ކުރިއަށް އޮތް ހަމަހަށް ކްރިކެޓް ބޯޑްގެ އެންމެ ބޮޑު އަމާޒަކީ ޔޫތް ޑިވެލޮޕްމަންޓް ޕްރޮގްރާމް އަލުން ފެށުންކަމަށް ކްރިކެޓް ބޯޑްގެ ރައީސް މުޙައްމަދު ފައިސަލް ވިދާޅުވެއްޖެއެވެ.

ރާއްޖެ ޓީވީގެ "ކުޅިވަރު ފައިލް" ޕްރޮގްރާމްގައި ވާހަކަދައްކަވަމުން ފައިސަލް ވިދާޅުވީ ކޮވިޑްގެ ހާލަތާ ގުޅިގެން ހުރިހާ ކުޅިވަރަކަށް ދިމާވި މައްސަލަ ކްރިކެޓަށްވެސް ދިމާވިކަމަށެވެ. ކްރިކެޓްގެ ވައިޑީޕީ އޮތީ އެއްކޮށް ހުއްޓިފައިކަމަށާއި, ސްކޫލް އެއްވެސް ހަރަކާތެއް ނުހިންގުނުކަމަށް ވިދާޅުވިއެވެ. އެކަމަކު ދިރާސީ އާ އަހަރު އޮގަސްޓްމަހު ފެށެންވާއިރަށް ވައިޑީޕީ ޕްރޮގްރާމް އަލުން ފެށިގެން ދިއުމަކީ އުއްމީދު ކަމަށާއި, މަސައްކަތްކުރައްވަނީ އެމަގަށްކަމަށް ފައިސަލް ވިދާޅުވިއެވެ.

ފައިސަލް ވިދާޅުވީ މާލޭގެ އިތުރުން ކްރިކެޓްގެ ހަރަކާތްތައް ފުޅާކޮށް ހިންގާ ކުނަހަންދޫއާއި ފުވައްމުލަކުގައިވެސް ވައިޑީޕީ ހަރަކާތް އެކުއެކީގައި ފައްޓަވާނެކަމަށެވެ. އަލުން ވައިޑީޕީ ޕްރޮގްރާމް ފަށަނީ ދިރާސާއެއްވެސް ހައްދަވައިގެންކަމަށާއި, އެދިރާސާގެ އަލީގައި ޕްރޮގްރާމް ކުރިއަށްގެންދާނެ ކޮމަން ސިލަބަހެއްވެސް ތައްޔާރުކުރައްވާފައިވާކަމަށް ވިދާޅުވިއެވެ. އަދި ކޯޗިންގ މެނުއަލްވެސް ތައްޔާރުކޮށް, ހުރިހާ ތަނެއްގައިވެސް ކުރިއަށްގެންދާނީ އެއް ޕްރޮގްރާމެއްކަމަށް ވިދާޅުވިއެވެ. ޕްރޮގްރާމް އަލުން ފަށާއިރު ކްރިކެޓްގެ ތެރެއަށް އަންނަން ބޭނުންވާ ސްކޫލްތަކެއްވެސް އެބަހުރިކަމަށާއި, އެސްކޫލްތައްވެސް ބައިވެރިކުރައްވާނެކަމަށް ވިދާޅުވިއެވެ.

 ކްރިކެޓް ބޯޑްގެ ވިސްނުމަކީ  ޕްރޮގްރާމްގެ ތެރެއިން އިންޓަރ ހައުސްއާއި, އިންޓަރ ސްކޫލް މުބާރާތަށް ކުޅުންތެރިން ދިއުމެވެ. އަދި އިންޓަރހައުސްއާއި, އިންޓަރ ސްކޫލް މުބާރާތުން އުމުރުފުރާގެ ޤައުމީ ޓީމްތަކަށް ކުޅުންތެރިން ނެގޭނެ އުޞޫލެއް ޤާއިމްކުރުމެވެ.