ކޮންފަރެންސް އޮފް ޕާޓީޒް ނުވަތަ ކޮޕް ސަމިޓަކީ ދުނިޔެއަށް މިއަދު ކުރިމަތިލާންޖެހިފައިވާ ތިމާވެށީގެ ކާރިސާތަކަށް އުއްމީދީ ހެޔޮ ބަދަލެއް ގެނެސްދޭނެ ކަމުގެ ފޮނި ހުވަފެންތަކާއެކު ގިނަ ބަޔަކު އިންތިޒާރު ކުރަމުންދާ، ބައިނަލްއަގުވާމީ ފެންވަރުގެ އެންމެ ވަރުގަދަ އެއް ބައްދަލުވުމެވެ. މި އަހަރުގެ ކޮޕް ސަމިޓް، މިޞްރުގެ ޝަރަމު އަލް-ޝައިޚްގައި ކުރިއަށް ގެންދިއުމަށް ހަމަޖެހިފައި ވާ އިރު، ނޮވެމްބަރު މަހު ފަށާ ކޮޕް-27 ސަމިޓަށް އެ ސިޓީގެ ރިސޯޓަކުން މިހާރުވެސް ވަނީ އެންމެ ފުރިހަމައަށް ތައްޔާރު ވެފައި ކަމަށް ދެންނެވިދާނެއެވެ.
ރޯޔަލް އަލްބަޓްރޯސް މޮޑާނާ ރިސޯޓުން އަމާޒު ހިފީ އިޔާދަ ކުރަނިވި ހަކަތައިގެ މިސްރާބަށެވެ. އެގޮތުން ސާފު ހަކަތަ ފޯރުކޮށްދިނުމުގެ ގޮތުން އެ ސިޓީއިން ބަރޯސާވީ، އިރުގެ އަވިން ހަކަތަ އުފެއްދުމާ ދިމާއަށެވެ.
އިރުގެ އަވިން ހަކަތަ އުފައްދާ ޕްލާންޓް އެޅުމުގެ މައިގަނޑު މަގުސަދަކީ ތިމާވެށި ހިމާޔަތް ކުރުން. 1 މެގަވޮޓްގެ ސޯލާ ހަކަތަ އުފައްދާ މި ޕްލާންޓްތަކުގެ ސަބަބުން، 140 ޓަނުގެ ކާބަންޑައިއޮކްސައިޑް ސަލާމަތް ކުރެވޭ. ދެވަނަ ކަމަކީ އިގުތިސޯދު. ހޮޓަލުގައި ބޭނުން ކުރާ ހަކަތައަށް ބަލާއިރު، ކޮންމެ 1 މެގަވޮޓްއަކުން 30 ޕަސެންޓް ސަލާމަތް ކޮށްދޭއިބްރާހީމް އަލް-މުހާންދީސް؛ ރިސޯޓުގެ އިންޖިނޭރިންގް ޑިޕާޓްމަންޓްގެ ވެރިޔާ
ރޯޔަލް އަލްބަޓްރޯސް މޮޑާނާ ރިސޯޓުގައި މަޝްރޫއު ކުރިއަށްގެންދާ ހަކަތައިގެ ކުންފުނި، ސޯލާސޮލްއިން އަމާޒު ހިފާފައި ވަނީ، މިޞްރަށް ލިބެމުންދާ އިރުގެ އަވީގެ ތަނަވަސްކަމުގެ ބޭނުން އޭގެ އެންމެ ފުރިހަމަ ގޮތުގައި ހިފުމަށެވެ.
ތިމާވެއްޓައި އިގުތިސޯދީ ގޮތުން މިއީ ވަރަށް ފައިދާ ބޮޑު ގޮތެއް. ކާބަން ފުޓްޕްރިންޓް ކުޑަވެ، އޮކްސިޖަން ލެވަލް މަތިވުމުން، ހޮޓަލުގެ އަގުވެސް މިކަމުގެ ސަބަބުން އުފުލިގެންދާނެ. އިރުގެ އަވިން ހަކަތަ އުފައްދާ 1 މެގަވޮޓްގެ ޕްލާންޓުތަކުން، އަހަރެއްގެ މައްޗަށް 1300 ޓަނުގެ ކާބަންޑައިއޮކްސައިޑް ސަލާމަތް ކުރޭ. އެއާއެކު ދުޅަހެޔޮ މުޖުތަމައެއް އުފެދޭއައިމަން ރާސިޚް؛ ސޯލާސޮލް އެނާޖީ ކޮމްޕެނީގެ ސީއީއޯ
ހެޔޮ އަގުގައި ހަކަތަ ހޯދުމުގެ މަޝްރޫއު ނުވަތަ ސާފު ހަކަތައިގެ މަޝްރޫއު މިޞްރުގައި ފަށާފައިވާ މި ދަނޑިވަޅަކީ، ރަޝިއާއިން ހާއްސަ އޮޕަރޭޝަނެއްގެ ނަމުގައި ޔޫކްރައިންގައި ކުރަމުންދާ ހަނގުރާމައިގެ ނޭދެވޭ އަސަރު ފޯރާ، މިޞްރުގެ ފަތުރުވެރިކަމުގެ ސިނާއީ އާމްދަނީ ދަށްވެ، އެކަމުގެ ތަކުލީފުތައް އުފުލަން ޖެހިފައި ވާ ދަނޑިވަޅެކެވެ.
ފެބުރުއަރީ 24، 2022 ވަނަ ދުވަހު ރަޝިއާގެ އަސްކަރިއްޔާއިން ޔޫކްރައިންއަށް އަރާ، ހަނގުރާމަ ފެށުމުގެ ކުރިއަށް ބަލާއިރު، މިޞްރަށް ޒިޔާރަތް ކުރާ ފަތުރުވެރިންގެ 31 ޕަސެންޓް ހިއްސާ ކުރަނީ ރަޝިއާއާއި ޔޫކްރައިންގެ ފަތުރުވެރިންނެވެ.
ނޮވެމްބަރު 7 އިން 18 އަށް ޝަރަމް އަލް-ޝައިޚްގައި އޮންނަ ކޮޕް-27 ސަމިޓްގެ ރިޔާސަތު ބަލަހައްޓާނީ މިޞްރުންނެވެ.
މެއި 19، 2022 ވަނަ ދުވަހު މިޞްރުން ވަނީ މޫސުމާ ބެހޭ ގައުމީ އިސްތިރާޖު 2050 އިއުލާން ކޮށްފައެވެ. އެއީ އިޔާދަ ކުރަނިވި ހަކަތައަށް ބަރޯސާވެ، ވަޔާއި އިރުގެ އަވިން ހަކަތަ އުފެއްދުމުގެ މަޝްރޫއުތައް އިތުރަށް ފުޅާ ކުރުމަށް ބާރުދޭ އިސްތިރާޖެކެވެ.
