ސީރިއާ ހަނގުރާމައިގެ ސަބަބުން ލިބިފައިވާ އުމްރާނީ ގެއްލުންތައް ކުރެހުންތަކުން

ޑަޗްގެ އާކިއޮލޮޖިސްޓް ތިއޯ ދިފޭޓާ މިވަނީ ސީރިއާ ހަނގުރާމައިގެ ސަބަބުން ލިބިފައިވާ އުމްރާނީ ގެއްލުންތަކާއި، ހަނގުރާމައިގެ ސަބަބުން ސުންނާފަތިވެފައިވާ އިމާރަތްތައް ކުރެހުންތަކެއްގެ ޒަރިއްޔާއިން ދައްކާލާފައެވެ.

އޭނާ ބުނާ ގޮތުގައި އެއީ އެ ޤައުމުގެ ތާރީޚާއި ތަރިކަ ނެތެމުންދާ މައްސަލައަށް އަލިއަޅުވާލެއްވުމަށްޓަކައި އޭނާ ކުރާ މަސައްކަތެކެވެ.

ދިމިޝްޤުގެ ޤައުމީ ދާރުލްއާސާރުގައި އޭނާގެ 15 ވަަރަކަށް ކުރެހުން ޑިސްޕްލޭ ކޮށްފައިވެއެވެ. އެގޮތުން މި އެގްޒިބިޝަންގެ ޓައިޓަލްއަކީ "ސީރިއާގެ ތަރިކަ އަނބުރާ ގެނައުން- ތިއޯ ދިފެޓާގެ ނަޒަރުން " މިއެވެ.

އުމުރުން 74 އަހަރުގެ އާޓިސްޓް ތިއޯ ބުނާ ގޮތުގައި މި އެގްޒިބިޝަންގެ މަޤްސަދަކީ ސީރިއާއާއި ޔޫރަޕްގެ ރައްޔިތުންނަށާއި، އެހީދޭ ޖަމާއަތްތަަކަށް ތަރިކަ އާރާސްތު ކުރުމުގެ މުހިއްމުކަން ހަނދުމަ ކޮށްދިނުމެވެ.

ދިފޭޓާ ވަނީ 1980 ގެ އަހަރުތަކުން ފެށިގެން ސީރިއާގައި މަސައްކަތް ކޮށްފައެވެ.

އެހެންނަމަވެސް 2011 ވަނަ އަހަރު އެ ޤައުމުގެ ރައީސް ބަޝާރުލް އައްސަދާއި ދެކޮޅަށް ހިންގި މުޒާހަރާތައް ހޫނުވުމުގެ ސަބަބުން އޭރު އޭނާ ވަނީ އެ ޤައުމު ދޫކޮށް ގޮސްފައެވެ.

އެ ހަމަނުޖެހުންތަކުގައި އެ ޤައުމުގެ ގިނަ ތަރިކަތަކެއް ސުންނާފަތިވެފައިވެއެވެ.