އާރަށު ހިޔާނަތް: އެމްއެމްޕީއާރްސީ މެދުވެރިކޮށް ރަށްތައް ދޫކުރި ގޮތާއި ގުޅޭގޮތުން ހެކިބަސް ނަގައިފި
30 ޖޫން 2022 | ބުރާސްފަތި 07:38މިހާރު ކުރިއަށްދަނީ ހެކިބަސް ނެގުމުގެ މަރުޙަލާ
ވ އާރަށު ހިޔާނާތުގެ މައްސަލައިގެ ބޭއްވި އަޑުއެހުމުގެ ތެރެއިން
ފެލިދެއަތޮޅު އާރަށް ތަރައްގީކުރުމަށް ހިންގި މުއާމަލާތުގެ ތެރެއިން, މަގާމުގެ ނުފޫޒު ބޭނުންކޮށް, ރިޝްވަތު ނެންގެވިކަމަށް ތުހުމަތުކުރެވޭ މައްސަލައިގެ އަޑުއެހުމެއް ބުރާސްފަތި ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި މައްސަލަ ކޯޓުގައި ކުރިއަށްދަނީ ކުރީގެ ރައީސް އަބްދުﷲ ޔާމީނާއި، ޔޫސުފް ނައީމްގެ ދައުވާތައް އެކުއެކީގައެވެ.
މި މައްސަލައިގައި މިހާރު ކުރިއަށްދަނީ ހެކިބަސް ނެގުމުގެ މަރުޙަލާއެވެ. ބުރާސްފަތި ދުވަހުގެ އަޑުއެހުމުގައި ވަނީ ޓޫރިޒަމް މިނިސްޓްރީގެ ލީގަލް ބައިގައި ކުރިން މަސައްކަތް ކުރެއްވި ފަސީހް ޒާހިރުގެ ހެކިބަސް ނަގާފައެވެ.
ހެކިބަސް ދެއްވަމުން އޭނާ ވަނީ އާންމު އުސޫލުން އެމްއެމްޕީއާރްސީ މެދުވެރިކޮށް ރަށެއް ދޭއިރުގައި ކުރެވިގެންދާ މަސައްކަތްތަކާއި، އެކަމާ ގުޅިގެން އޭރު ފާހަގަވެފައިވާ ކަންކަން ކިޔާދެއްވާފައެވެ.
ހެކިވެރިޔާ ވިދާޅުވާ ގޮތުގައި އޭރު އެކި ރަށްތަކުގެ އަގު ކަނޑައަޅާފައިވަނީ އެކި ގޮތަށެވެ.އިކުއިޒިޝަން ކޯސްޓުގެ ގިނަ އިރެގިއުލާރިޓީތައްފެނިފައިވާކަން އޭނާ ފާހަގަ ކުރެއްވިއެވެ.
ހެކިވެރިޔާ ވަނީ އެމްއެމްޕީއާރްސީ މެދުވެރިކޮށް ދޫކޮށްފައިވާ ރަށްތަކުގެ ލީސް އެގްރީމަންޓު ދައްކާ ގޮތާއި ގުޅޭގޮތުން ހެކިބަސް ދެއްވާފައެވެ.
މި ކަންކަމާ ގުޅޭ އިރުޝާދުތައް އޭރު ދެއްވަމުން ގެންދެވީ އޭރުގެ ޓޫރިޒަމް މިނިސްޓަރު އަހުމަދު އަދީބުކަމަށް ހެކިވެރިޔާ ވިދާޅުވިއެވެ. އޭގެ އިތުރުން، އެމްއެމްޕީއާރްސީގެ ކުރީގެ މެނޭޖިންގް ޑިރެކްޓަރ ޒިޔަތަކީ ކަނޑައެޅިގެން އެކަންކަމުގައި ތެރޭގައި އުޅުއްވާފައިވާކަން އެނގި، އަދި ފެނިފައިވާ ފަރާތްތައްކަން ހެކިވެރިޔާ ފާހަގަ ކުރެއްވިއެވެ.
ރަށްތައް ދޫކުރުމުގެ އުސޫލާއި ގުޅޭގޮތުން ހެކިވެރިޔާ ވިދާޅުވީ، އެމްއެމްޕީއާރުސީއާއެކު ޓޫރިޒަމް މިނިސްޓްރީން އެކުލަވާލާ ލީޒް އެގްރިމެންޓެއްގެ ދަށުން އެ ރަށެއް އެމްއެމްޕީއާރުސީއަށް ދޫކުރާ ކަމަށެވެ. އެއަށްފަހު ދެން ކުރިއަށްދަނީ އެމްއެމްޕީއާރުސީން އެ ރަށެއް ކުއްޔަށް ދޫކުރާނެ ކުންފުންޏެއް ކަނޑައެޅުމަށް ފަހު، އެ ކުންފުންޏަކާ އެކު އެގްރީމަންޓު ކުރުމުގެ މަރުޙަލާއެވެ.
ހެކިވެރިޔާ ވިދާޅުވި ގޮތުގައި އެކަން އެހެން އޮތްނަމަވެސް، ބައެއް ރަށްރަށް އެ އުސޫލުން ބޭރުންވެސް ދޫކޮށްފައިވެއެވެ.
ވ އާރަށް ކުއްޔަށް ދޫކުރުގެ މުއާމަލާތް ހިންގިއިރު އެ ހެކިވެރިޔާ ހުރީ ޗުއްޓީގައެވެ.
މި މައްސަލައިގައި 16 ޖޫންގައި ބޭއްވި އަޑުއެހުމުގައި ވަނީ ފުރަތަމަ ހެކީގެ ހެކިބަސް ނަގާފައެވެ. އެ ދުވަހުގެ އަޑުއެހުމުގައި ދިވެހި ފުލުހުންގެ ޚިދުމަތުގެ ފޮރެންސިކް ސަރވިސްގެ ޑިޖިޓަލް އެވިޑެންސް ލެބޯޓަރީގައި މަސައްކަތް ކުރަމުންދާ އަބްދުﷲ ޝިފާޒުގެ ހެކިބަސް ވަނީ ނަގާފައެވެ. އެއީ މި މައްސަލައިގައި ހެއްކެއްގެ ގޮތުގައި ހުށައަޅާފައިވާ މޯބައިލް ފޮރެންސިކް ރިޕޯޓާއި ގުޅިގެންނެވެ.
19 ޖޫން 2022 ގައި ބޭއްވި އަޑުއެހުމުގައި ވަނީ ދިވެހި ފުލުހުންގެ ޚިދުމަތުގެ ޑިޖިޓަލް އެވިޑެންސް ލެބޯޓަރީގައި ޑިޖިޓަލް ފޮރެންސިކް އެގްޒެމިނަރ އެއްގެ ގޮތުގައި މަސައްކަތް ކުރައްވާ އިބްރާހިމް ޒުހައިރުގެ ހެކިބަސް ނަގާފައެވެ. އެއީ މި މައްސަލައިގައި ހެއްކެއްގެ ގޮތުގައި ހުށައަޅާފައިވާ ކޮމްޕިއުޓަރ ފޮރެންސިކް ރިޕޯޓާއި ގުޅިގެންނެވެ.
ކްރިމިނަލް ކޯޓުގައި މި މައްސަލަ ބައްލަވަނީ އެ ކޯޓުގެ އިސްގާޒީ އަހުމަދު ޝަކީލެވެ.
