އެއް މަސް ފާއިތުވީ، އެމްއެމްޕީއާރްސީ މައްސަލަ ދައުވާކުރަން ފޮނުވުމުގެ މަރުހަލާ ނުނިމޭ!
31 މެއި 2017 | ބުދަ 13:53ޑިއުޓީ ޕްރޮސެކިއުޝަން މަރުހަލާ ފެށިތާ އެއް މަސް ދުވަސް
މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން
ރާއްޖޭގެ ތާރީޚުގައި މިހާތަނަށް ހިންގި އެންމެ ބޮޑު ކޮރަޕްޝަނުގެ މައްސަލައިގެ ތަހުގީގު ނިންމައި، ދައުވާކުރުމަށް ފޮނުވުމުގެ މަރުހަލާ ފެށުނުތާ އެއް މަސް ދުވަސް ވީއިރު ވެސް، އެ މަރުހަލާ ނިމިފައިނުވާ ކަމަށް އެންޓި ކޮރަޕްޝަން ކޮމިޝަން (އޭސީސީ) އިން ބުނެފި އެވެ.
ފަޅުތަކާއި ފަޅުރަށްތައް ކުއްޔަށް ދޫކޮށްގެން މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) މެދުވެރިކޮށް ދައުލަތަށް ވަންނަންޖެހޭ 1.22 ބިލިއަން ރުފިޔާއަށް ޚިޔާނާތްތެރިވެފައިވާކަން އޮޑިޓަރ ޖެނެރަލް ނެރުއްވި އޮޑިޓްރިޕޯޓުން ހާމަވި އެވެ. ނަމަވެސް، ޚިޔާނާތްތެރިވި ފައިސާގެ އަދަދު އެއަށް ވުރެ ގިނަ ވާނެ ކަމަށް ކަމާބެހޭ އެކިފަރާތްތަކުން ބުނެފައި ވެއެވެ.
ފަޅުތަކާއި ފަޅުރަށްތައް ކުއްޔަށް ދޫކޮށްގެން ދައުލަތަށް ލިބެންޖެހޭ އެތައް ބިލިއަން ރުފިޔާއަކަށް ޚިޔާނާތްތެރިވެފައިވާއިރު، އަމިއްލަ އެކައުންޓްތަކަކަށް 65.01 މިލިއަން ޑޮލަރު (އެއް ބިލިއަން ރުފިޔާ) ޖަމާކޮށްފައި ވެއެވެ. ޑޮލަރު ގަނެ ވިއްކުމުގެމުއާމަލާތްތަކުން 6.31 މިލިއަން ޑޮލަރު (97.3 މިލިއަން ރުފިޔާ) އަށް ޚިޔާނާތްތެރިވެފައި ވެއެވެ. އަމިއްލަ ކުންފުނިތަކަށްލޯނުގެ ގޮތުގައި 6.15 މިލިއަން ޑޮލަރު (94.8 މިލިއަން ރުފިޔާ) ދީފައިވާއިރު، ވަކި ކަމެއް ނޭނގޭ ގޮތަށް އަމިއްލަކުންފުނިތަކަށް 1.90 މިލިއަން ޑޮލަރު (29 މިލިއަން ރުފިޔާ) އެމްއެމްޕިއާރްސީން ދީފައި ވެއެވެ.
މި މައްސަލައިގެ ތަހުގީގު އެއްކޮށް ނިންމާލެވިއްޖެ ކަމަށް އޭސީސީން ބުނެފައިވަނީ ތަހުގީގު ކުރަން ފެށިތާ ދޮޅު އަހަރެއްހާ ދުވަސް ފަހުން އޭޕްރީލް 30 ވަނަ ދުވަހު އެވެ. އެ ދުވަހު އޭސީސީގެ ނައިބް ރައީސް މުއައްވިޒް ރަޝީދު ވިދާޅުވީ މިހާރު އެ މައްސަލަ ވަނީ ދައުވާ ކުރުމަށްޓަކައި ޕީޖީ އޮފީހަށް ފޮނުވުމުގެ މަރުހަލާގެ ތެރޭގައި ކަމަށެވެ.
