ކޮންމެ މެޗަކީ ވެސް މުހިންމު މެޗެއްކަމަށާއި، ނަމަވެސް އެޔަށްވުރެ ޓީމުގެ ކުޅުންތެރިން މާމުހިންމުކަމަށް ޕޮލިސް ކުލަބުގެ ކޯޗު ފަތުހުﷲ ވަހީދު (ފައްލޯ)ބުނެފިއެވެ.

މިއަހަރުގެ ޤައުމީ ލީގު ޕޮލިހުން ނިންމާލަން ޖެހުނީ ހަތަރު ވަނައިގައި އޮވެއެވެ. ލީގުގެ ފަހު މެޗުގައި ދިވެހި ސިފައިންގެ ކުލަބާ ދެކޮޅަށް ކުޅުނު މެޗުގައި ޕޮލިސް ޓީމު ނިކުތީ ބަދަލުތަކަކާއެކުއެވެ. ޒުވާން ސްކޮޑެއް އޮތް ޕޮލިސް ޓީމުން އެ މެޗަށް ނިކުތީ ބެންޗުގައި ތިބި ޒުވާން ކުޅުންތެރިންނާއެކުއެވެ. މެޗުގައި ޕޮލިސްގެ މައްޗަށް ސިފައިން ކުރި ހޯދީ ތިން ސެޓު އެއް ސެޓުންނެވެ.

މެޗަށްފަހު ފައްލޯ ބުނީ މެޗުގައި ކުޅުންތެރިން ދެއްކި ކުޅުމާމެދު ހިތްހަމަ ޖެހޭ ކަމަށެވެ. ފައްލޯ ބުނީ ކުރިން ވެސް ފާހަގަކުރި ގޮތަށް ޓީމުގައި އަނިޔާގެ މައްސަލަތަކެއް އުޅޭކަމަށެވެ. ސިފައިންނާ ދެކޮޅަށް ކުޅުނު މެޗަކީ މުހިންމު މެޗެއްކަމަށާއި، ނަމަވެސް އެއަށްވުރެ ކުރިއަށް އޮތް ސެމީ ފައިނަލް މެޗު މާ މުހިންމު ކަމަށް ދެކޭ ކަމަށް ވެސް ފައްލޯ ބުންޏެވެ. ބަދަލުތަކަކާއެކު ސިފައިންގެ މެޗަށް ނިކުތީ ކުރިއަށް އޮތް ސެމީ މެޗަށް ކުޅުންތެރިންނަށް ރެސްޓު ދިނުމަށާއި، ރިކަވަރިއަށް ވަގުތު ދިނުމަށް ކަމަށް ވެސް އޭނާ ވަނީ ބުނެފައެވެ.

ފައްލޯ ބުނީ މެޗުގައި ޒުވާން ގިނަ އައު ކުޅުންތެރިން ކުޅުނުކަމަށާއި، އެހެން ކަމުން މައްސަލަ ދިމާވާނެކަމަށެވެ. މައްސަލަ ދިމާ ނުވާނަމަ، އެއީ ވެސް މައްސަލަ އެއް ކަމަށް އޭނާ ބުންޏެވެ.

އިތުރަށް ފައްލޯ ބުނީ ކޮންމެ މެޗަކީ ވެސް އައު މެޗެއް ކަމަށެވެ. ކުރިއަށް އޮތް ސެމީ ފައިނަލް މެޗުގައި ވެސް ނިކުންނާނީ މީގެ ކުރިން ކުޅެފައި ހުރި ޓީމުތަކާ ދެކޮޅަށްކަން ފާހަގަކޮށް ފައްލޯ ބުނީ އެ މެޗަށް ނިކުންނާނީ ވަރަށް ބޮޑަށް ތައްޔާރުވެގެން ކަމަށެވެ.

ފައްލޯ ބުނީ މުބާރާތަށް ޒުވާން ކުޅުންތެރިންނާއެކު ނިކުތުމުގެ ބޭނުމަކީ އެ ކުޅުންތެރިންގެ ގާބިލުކަން އިތުރުކުރަން ކަމަށެވެ. ޒުވާން ގިނަ ކުޅުންތެރިންނަށް ފުރުސަތު ދެނީ އެ މަގުސަދުގައި ކަމަށާއި، އެކަން ކަން ހާސިލް ކުރެވޭ ކަމަށެވެ. ފައްލޯ ބުނީ ޕޮލިސް ޓީމާއެކު ފަރިތަކުރި ބައެއް ޒުވާން ކުޅުންތެރިން ކޯޓު މަތިން ނުފެންނަ ކަމަށާއި، އެކަމާ ހިތާމަ ކުރާ ކަމަށެވެ.

ކުރިއަށް އޮތް ޤައުމީ މުބާރާތުގެ ސެމީ ފައިނަލްގައި ޕޮލިސް ނިކުންނާނީ ކުލަބް ވެމްކޯއާ ދެކޮޅަށެވެ.