ބޫޓާންގައި ކުރިއަށް ދިޔަ ޓީ20 ކުއަޑްރަންގިއުލާ ކްރިކެޓް މުބާރާތުގައި ވާދަކުރި ރާއްޖޭގެ ޤައުމީ ކްރިކެޓު ޓީމު ރާއްޖެ އައުމުން، ޓީމަށް ހޫނު މަރުޙަބާއެއް ކިޔައިފި އެވެ.
މި މުބާރާތަކީ ބޫޓާންގައި އެ ޤައުމުގައި ޤާއިމު ކުރި ފުރަތަމަ ކްރިކެޓު ސްޓޭޑިއަމް ހުޅުވުމުގެ ގޮތުން ބޭއްވި މުބާރާތެކެވެ. މުބާރާތުގައި ރާއްޖޭގެ އިތުރުން ދެން ވާދަކޮށްފައި ވަނީ ތިން ޤައުމެވެ. އެއީ ބޫޓާން، ތައިލެންޑު އަދި އިންޑޮނޭޝިއާ އެވެ. ރާއްޖެ އިން ވަނީ އެ މުބާރާތުގެ ފައިނަލް އިން ފުރުސަތު ހޯދައިފަ އެވެ. މިއީ 14 އަހަރުގެ ތެރޭގައި ކްރިކެޓު މުބާރާތެއްގެ ފައިނަލް އިން ރާއްޖެ ޖާގަ ހޯދި ފުރަތަމަ ފަހަރެވެ.
ފައިނަލްގެ ފުރުސަތު ރާއްޖެ އިން ހޯދީ ސެމީ ފައިނަލްގައި މުބާރާތް ބޭއްވި ޤައުމު ބޫޓާން ބަލިކޮށްގެންނެވެ. ފައިނަލްގައި ރާއްޖެ ކުޅެން ޖެހުނީ ތައިލެންޑާ ދެކޮޅަށެވެ. ނަމަވެސް ވިއްސާރައިގެ ސަބަބުން ރާއްޖެ އާއި ތައިލެންޑު ބައްދަލު ކުރަން އޮތް ފައިނަލް މެޗު ކުޅެވޭ ގޮތެއް ނުވި އެވެ. އެހެންވެ، މުބާރާތުގެ ޤަވާއިދުގައި އޮތް ގޮތުން ލީގު ބުރުގެ އެއް ވަނަ ޓީމުގެ ގޮތުގައި އޮތް ތައިލެންޑަށް ޗެމްޕިއަންކަން ދިނުމަށް ވަނީ ނިންމައިފަ އެވެ. ލީގު ބުރުގައި ތައިލެންޑުން ވަނީ ކުޅުނު ހުރިހާ މެޗަކުން މޮޅުވެފަ އެވެ.
ޤައުމީ ކްރިކެޓު ޓީމު ރާއްޖެ އައުމުން ވެލާނާ އިންޓަނޭޝަނަލް އެއާޕޯޓުން ޓީމަށް މަރުޙަބާ ކިޔާފައި ވަނީ ކޮމިޝަނަރ އޮފް ސްޕޯޓްސް މުޙައްމަދު ޠަލާލް (ޠަލާ) އެވެ. މީގެ އިތުރުން އެ ރަސްމިއްޔާތުގައި ކުޅިވަރާއި ހަށިހެޔޮކަމާ ބެހޭ ވުޒާރަގެ އެހެނިހެން އިސްވެރިން ވެސް ވަނީ ބައިވެރިވެފަ އެވެ.
ރާއްޖެ އިން ވަނީ 2010 ވަނަ އަހަރު ތައިލެންޑުގައި ކުރިއަށް ދިޔަ އޭސީސީ ޓްރޮޕީ ޗެލެންޖު މުބާރާތުގެ ފައިނަލްގައި ކުޅެފަ އެވެ. އެ ފަހަރުގެ ފައިނަލްގައި ރާއްޖޭ ވާދަކޮށްފައި ވަނީ ސައުދީ އަރަބިޔާއާ އެވެ. އެ ފަހަރުގެ ފައިނަލް އިން ރާއްޖެ މޮޅުވީއިރު، މިއީ އެ އަހަރުގެ ފަހުން ކްރިކެޓު މުބާރާތެއްގެ ފައިނަލް އިން ރާއްޖެ އަށް ފުރުސަތު ލިބުނު ފުރަތަމަ ފަހަރެވެ.
