ދުނިޔޭގެ އެންމެ މޮޅު އެއް ފުޓްބޯޅަ ކުޅުންތެރިޔާ ކްރިސްޓިއާނޯ ރޮނާލްޑޯ އެނބުރި ސްޕޯޓިންގ ކްލަބަށް ހިނގައިދާނެކަމަށް ރިޕޯޓުތައް ބުނެފިއެވެ.

ރޮނާލްޑޯ އެންމެ ފުރަތަމަ ކުޅުނީ ޕޯޗުގަލްގެ ސްޕޯޓިންގ ކްލަބަށެވެ. ސްޕޯޓިންގއަށް ކުޅުމަށްފަހު މެންޗެސްޓަރ ޔުނައިޓެޑަށް ބަދަލުވީ މީގެ 19 އަހަރު ކުރިންނެވެ. އޭގެ ފަހުން ރެއާލް މެޑްރިޑް އަދި ޔުވެންޓަސްއަށް ކުޅުމަށްފަހު އޭނާ އެނބުރި މެންޗެސްޓަރ ޔުނައިޓެޑާ ގުޅުނީ މިދިޔަ ސީޒަނަށެވެ.

ޔުނައިޓެޑަށް ބަދަލުވުމަށްފަހު، ނިމުނު ސީޒަންގައި 37 އަހަރުގެ ރޮނާލްޑޯ ވަނީ އެޓީމަށް 24 ލަނޑު ކާމިޔާބުކޮށްދީފައެވެ. މީގެ ކުރިން އަޑުތައް ފެތުރިފައިވާ ގޮތުން އޭނާގެ ފުޓްބޯޅަ ކެރިއަރު ނިންމާލުން އެކަށީގެންވަނީ އޭނާ ފުޓްބޯޅައިގެ ތެރެއަށް ވަތް ސްޕޯޓިންގ ކްލަބުގައެވެ.

ރިޕޯޓުތައް ބުނާގޮތުން މިއަންނަ ސީޒަންގައި ރޮނާލްޑޯ ސްޕޯޓިންގއަށް ބަދަލުވުމަކީ އެކަށީގެންވާކަމެކެވެ. އަދި އޭނާ ސްޕޯޓިންގއަށް ގެންދިއުމަށް އެޓީމުންވެސް އަންނަނީ ގިނަ މަސައްކަތްތަކެއް ކުރަމުންނެވެ.

މިދިޔަ އަހަރުގެ ތެރޭގައި ރޮނާލްޑޯގެ މަންމަ ވަނީ އޭނާ އަލުން ސްޕޯޓިންގގައި ފުޓްބޯޅަ ކުޅޭތަން ބަލަން ބޭނުންވާކަމަށް ބުނެފައެވެ. ރޮނާލްޑޯގެ މަންމަ ބުނީ އޭނާ މަރުވުމުގެ ކުރިން ރޮނާލްޑޯ އެނބުރި ސްޕޯޓިންގއަށް ބަދަލުވުމަކީ އޭނާގެ ވަރަށް ބޮޑު އުންމީދެއްކަމަށެވެ.