ގަދަ ހަތަރެއްގެ އަމާޒަށް އަދިވެސް ބަދަލެއް ނާދޭ- އިންމަ
ސަސްއަށް ދެބުރުން ލިބުނީ 14 ޕޮއިންޓް
ސަސްގެ ކޯޗު އިންމަ
ސީޒަން ފެށީ ގަދަ ހަތަރެއް އަމާޒަކަށް ހަދައިގެން ކަމަށާއި, އެވިސްނުމަށް އަދިވެސް ބަދަލު ނާންނަކަމަށް ސުޕަރ ޔުނައިޓެޑް ސްޕޯރޓްސް (ސަސް) ގެ ކޯޗު އިސްމާއީލް މަހުފޫޒު (އިންމަ) ބުނެފިއެވެ.
ދެވަނަ ބުރުގެ މެޗުތައް ނިންމާލުމަށްފަހު "ރާއްޖެއެމްވީ"އާ ވާހަކަދައްކަމުން އިންމަ ބުނީ މިވަގުތު ގަދަ ހަތަރަކުން ބޭރުގައި އޮތަސް ކުރީގައި އޮތް އެހެން ޓީމްތަކާ ދެމެދު މާބޮޑު ފަރަޤެއް ނެތުމުން ވިސްނުމަށް ބަދަލެއް ނާންނަކަމަށެވެ. އެކަމަކު އެއަމާޒަށް ވާސިލްވެވޭނީ ހުރިހާ ކުޅުންތެރިންވެސް ޓީމެއްގެ ގޮތުގައި ރަނގަޅަށް މަސައްކަތްކޮށްގެންކަން އިންމަ ބުންޏެވެ. ކުޅުންތެރިން ފުލް ކޮމިޓްމަންޓްދީ, ރަނގަޅަށް މަސައްކަތްކުރަން ބޮޑަތި ގޮންޖެހުންތަކެއް ހުރިކަންވެސް އިންމަ ފާހަގަކުރިއެވެ.
އިންމަ ބުނީ އޭނާ އަތުގައި އޮތީ އަދިވެސް ރަނގަޅަށް މަސައްކަތްކޮށްފިނަމަ ކުރިއަށްދެވޭވަރުގެ ޓީމެއްކަމަށެވެ. އޭނާ ބުނީ ދަނޑުމަތީގައި ޓީމަށް ދިމާވާ މައްސަލައަކީ ރަނގަޅަށް ކުޅެފައިވެސް ލަނޑު ނުޖެހުންކަމަށާއި, ބަލިވިޔަސް ނަތީޖާތައް ގޯސް ނޫންކަމަށެވެ. އެކަމަކު ކުރިއަށްދެވޭނީ އެކަން ހައްލުކޮށްގެންކަމަށް އިންމަ ބުންޏެވެ. އިންމަ ބުނީ އޭނާގެ ޓީމަށް އަދިވެސް އެންމެ ރަނގަޅު ފޯމްގައި ނުނިކުމެވޭ ކަމަށެވެ. ގަދަހަތަރެއްގައި އޮންނަން ކުރާ މަސައްތަށް ހުރަސްއެޅުނީ ވަރަށް ގިނަ ކަންކަން ބަދަލުވެގެންކަމަށާއި, އެކަމަކު އަދިވެސް ފުރުޞަތު އެބައޮތްކަމަށް އިންމަ ބުންޏެވެ.
ދެވަނަ ބުރު ނިމުނުއިރު ސަސް އޮތީ 14 ޕޮއިންޓާއެކުއެވެ. ތާވަލްގައި ސަސްއަށްވުރެ ފަހަތުގައި އޮތީ ހަމައެކަނި ދަ ގްރާންޑޭއެވެ. އެކަމަކު ސަސްއަށްވުރެ ކުރީގައި އޮތް ޓީމަތަކާ ދެމެދު އޮތީ މެޗަކުން އަރާ ހަމަކުރެވޭވަރުގެ ފަރަޤެކެވެ.