އޭސީސީ އިން ކުރިއަށް ގެންދާ ކޮންމެ ތަހުގީގެއް ނިމުމުން އެ މައްސަލައިގައި ދައުވާ ކުރުމަށް އެ މައްސަލައެއް ޕީޖީއަށް ފޮނުވުމުގެ ކުރިން އޭސީސީއާ ޕީޖީ އޮފީހުގެ ވަކީލުންނާއެކު މަޝްވަރާތައް ކުރިއަށް ގެންދާ ކަމަށް މުއައްވިޒް ވިދާޅުވިއެވެ.
އެމްއެމްޕީއާރްސީ މައްސަލައިގެ ޑިއުޓީ ޕްރޮސެކިއުޝަން ފެށިތާ އެއް މަސް ދުވަސް ވެފައިވާއިރު، މައްސަލަ މިހާރު އޮތް ހިސާބާ ގުޅޭ ގޮތުން އޭސީސީއާ ސުވާލުކުރުމުން، އެ ކޮމިޝަނުގެ މީޑިއާ އޮފިޝަލް ވިދާޅުވީ މައްސަލަ އަދިވެސް އޮތީ ހަމަ އެ މަރުހަލާގައި ކަމަށެވެ.
ޑިޔުޓީ ޕްރޮސިކިޔުޝަން މަރުހަލާ ލަސްވަމުންދާ ސަބަބާ ގުޅޭ ގޮތުން ސުވާލު ކުރުމުން އޭސީސީގެ ރައީސް ހަސަން ލުތުފީ މިމަހުގެ 15 ވަނަ ދުވަހު ވިދާޅުވީ އެމްއެމްޕީއާރުސީގެ ޚިޔާނާތުގެ މައްސަލައަކީ ވަރަށް ބޮޑު ތަހުގީގެއް ކަމަށާއި އެހެން ކަމުން ކަރުދާހުގައިވާ މައުލޫމާތުތަކުގެ އިތުރަށް އެ މައްސަލައާ ގުޅޭ އިތުރު ތަފްސީލް ޕީޖީ އޮފީހަށް އޭސީސީ އިން ހިއްސާ ކުރާ ކަމަށެވެ. އަދި އޭގެ ސަބަބުން ޕީޖީ އޮފީހަށް މައްސަލައިގެ ތެރެއަށް ވަނުމަށް ފަސޭހަވެގެންދާނެ ކަމަށް ލުތުފީ ވިދާޅުވިއެވެ.
އޭސީސީން ބުނެފައިވާ ގޮތުގައި އެމްއެމްޕީއާރްސީ ޚިޔާނާތުގެ ޚުލާސާ ރިޕޯޓް ނެރޭނީ މައްސަލަ ޝަރީއަތަށް ފޮނުވުމަށްފަހުގަ އެވެ.
ރާއްޖޭގައި މިހާތަނަށް ހިންގި އެންމެ ބޮޑު ޚިޔާނާތުގެ މައްސަލައިގެ ރިޕޯޓް ނުނެރެ ގިނަ ދުވަސްތަކެއް ފާއިތުވެފައިވާތީ އިދިކޮޅު ސިޔާސީ ފަރާތްތަކާއި މަދަނީ ޖަމިއްޔާތަކުން ދަނީ ކަންބޮޑުވުން ފާޅުކުރަމުންނެވެ. ނަމަވެސް، އޭސީސީން ބުނަމުންދަނީ ތަހުގީގު ދިގުދެމިގެން ދިޔައީ، މިދިޔަ އަހަރު އަލްޖަޒީރާއިން ދެއްކި "ސްޓީލިން ޕެރެޑައިސް" ޑޮކިއުމެންޓްރީއާއި އޭގެ ފަހުން ހާމަވި ކަންތައްތަކާއެކު އިތުރަށް ތަހުގީގުތައް ކުރަން ޖެހުމުން ކަމަށެވެ. ނަމަވެސް، އެކިފަރާތްތަކުން ތުހުމަތު ކުރަމުންދާ ގޮތުގައި ރިޕޯޓް ލަސްވަނީ އޭސީސީގެ މައްޗަށް ހުރި ނުފޫޒުތަކެއްގެ ސަބަބުންނެވެ.
