ޑިންގީ ގެއްލުނު ސުމެއިދު ހޯދަން ފަޅު ރަށްތައް ބަލަން ފަށައިފި

އާދީއްތަ ދުވަހު ހަވީރު ޑިންގީއެއްގައި މަހަށް ނުކުމެ އުޅެނިކޮށް، ގެއްލުނު ފުލުސް ކޯޕްރަލް ސުމެއިދު މުހައްމަދު ހޯދުމަށް އައްޑޫ ސިޓީގެ ފަޅު ރަށްތައް ބަލަން ފަށައިފި އެވެ.

ފަޅު ރަށްތައް ބަލަން ފަށާފައިވަނީ ފުލުހުންނެވެ. މިކަމުގައި އެމްއެންޑިއެފުންވެސް އެހީތެރިކަން ފޯރުކޮށްދީފައިވެއެވެ.

Advertisement

ސުމެއިދު ގެއްލުނު މައްސަލައިގެ ތަހުގީގު ކުރުމަށް ފުލުހުންގެ ޚާއްސަ ޓީމެއް އައްޑޫގައި ހަރަކާތްތެރިވާން ފަށާފައިވާއިރު އެމްއެންޑީއެފުން ބުނީ އެމްއެންޑީއެފްގެ ޑައިވް ޓީމުން 127،500 ސްކެއާ މީޓަރުގެ ސަރަހައްދެއް ބަލާފައިވާ ކަމަށާއި އައްޑޫ ފްލައިން ސްކޫލުގެ އެހީތެރިކަމާއެކު ވައިގެ މަގުން ހުއްޓުމެއްނެތި ދަނީ ހޯދުމުގެ މަސައްކަތް ކުރަމުން ކަމަށެވެ.

ފުލުހުންގެ މީޑިއާ އޮފިޝަލް ބުދަ ދުވަހު ވިދާޅުވީ ސ. ހިތަދޫ އާބިން, އުމުރުން 27 އަހަރުގެ ސުމެއިދު، ހޯދުމުގެ މަސައްކަތް ސިފައިންނާއި ފުލުހުން ހުއްޓުމެއް ނެތި އަދިވެސް ކުރިއަށް ގެންދާ ކަމަށެވެ. ނަމަވެސް އެ ތަހުގީގާ ބެހޭ އެއްވެސް ތަފުސީލެއް ފުލުހުން އަދިއެއް ނުދެ އެވެ.

ފުލުހުންގެ މީޑިޔާ އޮފިޝަލް ވިދާޅުވެފައިވަނީ ސުވާލު ކުރަން ޖެހޭ މީހުންނާ ސުވާލު ކުރަމުން އަންނަކަމަށާއި ތަހުގީގު ކުރިއަށް ދާތީ މި ހާދިސާއާ ގުޅޭ އިތުރު ތަފުސީލެއް އަދި ދެވޭކަށް ނެތް ކަމަށެވެ. ސުމެއިދާއި ނާއިފްއާއެކު ދެން މަހަށް ދިޔައީ ފޭދޫ ފަހާގޭ ހުސައިން ސައީދު އެވެ.

މަހަށް ދިޔަ ސ. ފޭދޫ ފަހާގޭ ހުސައިން ސައީދު ބައެއް މީޑިޔާތަކަށް ކިޔައި ދީފައިވާ ގޮތުގައި އެ މީހުން މަހަށް ދިޔަ 17 ފޫޓްގެ ޑިންގީ ބަންޑުން ޖަހާލީ، ނެގި ބޮޑު ރާޅަކާ އެކުގަ އެވެ.

މި ހާދިސާއާ ގުޅިގެން ސައީދާއި ނާއިފް ވަނީ އެ މީހުން މަސް ބާނަން ތިބި ސަރަހައްދާ ދިމާލުގައި އޮތް ފަޅު ރަށަކަށް އަރައިފަ އެވެ. އަދި ފަހުން އެ މީހުން ވަނީ ފަތާފައި ގޮސް ކައިރީގައި އޮތް ޝަންގްރިއްލާ ވިލިނގިލި ރިސޯޓް އެންޑް ސްޕާ އަށް އަރައިފަ އެވެ.

"ބަންޑުން ޖަހާލި" ޑިންގީ ފަޅު ރަށުން ފެނުނު އިރު، އޭގެ ތެރެއިން ޑިންގީގައި ހުރި ގިނަ ސާމާނުތައް ހުއްޓެވެ.

އެހެންވެ ސުމައިދުގެ އާއިލާ އިން ވަނީ ޑިންގީ ބަންޑުން ޖަހާލި ކަމަށް ގަބޫލު ނުކުރެވޭ ކަމަށް ބުނެފަ އެވެ. އަދި ފުލުހުން ވެސް ބުނަނީ ޑިންގީ ބަންޑުން ޖަހާލިކަން ކަށަވަރު ނުވާ ކަމަށެވެ.