ޕާކިސްތާނުގައި ތެލުގެ އަގުބޮޑުވުމުން އިހުތިޖާޖުކޮށްފި

ޕާކިސްތާނުގައި ތެލުގެ އަގު އިންތިހާއަށް ބޮޑުވުމުން އިހުތިޖާޖުކޮށްފިއެވެ.

ދުނިޔޭގެ ބާޒާރުގައި ތެލުގެ އަގު ބޮޑުވަމުުންދާ މި ދަނޑިވަޅުގައި ގިނަ ގައުމުތަކުން ވެސް އަންނަނީ ތެޔޮ އާންމުންނަށް ވިއްކާ އަގު ބޮޑުކުރަމުންނެވެ. އޭގެ ތެރޭގައި ޕާކިސްތާނުވެސް ހިމެނެއެވެ. ޕާކިސްތާނުން މި ފަހުން ވަނީ ތެލުގެ އަގު ކުރިން ހުރި އަގުގެ 10 އިންސައްތަ ބޮޑުވެފައެވެ. އެއާއެކު ލާހޫރުގައި އާންމުން އިހުތިޖާޖުކުރީ ތެލުގެ އަގު ބޮޑުވެ، އެގައުމުގެ ހަކަތައިގެ ސިނާއަތުގެ އިތުރުން އެހެން ސިނާއަތްތަކުންވެސް ގިނަ ބަޔެއްގެ ވަޒީފާ ގެއްލިފައިވުމުންނެވެ.

ޕާކިސްތާނުގެ އިންފްލޭސަން ރޭޓު 21.32 އިންސައްތަ އުފުލިފައިވާއިރު، މިއީ މިދިޔަ 13 އަހަރުގެ ތެރޭގައިވެސް އެގައުމުގެ އިންފްލޭޝަން ރޭޓު މިހާ މައްޗަށްދިޔަ ފުރަތަމަ ފަހަރެވެ. މިކަމާއި ގުޅިގެން އިހުތިޖާޖުކުރި ފަރާތްތަކުން ވަނީ އާންމުންގެ ޒަރޫރީ ބޭނުމަށް ބޭނުންކުރާ ތަކެތީގެ އަގު ކޮންޓްރޯލް ކުރުމަށް ޝާހުބާޒް ޝަރީފްގެ ސަރުކާރުގެ ކިބައިން އެދިފައެވެ.

މިކަމާއި ގުޅިގެން ޕާކިސްތާނުގެ ސަރުކާރުން ވަނީ ރައްޔިތުންގެ އެދުންތައް ފުއްދައިދޭން މަސައްކަތް ކުރާނެ ކަމަށް ބުނެފައެވެ. އެކަަމަކު މިއީ ހަމައެކަނި ޕާކިސްތާނަށް ދިމާވެފައިވާ މައްސަލައެއް ނޫން ކަމަށާއި، ދުނިޔޭގެ ބާޒާރުގައި ތަކެތީގެ އަގު އުފުލިފައިވުމުން ދިމާވާ މައްސަލައެއް ކަމަށް އެގައުމުގެ ސަރުކާރުން ވަނީ ބުނެފައެވެ.