ޒުވާން ކްރިކެޓް ޓީމް މެލޭޝިޔާއަށް!

އޭސީސީ މެންސް ޕްރިމިއަރ ކަޕްގައި ވާދަކުރުމަށް ރާއްޖޭގެ 21 އަހަރުން ދަށުގެ ކްރިކެޓް ޓީމް މެލޭޝިޔާއަށް ހިނގައްޖެއެވެ.

މިމަހުގެ 12 ވަނަ ދުވަހު މެލޭޝިޔާގައި ފަށާ މުބާރާތުގައި ވާދަކުރާ ޓީމްތައް ބަހާލާފައިވަނީ ހަތަރު ގްރޫޕަކަށެވެ. ރާއްޖޭގެ ޒުވާން ޓީމް އޮތީ ސިންގަޕޫރާއި, ކުވައިތާއި އަދި ތައިލެންޑާއެކު ގްރޫޕް ސީގައެވެ. ގްރޫޕް އޭގައި އޮތީ ނޭޕާލާއި, ބަހްރައިނާއި, ސައޫދީ އަރަބިއްޔާއާއި އަދި އީރާނެވެ. ގްރޫޕް ޑީގައި ހިމެނެނީ ހޮންކޮންގާއި މެލޭޝިޔާއާއި, ޖަޕާނާއި އަދި އިންޑޮނީޝިޔާއެވެ. ސެމީފައިނަލުން ފުރުސަތު ލިބޭނީ ކޮންމެ ގްރޫޕަކުން އެއްވަނަ ހޯދާ ޓީމަށެވެ. މުބާރާތުގެ މެޗުތައް ކުޅޭނީ 50 އޯވަރަށެވެ.

މުބާރާތުގައި ވާދަކުރާ ރާއްޖޭގެ ޓީމްގެ ކޯޗަކީ އިސްމާއީލް ނިހާދެވެ. މެނޭޖަރެއްގެ ގޮތުން ދިޔައީ މުހައްމަދު އަޝްރަފެވެ. ރާއްޖޭގެ ފުރަތަމަ މެޗުގައި މިމަހުގެ 12 ވަނަ ދުވަހު ވާދަކުރާނީ ސިންގަޕޫރާއެވެ. ދެވަނަ މެޗުގައި 16 ވަނަ ދުވަހު ވާދަކުރާނީ ތައިލެންޑާއެވެ. ތިންވަނަ މެޗުގައި ކުވައިތާ ވާދަކުރާނީ މިމަހުގެ 18 ވަނަ ދުވަހުއެވެ.