ދެ މުބާރާތް އެއްވަގުތަކަށް ދިމާވެ، ކްރިކެޓްގެ ގައުމީ ދެޓީމް!

ސީނިއަރ ޤައުމީ ކްރިކެޓް ޓީމް ވާދަކުރަން އޮތް ދެމުބާރާތެއް އެއްދުވަސްވަރަކާ ދިމާވެ, ޤައުމީ ދެޓީމް ކްރިކެޓް ބޯޑުން އެކުލަވާލައިފިއެވެ.

ސީނިއަރ ޤައުމީ ކްރިކެޓް ޓީމަށް އޮތް ދެމުބާރާތަކީ މިމަހު ގަތަރުގައި އޮންނަ އައިސީސީ ޓީ20 ވަރލްޑްކަޕްގެ އޭޝިޔާ ސަރަހައްދުގެ ކޮލިފައިންގއާއި ޗައިނާގައި އޮންނަ އޭޝިޔަން ގޭމްސްއެވެ. ކްރިކެޓް ބޯޑުން މިހާރު ނިންމާފައިވަނީ އައިސީސީ ޓީ20 ވަރލްޑްކަޕް ކޮލިފައިންގައި ސީނިއަރ ވަރުގަދަ ޓީމް ވާދަކުރުމަށެވެ. އެޓީމަށް މުބާރާތުގައި އިރުޝާދުދޭނީ ސީނިއަރ ޓީމްގެ ލަންކާ ކޯޗެވެ. ކޯޗާއެކު ޓީމް މިހާރު ތިބީވެސް ސްރީލަންކާގައެވެ. އެއީ ތަމްރީނު ކޭމްޕެއް ފުރިހަމަ ކުރުމަށެވެ. ކޭމްޕްގެ ތެރޭގައި ވަރުފަދަ މެޗުތަކެއް ކުޅުމަށްފަހު ރާއްޖެ ނައިސް ޓީމް ދާނީ ޤަތަރަށެވެ.

ސީނިއަރ ދެވަނަ ޓީމެއް އެކުލަވާލަން ޖެހުނީ އޭޝިޔަން ގޭމްސްވެސް އެއް ދުވަސްވަރަކާ ދިމާވުމުންނެވެ. އޭޝިޔަން ގޭމްސްއަށް ތައްޔާރުވާ ޓީމް މިވަގުތު ޕްރެކްޓިސް ކުރަމުންދަނީ މާލޭގައެވެ. އެޓީމް ބިނާވެފައިވަނީ 23 އަހަރުން ދަށުގެ ޓީމާއި, ކުރިން ގައުމީ ޓީމަށް ކުޅުނު ބައެއް ކުޅުންތެރިންގެ މައްޗަށެވެ. އެޓީމްގެ ކޯޗަކީ އިމާދު އިސްމާއީލްއެވެ. ކްރިކެޓް ބޯޑްގެ ރައީސް މުހައްމަދު ފައިސަލް ވިދާޅުވީ ފުށުނާރާނެ ގޮތަށް ވޭތޯ މަސައްކަތްކުރިނަމަވެސް އެކަން ކާމިޔާބުނުވުމުން ދެޓީމް އެކުލަވާލަން ޖެހުނީ ކަމަށެވެ. މިދިޔަ ފަސް މަހެއްހާ ދުވަހު ސީނިއަރ ޓީމާއި އުމުރުފުރާ ޓީމްތަކުގެ ޕްރެކްޓިސްވެސް މެދުނުކެނޑި ރަނގަޅަށް ގެންދެދިވައިވާތީ ދެޓީމް އެކުލަވާލަން މާބޮޑު ދަތިކަމެއް ކުރިމަތިނުވިކަންވެސް ފައިސަލް ފާހަގަކުރެއްވިއެވެ.

ފައިސަލް ވިދާޅުވީ އޭޝިޔަން ގޭމްސްގެ ޝެޑިއުލް ލިބުންވެސް ލަސްވީ ކަމަށާއި, ކުރިން އެނގިފައި އޮތް ގޮތުން ކުޅެން ލިބެނީ އެއް މެޗު ކަމަށެވެ. އެއީ އޭޝިޔާގެ ގަދަ ހަތަރު ޓީމް ސީޑްކޮށްފަ އޮތުމުންނެވެ. އެހެންނަމަވެސް ބައިވެރިވާ ޓީމްތަކުގެ އަދަދު އިތުރުވުމުން ގްރޫޕް ކުރިއިރު ދެ މެޗު ކުޅެން ރާއްޖެއަށް ލިބެއެވެ. ރާއްޖެއާއެކު އޮތީ ނޭޕާލާއި މޮންގޯލިޔާ އެވެ.