ޑަބްލިއުޑީސީން ކުރާ މަސައްކަތްތައް ރައްޔިތުން ބަލައިގެންފި: މާލެ ސިޓީގެ ޑަބްލިއުޑީސީ
ކޮމިޓީއަކީ ވަރަށް ކުޅަދާނަ މެމްބަރުން ހިމެނޭ ކޮމިޓީއެއް
މާލެސިޓީގެ އަންހެނުންގެ ތަރައްޤީއަށް މަސައްކަތް ކުރާ ކޮމިޓީގެ ހެންވޭރު ހުޅަނގު މެމްބަރު ފާތިމަތު ޝަހުލާ
މާލެ ސިޓީގެ އަންހެނުންގެ ތަރައްޤީއަށް މަސައްކަތް ކުރާ ކޮމިޓީ ވެސް ބަަލައިގެންފި ކަމަށާއި އަދި ކޮމިޓީން ކުރާ މަސައްކަތް ވެސް ރައްޔިތުން ބަލައިގެންފައިވާ ކަމަށް އެ ކޮމިޓީގެ ހެންވޭރު ހުޅަނގު މެމްބަރު ފާތިމަތު ޝަހުލާ ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަދައްކަވަމުން ޝަހުލާ ވިދާޅުވީ ފާއިތުވި އެއް އަހަރު ދުވަސް ތެރޭގައި ވަކި މަސައްކަތްތަކެއް ކުރުމަށް ލަނޑުދަނޑިތައް ރޭވިގެން ދިޔަ ކަަމަށާއި އޭގެ ތެރެއިން ވަރަށް ގިނަ ކަންތައްތައް ހާސިލް ކުރެވިފައިވާ ކަމަށެވެ.
އަދި މުޖުތަމައު ބަަލައިގަންނަ ބަޔަކަށްވުމަށް އަމާޒު ހިފި ކަމަށާއި ފާއިތުވި އެއްއަހަރު އެކަންތައްތައް ވެސް ހާސިލްވެއްޖެ ކަމަށް އޭނާ ވިދާޅުވިއެވެ. ޕްރޮގްރާމުތައް ރާވާއިރު މާލެ ސިޓީ އެކީ ހިމަނާފައިވާ ކަމަށާއި ވިލިމާލެ އަދި ހުޅުމާލޭގައި ވެސް ޕްރޮގްރާމްތައް ހިންގަމުންގެންދާ ކަމަށް ޝަހުލާ ވިދާޅުވިއެވެ.
އަންހެނުންގެ ތަރައްޤީއަށް މަސައްކަތް ކުރާ ކޮމެޓީގެ މެމްބަރުންގެ މުސާރާއާ ބެހޭގޮތުން ވާހަކަ ދައްކަވަމުން ޝަހުލާ ވިދާޅުވީ އެންމެ އެކަށީގެންވާ މުސާރަ ނުލިބޭތީ ރަށްރަށުގެ ކޮމިޓީތަކުން ވެސް އެންމެ ފުރިހަމައަށް މަސައްކަތް ނުކުރެވޭ ކަމަށެވެ. އިތުރު ވަޒީފާއަކަށް ދަމުން، ކޮމިޓީގެ މަސައްކަތަށް ވަގުތު ދީގެން ބައެއް މެމްބަރުން މަސައްކަތް ކުރާ ކަމަށާއި އެހެންނަމަވެސް އެކަށީގެންވާ މުސާރަ ލިބިގެން މަސައްކަތް ކުރާނަމަ ރައްޔިތުންނަށް އިތުރު ޚިދުމަތްތައް ފޯރުކޮށްދެވިގެންދާނެ ކަމަށް ވެސް ވިދާޅުވިއެވެ.
ޕްރޮގްރާމުގައި ވާހަކަ ދައްކަވަމުން އަންހެނުންގެ ތަރައްޤީއަށް މަސައްކަތް ކުރާ ކޮމިޓީގެ ހެންވޭރު އުތުރު މެމްބަރު ފާތިމަތު ލައިޒާ ވިދާޅުވީ އެ ކޮމިޓީގައި ވަރަށް ކުޅަދާނަ މެމްބަރުން ހިމެނޭ ކަމަށެވެ. އަދި މިހާރު ކުރިއަށް ރާވާ ހިންގުމަށް ހަމަޖެހިފައިވާ ޕްރޮގްރާމްތަކަށް ބަލާއިރު ދީނީ ގޮތުން އަންހެނުން ހޭލުންތެރި ކުރުވުމާއި ގެވެށި އަނިޔާއަށް އަންހެނުން ހޭލުންތެރި ކުރުވުމަށް ޕްރޮގްރާމްތައް ހިންގުމަށް ރާވާފައިވާ ކަމަށް ލައިޒާ ވިދާޅުވިއެވެ.
މާލެ ސިޓީގެ އަންހެނުން ތަރައްޤީއަށް މަސައްކަތްކުރާ ކޮމިޓީއިން އިންތިޒާމްކޮށްގެން، އެ ކޮމިޓީއަށް އެއް އަހަރު ފުރުމުގެ މުނާސަބަތުގައި "ޚިދުމަތަށް އެއްއަހަރު"ގެ ނަމުގައި ކުރިޔަށް ގެންދިޔަ ހަފްލާގެ ތެރެއިން އެކި ގޮތްގޮތުން މާލެއަށް ޚިދުމަތް ކޮށްފައިވާ އަންހެނުން ފާހަގަކޮށް އެ ފަރާތްތަކަށް ހިތްވަރުދިނުމުގެ ފިލާ ވަނީ ހަވާލުކޮށްދީފައެވެ.
މިކަމާއި ގުޅިގެން ޕްރޮގްރާމުގައި ވާހަކަ ދައްކަވަމުން ލައިޒާ ވިދާޅުވީ އެ ފަރާތްތަކަށް ހިތްވަރުދިނުމުގެ ފިލާ ހަވާލުކުރުމުން އެކަން ބަލައިގަނެ، ކޮމިޓީއަށް ޝުކުރު އަދާ ކޮށްފައިވާ ކަމަށެވެ. އަދި ކުރިއަތް އޮތް އަހަރުތަކުގައި ވެސް މި އެވޯޑް ހަފްލާ ބޭއްވުމަށް މާލެސިޓީގެ އަންހެނުންގެ ތަރައްޤީއަށް މަސައްކަތް ކުރާ ކޮމިޓީން ނިންމާފައިވާ ކަމަށެވެ.
