ގައުމީ ވޮލީބޯޅަ މުބާރާތުގައި ކްލަބް ވެމްކޯ ކަޓުވާލުމަށްފަހު ތިންވަނަ ސެމީފައިނަލުން ޕޮލިސް ކްލަބް ޖާގަ ހޯދައިފިއެވެ.

އެސޯސިއޭޝަންކަޕްގެ ފައިނަލްގައި ވާދަކުރި ވެމްކޯ އަތުން ޕޮލިސް ކްލަބް ކާމިޔާބު ހޯދީ ފަސޭހަކަމާއެކު ސީދާ ތިން ސެޓުންނެވެ. މެޗުގެ ސެޓްތައް ޕޮލިސް ކްލަބުން ގެންދިޔައީ 25-19, 25-21 އަދި 25-20ންނެވެ. މެޗުން ބަލިވުމުން ވެމްކޯއަށް ސީޒަން ނިމުނީއެވެ. ވެމްކޯއަކީ ލީގުގެ ތިންވަނަ ޓީމެވެ. ޕޮލިސް ކްލަބަށް ފައިނަލަށް ދިއުމަށް ތިންވަނަ ސެމީފައިނަލް ކުޅެން ޖެހޭނެއެވެ. ތިންވަނަ ސެމީފައިނަލްގައި ޕޮލިސް ކްލަބް ވާދަކުރަންޖެހޭނީ ހޯމަ ދުވަހުގެ ރޭ ދިވެހި ސިފައިންގެ ކްލަބާ ސްޕޯރޓްސް ކްލަބް ސިޓީ ވާދަކޮށް ބަލިވާ ޓީމަކާއެވެ.

ލީގުގެ އެއްވަނަ ހޯދި ސްޕޯރޓްސް ކްލަބް ސިޓީއާއި ދެވަނަ ހޯދި ދިވެހި ސިފައިންގެ ކްލަބް ވާދަކޮށް މޮޅުވާ ޓީމަކަށް ފައިނަލްގެ ސީދާ ޖާގަ ލިބޭނެއެވެ.