އެދެކްލަބް އެނބުރި އައުމުން އެހެން ޓީމްތައް ޖެހިލުންވާންވެސް ޖެހޭނެކަމަށެވެ. މުހައްމަދު ބުނީ ވިކްޓްރީން ބޯޅަ ކުޅެން ބޭނުންވަނީ ނިއުރޭޑިއަންޓާވެސް އެކުގައި ކަމަށެވެ. އެހެންކަމުން ނިއުރޭޑިއަންޓްވެސް އެނބުރި އައުން އެއީ ވިކްޓްރީއަށް ލިބުނު އުފަލެއްކަމަށް ވިކްޓްރީ އަނބުރާ ގެނައުމުގެ މަސައްކަތުގައިވެސް އިސްކޮށް މަސައްކަތްކުރި މުހައްމަދު ބުންޏެވެ.
ވިކްޓްރީއާއި ނިއުރޭޑިއަންޓް އެނބުރި އައުމުން ސަޕޯޓަރުންގެ އަދަދުވެސް އިތުރުވާނެ ކަމަށާއި, އެކަން މިހާރުވެސް ފެންނަން ފަށައިފިކަން މުހައްމަދު ފާހަގަކުރިއެވެ. އެގޮތުން ގދ.ތިނަދޫ ދަނޑު ހުޅުވަން ނިއުރޭޑިއަންޓާއި ވިކްޓްރީއަށް ދައުވަތު ލިބިފައިވާކަން ފާހަގަކޮށް މުޙައްމަދު ބުނީ އެކަމުންވެސް ދޭހަވަނީ ސަޕޯޓަރުންގެ ހިތުގައި ނިއުރޭޑިއަންޓާއި ވިކްޓްރީ އޮތުންކަމަށެވެ. އެކަމަކު ދަނޑު ހުޅުވަން ދިއުމާމެދު އަދި ގޮތެއް ނުނިމޭކަމަށާއި, އެމަޝްވަރާތައް ކުރަމުންދާކަމަށް މުޙައްމަދު ބުންޏެވެ.
ނިއުރޭޑިއަންޓާއި ވިކްޓްރީ އެނބުރި އައުމުން އެެހެން ޓީމްތަކަށް ފައިދާ ނުކުރިޔަސް, ރާއްޖޭގެ ފުޓްބޯޅައަށް ފައިދާކުރާނެކަން މުޙައްމަދު އާދަމް ފާހަގަކުރިއެވެ.
ނިއުރޭޑިއަންޓާއި ވިކްޓްރީ އެނބުރި އައި ނަމަވެސް އެދެޓީމަށްވެސް ފުރަތަމަ ޑިވިޝަނުން ޖާގަ ލިބޭނީ މިމަހުގެ 13 ވަނަ ދުވަހު ފަށާ ދެވަނަ ޑިވިޝަންގައި ވާދަކޮށް ކޮލިފައިވެގެންނެވެ. އެމުބާރާތުގައި ދެޓީމްވެސް ވާދަކުރެއެވެ. ދެޓީމްގައި ނިސްބަތުން ރަނގަޅު ޓީމެއް އެބައޮތެވެ. ދެޓީމްވެސް ސަސްޕެންޝަނަށްފަހު އެނބުރި އައީ ތިން އަހަރެއްހާ ދުވަހަށް ފަހުއެވެ. ސަސްޕެންޑްކުރީ ކުޅުންތެރިންނަށް މުސާރަ ނުދިނުމުގެ މައްސަލައިގައެވެ. އޭގެތެރޭގައި ބިދޭސީ ކުޅުންތެރިންގެ މައްސަލާގައި ފީފާއިން ދިން ސަސްޕެންޝަންވެސް ހިމެނެއެވެ.
