ސިޔާސީ ސަބަބުތަކަށްޓަކައި ދަރިންނާއި ބެހުން ހުއްޓަން ޖެހޭ: މިނިސްޓަރ މާރިޔާ
ކޮންމެ ވާހަކައެއްގެ ތެރެއަށް ދަރިންނޭ ކިޔައިން ހެޑްލައިން ހެދޭތޯ ބައެއް މީހުން ބަލާ ކަމަށް ވިދާޅުވި
ޑިފެންސް މިނިސްޓަރ މާރިޔާ އަހްމަދު ދީދީ
ސިޔާސީ ސަބަބުތަކަށްޓަކައި ދަރިންނާއި ބެހުން ހުއްޓަން ޖެހޭ ކަމަށް ޑިފެންސް މިނިސްޓަރ މާރިޔާ އަހްމަދު ދީދީ އަނެއްކާވެސް ވިދާޅުވެއްޖެއެވެ.
ހޯމަ ދުވަހު ކުރެއްވި ޓުވީޓެއްގައި މާރިޔާ ވިދާޅުވީ ކޮންމެ ވާހަކައެއްގެ ތެރެއަށް ދަރިންނޭ ކިޔައިން ހެޑްލައިން ހެދޭތޯ ބައެއް މީހުން ބަލާ ކަމަށެވެ. އަދި މިއީ ސިޔާސީ ދާއިރާގައި އުޅޭ އަންހެނުންނަށް ކުރާ ދުއްތުރާއެއްގެ ގޮތުގައި މާރިޔާ ވަނީ ސިފަ ކުރައްވާފައެވެ.
މާރިޔާ މިހެން ވިދާޅުވީ މެސެޖެއްގެ ސްކްރީން ޝޮޓެއް ހިއްސާ ކުރައްވަމުންނެވެ. އެ މެސެޖުގައި ވަނީ މާރިޔާގެ ފިރިހެން ދަރިފުޅު ބަންގްލަދޭޝް މީހަކާއެކު ބަދުއަހްލާޤީ އަމަލު ހިންގާ ކަމަށް ތުހުމަތު ކުރެވޭ ވީޑިއޯއާ ގުޅިގެން އިންޒާރު ލިބެމުންދާތީ އެކަން ބެލުމަށްޓަކައި އިންޑިއާގެ ޓީމަކުން ރާއްޖެ އައިސްފައިވޭތޯ ވަނީ ސުވާލު އުފައްދާފައެވެ.
މި މެސެޖަށް ރައްދު ދެއްވާ މާރިޔާ ވިދާޅުވީ ދަރިފުޅަށް އެއްވެސް މީހަކު ބްލެކްމެއިލް ނުކުރާ ކަމަށެވެ. އަދި ދަރިފުޅު ބަދުއަހްލާޤީ އަމަލު ހިންގާ ކަމަށް ތުހުމަތު ކުރެވޭ އެއްވެސް ވީޑިއޯއެއްް ވެސް ނެތް ކަމަށެވެ.
މާރިޔާ މިހެން ވިދާޅުވެފައިވާއިރު ސޯޝަލް މީޑިއާގައި އެކި މީހުންގެނަމުގައި ވީޑިއޯތަކާއި ފޮޓޯތައް ދަނީ ދައުރު ކުރަމުންނެވެ. ފުލުހުން ވަނީ ދާދިފަހުން އެއް ޖިންސުން ގުޅުންހިންގާ މަންޒަރު ފެންނަ ވީޑިއޯއެއް ލީކުވުމާއި ގުޅިގެން ޤާނޫނީ ވަކީލު ނާޒިމް އަބްދުއްސައްތާރުގެ ޕާސްޕޯޓު ހިފަހައްޓާފައެވެ.
އޭނާ ފުރުން މަނާކޮށްފައިވާއިރު، އޭނާގެ މައްޗަށް ތަހުގީގު ހިންގަމުންދާކަމަށް ފުލުހުންގެ މީޑިއާ އޮފިޝަލު ވިދާޅުވިއެވެ.
އެކަމާ ގުޅިގެން ފުލުހުން މީގެ ކުރިން ބުނެފައިވަނީ ސޯޝަލް މީޑިއާގައި ދައުރުވަމުންދާ ވީޑިއޯގައި ހިމެނޭ މީހުންގެ މައްސަލަތައް ތަހުގީގު ކުރަމުންދާ ކަމަށެވެ. ހަމައެއާއެކު، ފުލުހުންނަށް ހުށައެޅިފައިވާ ބްލެކްމެއިލިންގ ގެ މައްސަލައެއްވެސް ތަހުގީގު ކުރަމުންދާކަން ވަނީ ފާހަގަކޮށްފައެވެ.
