ހަނގުރާމަ އެކަންޏެއް ނޫނެވެ. ކުނީގެ މައްސަލަވެސް ހައްލުވާން ނެތީ ހެއްޔެވެ؟

ޔަމަނުގެ ވެރިރަށް ސަނާގައި ކުނި ޖަމާ ކުރަމުން ދިޔަ ސަރަހައްދަށް ޓްރަކެއް ކައިރިކޮށް، އެކި ކުލަކުލައިގެ ކުނި ކޮތަޅުތައް ބާލަމުން ދިޔައެވެ. ކުނިބުނިން މުޅި ސަރަހައްދު ފުރި ސިއްލަންކޮޅަށް ދާންދެން، ލޮލުގެ ކޮޅަށް އޮބާލާފައިވާ ކުނީގެ ކަނޑެއް ފަދައެވެ.

މާ ދުރު ނޫން ހިސާބެއްގައި ބަޔަކު ތައްޔާރުވެގެން ތިބީ އުކާލި ކުނިބުނީގެ ތެރޭގައި ހުރި އަލުން ބޭނުން ކުރެވޭ ސަމާނު ހޮވުމަށެވެ. އެ ކުނިބުނީގެ ތެރޭގައި އިންތިހާއަށް ނުރައްކާތެރި، ސިއްހަތަށް ގެއްލުން ދެނިވި މެޑިކަލް ވޭސްޓް ނުވަތަ ސިއްހީ ހިދުމަތް ދޭ ތަންތަނުން އުކާލާ ކުނިވެސް ވަކި ނުކޮށް ހުއްޓެވެ.

އަލް-އަޒްރަގައިން ސަރަހައްދަކީ، ކޮންމެ ދުވަހަކުވެސް އެތައް ސަތޭކަ ޓަނެއްގެ ކުނި ޖަމާ ކުރާ ސަރަހައްދެކެވެ. އޭގެ ތެރޭގައި ސަނާގެ ހޮސްޕިޓަލުތަކުގައި އުފައްދާ، އިތުރު ފިޔަވަޅެއް ނާޅާ ދޫކޮށްލާފައިވާ މެޑިކަލް ވޭސްޓްވެސް ހިމެނެއެވެ.

7 އަހަރަށްވުރެ ދިގުލާ ގޮސްފައިވާ ހަނގުރާމައިގެ ސަބަބުން ޔަމަނުގެ އިގުތިސާދު ވަނީ ފުނޑުފުނޑުވެފައެވެ. އެތައް މިލިއަން ބައެއްގެ ގެދޮރު ވަނީ ގެއްލިފައެވެ. ތިމާވެށީގެ މައްސަލަތަކުގެ ލިސްޓު އެހާމެ ދިގެވެ.

ސަނާގައި ކުނި މެނޭޖުކުރުމުގެ މަސައްކަތާ ހަވާލު ތިއްބެވި އޮފިޝަލުން ވިދާޅުވި ގޮތުގައި، ސައުދީ އަރަބިއްޔާ އިސްވެ އޮވެ، 2015 ވަނަ އަހަރު ދިން ހަމަލާއެއްގައި، އެ ސަރަހައްދުގައި މެޑިކަލް ވޭސްޓް ނައްތާލުމަށް ބޭނުން ކުރާ އިންސިނެރޭޓާ ވަނީ ހަލާކުކޮށްލާފައެވެ.

ޔަމަނުގެ ފުރިހަމަ ކޮންޓްރޯލް ނެގުމަށް ތަޅާފޮޅަމުންދާ ހޫތީ އެޑްމިނިސްޓްރޭޓަރުން ވަނީ ކުނި މެނޭޖުކުރުމަށް ހާއްސަ ފެސިލިޓީ އަލުން ބިނާ ކުރުމުގެ މަސައްކަތަށް، އެންޖީއޯތަކުގެ އެހީ ހޯދަމުންދާ ކަމަށް ބުނެފައެވެ.

މި ދުވަސްވަރަކީ ޔަމަނުގެ ކޮންޓްރޯލަށް ފައިވިއްދައިގެން އޮތް ދެ ބައި މީހުންގެ މެދުގައި 2016 ވަނަ އަހަރަށް ފަހު ފުރަތަމަ ފަހަރަށް، 2 މަސްދުވަހުގެ މުއްދަތަށް، ހަމަލާ ބަދަލުކުރުން މެދުކަނޑާލުމަށް އެއްބަސްވެފައިވާ ދުވަސްވަރެކެވެ. ހަމަލާ ބަދަލުކުރުން މަޑުޖައްސާލުމުގެ އެއްބަސްވުމާއެކު، 2014 ވަނަ އަހަރުގެ ފަހުކޮޅު، ޔަމަނުގެ (ކުރީގެ) ރައީސް ޢަބްދު-ރައްބު މަންސޫރު ހާދީގެ އަތުން ވެރިކަން ފޭރިގަތް ހޫތީން ކޮންޓްރޯލް ކުރަމުންދާ ސަރަހައްދުތަކުގައި އޮތް ދަތިތަކަށް ކޮންމެވެސް ވަރެއްގެ ލުޔެއްވަނީ ދީފައެވެ.